Коњи и магариња неколку дена пасеа во тетовскиот скејтепарк, каде што тревата со недели не е искосена од одговорните во општинското јавно претпријатие (ОЈП), пренесува Порталб.
Сопствениците на фирми што се наоѓаат во близина на паркот, реагираа во Порталб.мк за неодржувањето на паркот. Во меѓувреме, од претпријатието ветија дека во текот на оваа недела ќе интервенираат и ќе го решат проблемот.
„Веќе неколку дена животните се тука, не си одат. Никој не ја коси тревата. Како да е штала местово“, вели еден од сопствениците на фирми во близина на паркот.
„Ова не е во ред, тие го загадуваат паркот и околината. Надлежните не преземаат мерки“, вели граѓанин.
Новинарот на Порталб.мк ја посети оваа локација каде го сретна и сопственикот на коњите, и кога му беше кажано дека таму сме за да пишуваме за овој проблем, тој веднаш ги тргна коњите. Рече дека коњите ги донел таму бидејќи никој не ја коси тревата.
За овој проблем контактиравме и со ОЈП „Тетова“, а оттаму рекоа дека во текот на оваа недела ќе се интервенира на таа локација.
Скејтепаркот беше изграден пред пет години од 45 волонтери од невладината „Тоустенд“ од Белгија, дваесетина од невладината „Термокис“ од Косово, како и волонтери од невладината „Демокраси Лаб“ од Тетово. Овој парк постојано е запоставуван од надлежните, а од општествено-културниот простор Тетова постојано апелираа за негово одржување, па дури и самите помогнаа да се исчисти. Порталб.мк повеќепати известуваше за овој проблем.
