Бугарска државјанка ќе добие кривична пријава за измама, бидејќи ѕвонела по телефон кај две жени од Куманово и Свети Николе и им кажала дека нивните ќерки предизвикале сообраќајќа и дека треба да дадат пари за да им бидат извршени хируршки интервенции, информираат од Министерството за внатрешни работи (МВР).
„Одделот за криминалистичка полиција при БЈБ – Сектор за општ и насилен криминал во соработка со СВР Куманово, СВР Скопје и ОВР Свети Николе расчисти две кривични дела „измама“ извршени на 29.11.2023 и 10.12.2023 врз две жени од Куманово и Свети Николе и ќе поднесе кривична пријава против В.Е.И.(58) од Република Бугарија поради сомнение дека ги извршила делата“, информираат од МВР.
Од полицијата велат дека осомничената ги сторила делата на тој начин што се јавувала кај оштетените и им кажувала дека нивните ќерки предизвикале сообраќајни несреќи и дека се наоѓаат во тешка состојба и затоа требале да дадат одредена сума на пари на лекар за да им бидат извршени хируршки интервенции.
„На 03.01.2024 во 18.45 часот на Граничниот премин „Деве Баир“, полициски службеници ја лишиле од слобода В.Е.И., по што била пренесена во СВР Куманово, каде што бил извршен службен разговор со неа“, стои во соопштението на МВР.
