Претседателот на Република Македонија, Ѓорге Иванов, вчера се сретна со Даниел Митов, министер за надворешни работи на Република Бугарија.
На средбата беа разменети мислења и информации за актуелните политичко-економски состојби во двете земји, како и за севкупните состојби во регионот, со посебен нагласок на предизвиците поврзани со стабилноста, безбедноста и со евроатлантските процеси.
„Информирајќи го Митов за актуелната политичка состојба во Република Македонија, претседателот Иванов истакна дека е неопходно сите политички фактори да дејствуваат одговорно, да се ангажираат во конструктивен дијалог во насока на институционално решавање на сите предизвици, во согласност со Уставот и со законите на Република Македонија. Во тој контекст, македонскиот претседател укажа на последиците од состојбата статус кво со македонските евроинтеграции, кои излегуваат на површина во моменталната политичко-безбедносна состојба во Република Македонија. Двајцата соговорници констатираа дека е потребно јасно и категорично ангажирање на Европската унија во процесот на стабилизација на земјата и продолжување со европските и со евроатлантските интеграции. Претседателот Иванов и министерот Митов го потврдија заемниот интерес за унапредување на политичкиот дијалог на високо ниво. Заедничка констатација е дека постои интерес меѓу двете земји за надминување на предизвиците и за понатамошно зајакнување на билатералните односи. Претседателот Иванов ги потврди заложбите за понатамошен дијалог и продолжување со работа на групите за усогласување на Договорот за добрососедство, пријателство и за соработка, притоа реафирмирајќи ја определбата на Република Македонија за најдобри можни односи и соработка со сите соседи, како врвна стратегиска цел, покрај евроатлантските интеграции и регионалната соработка“, стои во соопштението од кабинетот на претседателот.