Основното јавно обвинителство Скопје информираше оти е донесена Наредба за спроведување истражна постапка против едно лице за кое постои основано сомнение дека сторило кривично дело – Тешки дела против безбедноста на луѓето и имотот во сообраќајот според член 300 став 2 во врска со член 297 став 1.
Како што соопштија од обвинителството, осомничениот 42-годишник од Скопје во саботата на улицата „Јордан Мијалков“ во главниот град управувал мобилна машина – багер „Лиебхерр“ без да се придржува кон прописите на јавниот сообраќај и со тоа го довел во опасност животот на луѓето.
На обележан пешачки премин, осомничениот со машината удрил во телото на жена-пешак, која од ударот се здобила со тешки телесни повреди и починала.
„Непосредно по настанот, јавен обвинител изврши увид на лице место и издаде повеќе наредби со цел да се испитаат сите околности и да се утврдат причините за сообраќајната несреќа. По еден дел од наредбите сè уште се постапува“, велат од Јавното обвинителство.
Од таму додаваат дека за осомничениот е поднесен предлог за определување мерки на претпазливост – забрана за напуштање на живеалиштe, обврска повремено да се јавува кај определено службено лице или надлежен државен орган, привремено одземање на патната исправа и на возачката дозвола, како и привремена забрана да презема определени работни активности кои се поврзани со кривичното дело.
Почина шеесет и шестгодишна жена по удар од багер во центарот на Скопје