Клучниот ирачки град Рамади следните неколку дена би можел да падне во рацете на Исламска држава, јавуваат локални претставници, кои молат за помош.
Еден од претставниците на градот за „Си-Ен-Ен“ изјави дека не знае уште колку владините сили можат да ги држат џихадистите надвор од границите на градот. Борбите се интензивирале во последните неколку дена, а градските власти побараа помош од ирачката влада и од коалицијата што ја водат САД.
Апелот за помош доаѓа само еден ден откако ирачкиот премиер Хајдер ал-Абади се сретна со Барак Обама и побара поголема поддршка за борбата против џихадистите.
Градскиот претставник соопшти дека во изминатите три дена џихадистите направиле значаен напредок во три подрачја источно од Рамади – Албу Соди, Албу Ганем и делови од Соуфи. Некои од граѓаните по овој напредок одлучиле да го напуштат градот.
