Претседателот на ВМРО-ДПМНЕ, Никола Груевски, денеска се сретна со европратеникот Кнут Фленкенштајн.
На средбата, според соопштението од владејачката партија, соговорниците разговарале за актуелните состојби во државата, одржувањето на изборите, како и за европските перспективи на Република Македонија.
„Претседателот на ВМРО-ДПМНЕ, Груевски, истакна дека единствен начин за излез од политичката криза е одржување на престојните избори на кои граѓаните ќе може да одлучат за сопствената иднина, базирана врз конкретна програма и проекти што ќе бидат понудени и се приоритет за ВМРО-ДПМНЕ. Груевски посочи дека ВМРО-ДПМНЕ е посветена кон понуда на проекти кои ќе гарантираат напредок и продолжување на борбата за подобар стандард за грааѓните. Претседателот на ВМРО-ДПМНЕ истакна дека е потребна посветеност и одговорно однесување на сите субјекти во градењето атмосфера за веродостојни и демократски избори. Во однос на европските перспективи, Груевски посочи дека за ВМРО-ДПМНЕ членството во Европската Унија е стратешки интерес и дека ќе се продолжи со напорите за придвижување на состојбите на тој план преку активна реализација на мерките и чекорите предвидени со акцискиот план“, стои во партиското соопштение.