Освен што јавноста продолжува да се потсмева со начинот на кој се изведени велосипедските патеки во Тетово, проблемот лежи во фактот што тие уште повеќе ќе го отежнат нормалното функционирање на јавниот превоз. Според експертот за сообраќај Блерим Неими, патеките имаат низа други професионални проблеми. Од СВР соопштија дека по завршување на проектот, нема да се дозволи блокирање на патеките од возилата. Општина Тетово како „топ тајна“ ја чува компанијата што работела на овие патеки, пишува Порталб.мк.
Изминативе денови на социјалните мрежи кружеа разни фотографии преку кои се иронизира со новите велосипедски патеки во Тетово и начинот на кој тие се изведени. Фотографиите беа објавени и во некои медиуми од Албанија и на некои меѓународни страници на Фејсбук.
Професорот за патен сообраќај во средното училиште „Моша Пијаде“ во Тетово, Блерим Неими за Порталб.мк направи анализа на новите велосипедски патеки. Тој посочи дека велосипедската патека не е направена во согласност со стандардите на патната инфраструктура.
„Велосипедската патека пред сè не е во стандардите на патната инфраструктура, и не се реализира врз основа на просторното планирање на патот. За жал, ова е многу смешно и многу аматерска работа“, рече Блерим Неими, професор по патен сообраќај.
Според него, покрај десетици други тешкотии со кои ќе се соочи нормалното функционирање на јавниот превоз во Тетово, велосипедските патеки ќе го отежнат уште повеќе.
„Велосипедските патеки сега дополнително ќе го отежнат градскиот јавен превоз, ќе го намалат бројот на паркинзи и ова ќе го направи сообраќајниот хаос во овој град уште полош“, додаде Неими.
Тој, меѓу другото, посочи дека со овие велосипедски патеки очигледно е дека „локалната самоуправа прави планови кои се меѓусебно контрадикторни. Алудирајќи дека не може да има редовно функционирање на јавниот превоз, со дополнително стеснување на улиците.
Според него, единственото решение за велосипедски патеки во Општина Тетово, имајќи ја предвид патната инфраструктура и сè друго, би било „да се консумира – зеленилото што ги дели улиците“.
Покрај горенаведениот инфраструктурен дел, новинарот на Порталб.мк денес фотографираше низа пречки токму на велосипедските патеки, за што од Секторот за внатрешни работи и Општина Тетово се оправдуваат.
За автомобилите што се паркирани на места веќе резервирани за велосипеди, Фатмир Реџепи, портпарол на Секторот за внатрешни работи Тетово истакна дека тоа ќе се спречи со поставување блокади за да се спречи паркирање на автомобили, а најави и казни за невнимателните возачи.
„Предвидено е да се постават блокади на велосипедските патеки кои ќе спречат паркирање на автомобили, ќе бидат поставени сообраќајни знаци дека има велосипедски патеки, откако сето ова ќе биде завршено и де јуре ќе бидат пуштени во употреба велосипедските патеки, ние како Сектор за работа на внатрешни работи во Тетово ќе преземеме мерки за автомобилите да не го блокираат резервираниот дел за велосипеди“, рече Фатмир Реџепи, портпарол на Секторот за внатрешни работи (СВР) во Тетово.
Во членот 66 од Законот за безбедност во сообраќајот, е наведено дека возачите кои ќе се паркираат на велосипедски патеки ќе бидат казнети со глоба од 180 евра.
Освен паркираните возила, на велосипедските патеки имаше и контејнери кои го блокираа слободното движење на велосипедистите, за ова, Елмир Мустафаи од Општина Тетово истакна дека за контејнерите ќе се најде друго место.
„Чекаме да се најдат места, некаде има место за контејнери, а некаде нема. ќе треба да се постават таканаречените џебови на тротоарите, со цел контејнерите да бидат отстранети од велосипедската патека“, рече Елмир Мустафаи од Општина Тетово.
Сомнежи за реалната цена на оваа патека
Станува збор за вкупно 5,5 километри велосипедска патека, која е широка 1 метар, на улицата „Илинден“ и чини 3 милиони денари или околу 50.000 евра.
Архитектот и активист Хамди Сулемани направи анализа за тоа колку според неговата математика е реалната цена за 5,5 километри велосипедска патека, во формата во која е реализирана.
Според неговите пресметки, кои можете да ги видите во целост со кликнување ТУКА, реалната цена на велосипедските патеки во Тетово е 18.396 евра.
„Црвена боја – 10.060 евра. Бела боја – 853 евра. Работна сила – 6.943 евра. Вкупно – 18.396 евра. 1 м2 = (18.396 еу: 6.100 м2) = 3.015 евра / м2 “, пишува Сулемани; целосната анализа може да ја видите со кликнување тука.
Општина Тетово ја чува како „топ тајна“ компанијата што го добила тендерот и во моментов работи на реализација на велосипедски патеки во Тетово. Тие не сакаат да коментираат за цената, која според активистите е висока.
Инаку, овој проект сè уште не е завршен, во наредните денови се очекува да се стават блокади со столпчиња за да се спречи паркирање на автомобили, да се реализираат таканаречените „џебови“ на улиците, каде ќе бидат поставени контејнерите, а ќе бидат поставени потребните знаци.
