Компаниите за социјални медиуми, вклучувајќи ги и Гугл и Фејсбук, беа повикани од ЕУ „веднаш“ да започнат со етикетирање на содржините и фотографиите генерирани од вештачка интелигенција, како дел од низата чекори за борба против лажните вести и дезинформациите што доаѓаат од Русија, јавува „Гардијан“.
Во исто време, ЕУ ја предупреди платформата Твитер дека ќе се соочи со брзи санкции доколку не се усогласи со новите закони за дигитална содржина кои на 25 август стапуваат на сила во целиот блок.
Компанијата во сопственост на милијардерот Илон Маск се откажа од доброволниот кодекс на ЕУ за дезинформации и може да биде казнета со до 6 отсто од нејзиниот глобален приход или дури да биде забранета низ ЕУ доколку не функционира според Законот за дигитални услуги на Унијата.
Како дел од пошироките напори за борба против руските дезинформации, ЕУ побара од Фејсбук и останатите платформи да вложат повеќе ресурси за проверка на факти во содржините на малцинските јазици и во источна Европа, каде што руските дезинформациски кампањи се сметаат за закана.
„Ова не е вообичаена работа – она што го сакаат Русите е да ја поткопаат поддршката на јавното мислење на нашите граѓани во однос на поддршката кон Украина. Ние едноставно мораме да ги браниме нашите интереси, нашата демократија“, рече потпретседателката на Европската Комисија, Вера Јурова, објавувајќи го новиот пакет.
Европската Унија се смета за лидер во регулирањето на технолошките компании и во моментов развива посебни закони за вештачка интелигенција со посебен кодекс договорен од 44 технолошки компании, меѓу кои и ТикТок и Јутјуб.
Овој напис е изработен во рамките на проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.
