Потрошувачите, заедниците на сопственици на станови и управителите да проверат дали зградите се подготвени за грејната сезона 2023/2024, апелираше денеска ЕСМ-Снабдување со топлина. Од компанијата повикаа потрошувачите да ги завршат интервенциите на внатрешната грејна инсталација, да овозможат пристап до топлинските станици и да обезбедат довод на електрична енергија во подстаницата за да може испораката на топлинска енергија преку системот за централно греење да се одвива непречено по почетокот на грејната сезона.
Согласно законските прописи, грејната сезона може да започне од 1 Октомври доколку прогнозираната средна надворешна температура за наредниот ден е еднаква или помала од 12 Целзиусови степени според податоците од Управата за хидрометеоролошки работи.
„За да може грејната сезона во објектите кои се приклучени на системот за централно греење да стартува навремено и испораката на топлинска енергија да се одвива непречено, потребно е потрошувачите да ги завршат интервенциите на внатрешната инсталација. За сите неопходни информации или пријави за одредени интервенции, потрошувачите може да се јават во нашиот Центар за грижа за потрошувачи на телефонските броеви 023076200 и 075400100 а подетални информации за моментално затворените објекти може да се добијат и на веб страната на ЕСМ Снабдување со топлина на линкот Затворени објекти – ЕСМ Снабдување (esm-snabduvanje.mk)“, информираат од ЕСМ-Снабдување со топлина.