Протеински јогурт увезен од Република Србија и млеко од една домашна млекарница покажале присуство на афлатоксин над дозволената граница, информираше денеска Цветан Трипуновски, претседател на комисија за земјоделство, шумарство и водостопанство на ВМРО-ДПМНЕ. Тој пред една недела тврдеше и дека 20 тони канцерогено трајно млеко било увезено од Србија и завршило на полиците низ маркетите од земјава.
„Овие документи се уште еден показател дека контролата на млекото и млечните производи, како домашни, така и од увоз, АХВ не ги прави согласно потребите да ги заштити граѓаните од злоупотреби. Сакам да нотирам и дека Националниот систем за брзо известување не функционира, односно вакви известувања не се нотирано, рече Трипуновски.
Агенцијата за храна и ветеринарство ги демантираше наводите на Трупуновски и информира дека тој неосновано шири паника и ги доведува граѓаните во заблуда. Од Агенцијата велат дека по проверка на мостри на граничен премин било пронајдено млеко со сомнителен квалитет, но тоа било вратено во Србија, согласно со законските процедури.
