Претседателот на Собранието на Република Северна Македонија, Талат Џафери, денеска оствари работна средба со Рејчел Галовеј, амбасадорка на Обединетото Кралство на Велика Британија и Северна Ирска во Република Северна Македонија, информираат од Собранието.
Амбасадорката Галовеј на својот профил на Твитер напиша дека со собранискиот спикер разговарала за законот за антидискриминација, законот за заштита од родово засновано насилство и за новите кривични дела што се дефинирани во нацрт-Кривичниот законик, кои се важни за заштита на човековите права и демократијата во Македонија.
I met Parliament Speaker Talat Xhaferi today & discussed the Anti-discrimination Law, the Law on Protection against GBV & new crimes that are defined in the draft Criminal Law. These are important for protection of human rights & democracy in North Macedonia. @SobranieRSM pic.twitter.com/6LcyYRO3ba
— Amb Rachel Galloway (@RGallowayUK) November 30, 2020
Собранискиот спикер Џафери ја запознал амбасадорката со сите преземени мерки од страна на Собранието за заштита на пратениците и собраниските служби од вирусот ковид-19, а во однос на спреченоста на пратениците поради изолација и самоизолација да учествуваат во парламентарната работа, тој информирал дека се прават напори Собранието да изнајде заедничко прифатливо решение со опозицијата за работа и гласање од далечина, со цел непречено функционирање на законодавниот дом.
Претседателот Џафери истакнал дека Република Северна Македонија, како најнова полноправна членка во НАТО, е спремна во иднина да соработува заедно со британските колеги, на рамноправна основа преку ПС на НАТО, со што ќе придонесат за колективната стабилност и глобалната безбедност.
Соговорниците изразиле задоволство од успешната имплементација на проектите на Вестминстерската фондација во Собранието, особено од функционирањето на Проектот за поддршка на буџетската канцеларија, која изготвува квалитетни анализи за буџетот, како за потребите на парламентарното мнозинство така и за опозицијата, известија од Собранието.
Во однос на билатералната соработка меѓу двете земји, соговорниците взаемно изразиле надеж дека таа ќе продолжи да се надградува и во наредниот период, особено на ниво на Пратенички групи за соработка, кои неодамна се формираа во Собранието.