Корупцијата „ги изеде“ парите од ЕУ, a непотизмот и понатаму владее. Изговорите го заземаа местото на реформите и затоа сега Унијата чека на Македонија, а не обратно. Вака холандскиот амбасадор во земјава испрати остри критики и јасни пораки до надлежните во земјава, на регионалната експертска конференција за Кластер 1 „Основни вредности“, во рамки на проектот „Правдата нека владее со регионот“.
„Не може во ЕУ, ако ги сакате само парите на ЕУ, а не и вредностите. Што правите вие освен што натрупавте изговори за исполнување на барањата за членство? Зошто вие не ги извршивте потребните реформи пред 15 години како другите земји? Слушам дека Европската Унија е виновна и дека членството е заедничка одговорност, како и тоа дека ние премногу ве оставаме да чекате. Вистината е дека членството е ваша одговорност и вие нè оставате нас да ве чекаме премногу. По децении огромна поддршка, каде отидоа парите на нашите даночни обврзници?“, праша амбасадорот.
Ова не е прв пат амбасадорот Јан Коп да упатува сериозни критики за реформските процеси во земјава. Тој и претходно има изјавено дека недостига политичка волја.
Денеска пред присутните се обрати и вицепремиерката Грковска, која зборуваше за влијанијата во правосудството, како една од најболните точки во реформскиот пат кон ЕУ.
„Обременоста со историја на конфликти и сите надворешни и внатрешни фактори кои на овој или оној начин профитираат од тој наратив, и денеска се сопирачка која ги отежнува позитивните процеси кон кои сме насочени. Од позицијата на која сум, добро знам кои се болните точки и колку е тешко тие да се надминуваат во услови на константни и комбинирани кризи“, рече Грковска.
