Премиерот што ќе ја раководи владата во периодот од 100 дена пред изборите, закажани за 24 април следната година, а ќе биде номиниран од ВМРО-ДПМНЕ, нема да биде функционер на партијата кој во моментот извршува каква било политичка функција, изјави Илија Димовски, во интервју за телевизијата „Канал 5“.
„Партијата ќе си постапува врз база на статурните одлуки и ќе одлучи кој ќе биде тој човек што ќе ја раководи владата во тие 100 дена. Но, можам да потврдам дека ниту еден функционер од ВМРО-ДПМНЕ на министерска, пратеничка или значајна политичка функција што сега извршува таква функција нема да биде тоа, односно тоа ќе биде лице што не извршува таква функција“, изјави Димовски во интервјуто.
Инаку, како што соопшти премиерот Никола Груевски, синоќа, во согласност со постигнатиот договор, станува збор за системско решение, односно отсега па за сите наредни парламентарни избори, 100 дена пред изборите, владата ќе се повлече и ќе се формира влада за спроведување на изборите.
