Група епидемиолози од Институтот за јавно здравје во Скопје денеска се во Штип, во увид на состојбата, откако деновиве се појавија нови случаи на заболени од Kовид-19, со жариште во текстилна фабрика. Во Центарот за јавно здравје во Штип денеска се евидентирани девет нови случаи до 12 часот, додека во евиденцијата на Министерството за здравство, според вчерашните тестирања, има 4 новозаболени лица, од кои две се текстилни работнички. Над 130 граѓани се во изолација.
На лекување на Инфективното одделение на Клиничката болница во Штип се девет пациенти.
„Денеска ќе бидат прегледани новите девет заболени, по што инфектолозите ќе одлучат дали ќе задржат некои од нив на болничко лекување“, изјави Ален Ѓеоргијев, директор на Клиничката болница од Штип.
Во меѓувреме, ангажирани се сите ресурси на општината, со цел, како што рече градоначалникот Благој Бочварски, вирусот да не се прошири во другите текстилни фабрики. Со истиот автобус со кој се превезувале заболените конфекционерки, се возеле работници на уште три конфекции. Засега заболените доаѓаат од една конфекција, која веќе три дена е затворена.
„Стапивме во контакт со сопственици на конфекции и списоците на работници се предадени на епидемиолозите, точно е утврдно кои работници, како се превезувале. Станува збор за три конфекции, чии работници се возеле во ист автобус. За очекување е дека ќе се појават нови случаи, но се надевам дека ќе се затвори кругот. За жал, во последно време не се почитуваа мерките, но, тоа е единствена заштита и мерките мора да се почитуваат“, рече Бочварски на денешната прес-конференција.
Прашан за можните сценарија во случај на зголемување на бројот на заболени, тој рече дека се уште нема рапидно зголемување на бројот, а појавување на новите случаи е опомена да не се опуштаме.
„Кризниот штаб ќе ја следи состојбата и со сериозен ангажман ќе настојува да се затвори кругот,“ кажа Бочварски.
По информациите дека фабричките авотбуси и натаму се полни, без одржување на социјална дистанца, надлежните очекувањата дека превозниците крајно сериозно ќе пријдат кон својата работа, бидејќи и од нивното и однесувањето на работниците зависи дали ќе растат бројките.
