По вчерашниот спонтан собир на граѓани пред Владата, за денеска во 16 часот преку социјалните мрежи е најавен нов протест, пред зградата на Илинденска бр.2, на кој граѓаните ќе го искажат својот револт од содржината на снимките кои вчера на прес-конференција ги презентираше лидерот на опозицијата, Зоран Заев.
Граѓаните, како што е најавено на социјалните мрежи, ќе протестираат против полициската бруталност и повторно ќе биде актуелизрано барањето од протестите во 2011 година, односно оставка на министерката за внатрешни работи, Гордана Јанкулоска и на портпаролот на МВР, Иво Котевски, по убиството на младиот Мартин Нешковски на плоштадот Македонија.
Вчера, кратко време по завршувањето на прес-конференцијата на СДСМ, неколку десетини граѓани се собраа пред владината зграда за, како што рекоа, да го изразат својот револт и згрозеноста од она што го чуле на аудиоснимките.
Тие на заштитната ограда пред Владата закачија транспаренти на кои беше испишано „убијци“, „садисти“ и „психопати“.
Со транспаренти со истите натписи, граѓаните ги повикуваа оние кои минуваа со автомобили да им се приклучат, а откако бројот на присутни се зголеми, насобраните го блокираа сообраќајот на едната од лентите на булеварот.