Министерот за внатрешни работи, Митко Чавков, денеска изјави дека полицијата темелно го истражува случајот со експлозијата во Куманово денеска.
– Според првичните информации, излезени се увидни екипи, причинета е незначителна материјална штета, но станува збор за кривично дело кое многу интензивно и темелно ќе го истражуваме за да утврдиме кои се сторителите и мотивите за тоа – рече Чавков.
Министерот соопшти дека увидните екипи собрале соодветни материјали за вештачење и изрази надеж дека наскоро ќе има други показатели и информации што ќе бидат од полза за понатамошниот тек на истрагата.
Утринава во 04.29 часот, експлозија одекна кај тунелот што ги поврзува градскиот плоштад со паркиралиште со кое стопанисува приватна компанија.
Одговарајќи на новинарско прашање во врска со пишувањата за можна ескалација на ситуацијата во Македонија, Чавков рече дека внимателно се следат сите состојби во државата и додаде дека индикатори за загрозување на безбедносната состојба има не само во Македонија, туку и во другите делови од ЕУ и пошироко.
– Оперативното ниво останува подигнато со оглед на тоа што е и туристичка сезона. Мислам дека успеавме да ја одржуваме јавната безбедност на соодветно ниво – изјави Чавков.