Инспектори од мобилните тимови при Царинската управа, на граничниот премин Богородица заплениле 98.000 евра од македонски државјанин кој се обидел нелегално да ги изнесе од државата, информираа од управата.
„На 26 јули околу 21 часот на излез од државата се пријавил автобус со турски регистарски ознаки кој сообраќал на редовна линија Гостивар – Истанбул. При контрола на автобусот и патнците, во лична ташна на еден од патниците царинските инспектори откриле непријавени 4 пакувања обвиткани со црн најлон и селотејп трака во кои се наоѓале вкупно 100.000 евра. Согласно Законот за девизно работење, на патникот вратени му се 2.000 евра – износ што резидент може да го изнесе без да го пријави, а останатите 98.000 евра се привремено одземени“, информираат од Царина.
Против лицето е поднесена соодветна пријава до надлежниот Основен суд.
