Фудбалерот на Баерн од Минхен, Жером Боатенг, откри дека на почетокот на сезонава ја одбил понудата на Барселона.
Каталонскиот клуб минатото лето сакаше да ја зајакне одбраната, а една од желбите на Барселона беше токму Боатенг. Сепак, тој одлучил да остане во Баерн.
– Не знам детали, не знам колку Барселона понудила за мене, но вистина е дека сакаа да ме донесат. Особено ми ласка кога клуб како што е Барселона се интересира за мене, но дојде време кога не се напушта Баерн и не се заминува во Барселона само за да се освои Лигата на шампионите – вели Боатенг, додавајќи дека игра за еден од четирите најдобри клубови во светот.
Боатенг има договор со Баерн до 2018 година, а на арената „Алијанц“ пристигна во 2011 година од Манчестер Сити. Досега во дресот на шампионот на Бундес-лигата одигра повеќе од 150 натпревари.