Филмот „Музеите на Битола“, во кој е преточено музејското богатство на градот на конзулите, синоќа во археолошкиот локалитет Магаза беше прикажан пред битолчани како дел од културното лето „Битфест“ .
Историчари, етнолози, археолози и туристички водичи од градот зборуваа за музеите и за музејски поставки во Битола и во поширокиот регион, зборуваа за културното богатство и за знаменитостите на Битола, почнувајќи од Заводот и Музеј, Спомен-собата на Мусфата Кемал Ататурк, спомен-куќите на Гоце Делчев и на Стив Наумов, Музејот на албанската азбука, Музејот посветен на Евреите, Музејот „Вагнер Лала“, Хераклеја Линкестис, па сè до авто и етномузејот во битолското село Крклино. Во овој докуметарен филм беше истакнато дека Битола е музеј на отворено, со една од најубавите улици на Балканот, Широк сокак, и со амбиент на Старата битолска чаршија.
– Филмот има цел да го прикаже непроценливото музејско богатство на Битола, бидејќи Битола е еден вистински музеј под отворено небо во кој една по друга се преплетуваат формалните и неформалните музејски поставки – рече режисерката на филмот, Анета Шијакова, новинарка по професија.
Сценариото го изработи Каролина Николоска.
А.Б.
