По неколкугодишните обвинувања од невладината организација „Арсена“ дека водата за пиење во Гевгелија е загадена, Општина Гевгелија објави тендер за изградба на нов водоснабдителен систем во градот.

Се обидовме телефонски да го добиеме градоначалникот Иван Франгов, за да ни објасни од која прична се градат нови бунари кога, според неговите претходни изјави, сè е во ред со старите, но тој не одговори на нашите телефонски повици.

Како што пишува во огласот објавен на веб-страницата на Општината, водоснабдителниот систем ќе се гради со кредит од Светска банка и со грант од ИПА-програмата.

Со проектот е предвидено да се изградат два нови бунари кај реката Вардар, потисен цевковод и резервоар на Мрзенски рид.

Проценетата вредност на водоснабдителниот систем изнесува 105.258.839 денари, од кои 70.738.500 денари се обезбедени од Светската банка, додека 260.000 евра се грант од европските ИПА-фондови.

Понудите од заинтересираните компании треба да се достават најдоцна до 4 октомври.

Изградбата на новиот водоснабдителен систем во Гевгелија доаѓа по долгогодишните критики на невладините организации дека водата за пиење во Гевгелија содржи високи количества на арсен.

Од граѓанската иницијатива „Арсена“ во јули годинава ја објавија анализата на примерок вода од гевгелискиот водовод, која покажа присуство на енормни количества арсен, но и на тешкиот метал ванадиум.

„Само пред еден месец концентрацијата на арсен беше 21,3 микрограми на еден литар вода, а сега е 19,7 микрограми што е и понатаму за 97 отсто повисоко од здравствено пропишаните норми за употреба на водата од страна на човекот“, информираа тогаш од „Арсена“.

Градоначалникот на овие обвинувања рече дека „Сорос и Арсена“ намерно се обидуваат да го уништат угледот на Општината.