Хакерската група „Анонимуси“ објави видеозапис во кој се заканува дека на 7 април ќе изврши „електронски холокауст“ и ќе го избрише Израел од кибер-просторот.
Како што јавуваат светските медиуми, мета на нападите на „Анонимуси“ ќе бидат серверите и интернет-страниците кои ѝ припаѓаат на еврејската држава, израелската армија и на банките.
– Се враќаме за повторно да ве казниме за вашите злосторства на палестинските територии – се вели во видеопораката.
Хакерската група го обвинува официјален Тел Авив за кршење на човековите права, илегално населување, убивање цивили и за непочитување на меѓународното право, а поради тоа, во знак на солидарност со палестинскиот народ, ќе го збришат Израел од интернет-просторот.
