Институтот за белодробни заболувања кај децата „Козле“ – Скопје прераснува во Универзитетска клиника за респираторни заболувања кај децата Козле – Скопје, чијашто дејност се проширува со вршење специјалистичко-консултативна и болничка здравствена заштита и здравствена дејност на терцијарно ниво од областа на респираторните заболувања кај децата и цистичната фиброза, изведување образовна дејност, вршење усовршување на здравствените работници и научно- истражувачка дејност.
Премиерот Димитар Ковачевски денеска присуствуваше и се обрати на настан по повод промената на дејноста, видот и називот на институцијата. Тој посочи дека ваквата измена е направена со владина одлука.
„Вештините и искуството на здравствените работници во оваа клиника која е препознаена како регионален лидер во областа на педијатриската пулмологија и алергологија, низ годините и децениите покажаа што значи со посветеност и пожртвуваност да се помага на болните деца, на изнемоштените, на најмалите, на нашите најсакани, на оние кои надежта ја бараат во медицинскиот персонал кој е дел од оваа установа“, изјави премиерот Ковачевски.
Тој посочи дека оваа јавна здравствена установа повеќе од 70 години претставува симбол на професионална здравствена нега и грижа за децата.
