Претседателот на Република Македонија, Ѓорге Иванов, денеска го прими претседавачот на Воениот комитет на Европска Унија, генерал Патрик де Роусиерс.
На средбата, Иванов и Де Роусиерс разговарале за македонските евроатлантски интеграции, учеството на АРМ во борбените групи предводени од Европскаа Унија, како и за унапредувањето на натамошната соработка на Република Македонија во рамки на заедничката надворешна и безбедносна политика и на заедничката безбедносна и одбранбена политика на Унијата.
Претседателот Иванов истакнал дека Република Македонија е целосно посветена на членството во Европска Унија и во НАТО и додал дека нашата држава дава значаен придонес за мирот, безбедноста и за стабилноста како во нашиот регион, така и надвор од него. Македонскиот претседател, во тој контекст, го истакнал учеството на АРМ во мировните мисии на ЕУ и на НАТО и порачал дека нашата поддршка ќе продолжи и во иднина.
Генералот Де Роусиерс изразил благодарност за придонесот и за активното учество на АРМ во европската безбедносна и одбранбена политика и го истакнал учеството на припадниците на АРМ во рамките на мисијата на ЕУ, „Алтеа“, во Босна и Херцеговина, и во борбените групи на ЕУ од 2012 и од 2014 година.
Генералот Роусиерс ја истакнал потребата од натамошно унапредување на соработка со Република Македонија, како дел од соработка помеѓу Европската Унија и земјите-партнери меѓу кои е и нашата држава.
