Фабриката „Југохром“ од Тетово, поради високото ниво на загадување на воздухот, соопшти дека од 31 декември до февруари следната година ќе го прекине производството.
„Имајќи слух за моменталната ситуација со загадувањето во Тетово, иако менаџментот на фабриката е на ставот дека „Југохром“ во стечај не е единствениот, а уште помалку најголемиот загадувач во регионот, донесе одлука за доброволно исклучување на двете печки кои се во функција, односно целосно затворање на производствениот капацитет. Прекинувањето на производството ќе трае од 31 декември до крајот на февруари следната година, кога, впрочем, и меторолошките услови најмногу влијаат на загадувањето на воздухот“, се вели во соопштението од менаџментот на „Југохром“.
Од фабриката соопштуваат дека ќе продолжат со сите планирани и веќе договорени активности за целосна имплементација на еколошките стандарди во согласност со законските прописи, односно инсталирање на системот за отпрашување во планираниот рок.
