Новиот италијански воз „Фречароса 1000“, кој може да се пофали дека е најбрзиот воз во Европа, почна редовно да сообраќа на линијата помеѓу Милано, Рим и Наполи.
Засега достигнува редовна максимална брзина од 300 километри на час, до декември би требало да вози со 360 километри на час, а теоретски може да достигне и 400 километри на час.
„Фречароса 1000“ почна да сообраќа со шест композиции кои ќе ги покриваат вкупно осумте поаѓања дневно. Од нив, четири ќе одат до Торино, а другите до миланскиот саем „Ро фиера“ поради „Експо 2015“.
Првата композиција е наречена по славниот италијански спринтер Пјетро Менеи и ќе има промотивни возења до 25 април.
Супервозот успева да помине 600 километри оддалеченост помеѓу Милано и Рим за два часа и 15 минути, што е за 45 минути помалку од досегашниот воз, кој патува со голема брзина.
