Премиерот Зоран Заев на денешната собраниска седница ја соопшти листата со кандидати за заменици министри и кажа дека станува збор за истакнати личности, професионалци и политичари.
– Новата влада ќе биде насочена кон реформите и кон водење инклузивен процес преку вклучување на опозицијата, граѓаните, академската заедница. Активностите се насочени кон реформи и кон унапредување на севкупниот живот на граѓаните во Македонија. Луѓето што се предложени знаат дека ќе добијат одговорна задача и дека треба да ги извршуваат задачите според законите и Уставот заради подобрување на животот на сите граѓани на Македонија – рече Заев.
Антонијо Милошоски од ВМРО-ДПМНЕ во однос на предлозите за заменици министри рече дека најспорен е предлогот за заменик министер за надворешни работи, Арта Точи, која, како што наведе, тврдела дека Западна Македонија треба да припадне на Албанија, а земјата ја ословува со ФИРОМ.
За заменик министер за одбрана е предложен Беким Максути, за внатрешни работи – Агим Нухиу, за правда предложен е Оливер Ристовски, за надворешни работи – Арта Точи, за финансии – Ширете Елези, за економија – Кире Наумов, за шумарство и водостопанство предложен е Власте Димковиќ, за здравство – Гоце Чакаровски, за труд и социјална политика – Елми Назири, за локална самоуправа – Дејан Павлевски, за заменик на министерот Алаѓозовски предложен е Владимир Лазовски, за заменик на министерот за информатичко општество и администрација предложен е Владимир Бајдевски, за транспорт и врски – Ремзи Мехмети и за заменик министер за животна средина и за просторно планирање предложен е Јани Макрадули.