ВМРО-ДПМНЕ: И СДСМ одбегнува да каже на која држава е Заев премиер


       
Скопје, 25 јануари, 2018 - 19:13 (META) 

СДСМ исто како и Зоран Заев одбегнува да каже на која држава е тој премиер, стои во реакцијата на опозициската ВМРО-ДПМНЕ на соопштение на СДСМ, а во врска со вчерашната средба на премиерот Зоран Заев со неговиот грчки колега, Алексис Ципрас во Давос.

„Од што се срами и од што бегаат и СДСМ и Заев? Наместо конкретни одговори и транспарентност, граѓаните на Република Македонија од СДСМ добиваат само метарски соопштенија без суштински информации. Граѓаните на Република Македонија како носители на суверенитетот на државата имаат право да знаат што се крие зад промената на името на автопатот и аеродромот“, стои во соопштението на ВМРО-ДПМНЕ.

Оттаму нагласуваат дека „ВМРО-ДПМНЕ не гледа иредентизам во имињата на аеродромот и автопатот кои СДСМ еднострано ги менува“.

Претходно владејачката партија соопшти дека „откочените процеси“, соопштени јавно по вчерашната средба на премиерите на Македонија, Зоран Заев и на Грција, Алексис Ципрас, носат придобивки за Република Македонија и за сите нејзини граѓани.

„Преку јавни изјави, граѓаните, јавноста, беше точно и навремено информирана за овие придобивки за Република Македонија, како што е деблокадата на процесот на стабилизација и асоцијација на Македонија со ЕУ, блокиран во 2009 година“, стои во соопштението на СДСМ.