Премиерот на Грција, Алексис Ципрас, денеска ќе има телевизиско обраќање до нацијата во врска со завршувањето на финансиската криза на Грција. Ципрас симболички за место од кое ќе и зборува на нацијата го избра островот Итака во Јонското Море, завршницата на познатата „Одисеја“, односно патувањето на Одисеј дома по завршувањето на Тројанската војна.
Поводот е завршувањето на третиот пакет за финансиска помош на Грција од ЕУ и ММФ, по цели осум години строги мерки на штедење.
Во меѓувреме, се очекува најдоцна до утре да се случи „проветрување“ на владиниот кабинет.
Еврокомесарот за финансиски и економски прашања, Пјер Московиси вчера порача дека реформите мора доследно да продолжат, а грчката влада да ги почитува своите обврски и во следниот период.
Претседателот на Европската Комисија, Жан Клод Јункер, пак порача дека секогаш се борел Грција да остане во центарот на вниманието на Европа.
Грчките весници најавувајќи го денешното телевизиско обраќање, посочуваат дека Ципрас се откажал од големи прослави поради 96-темина загинати во пожарите во Атика.
