!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

„Империал тобако“ ќе го зголеми oткупот на тутун за 9 проценти


Скопје, 14 јуни, 2017 - 13:34 (META) 

Тутунската индустрија во Македонија е една од носечките во македонската економија и постојаното инвестирање го зголемува потенцијалот за развој на сите субјекти во синџирот, од производителите до дистрибутерите и до продажбата.

Ова денеска го порача претседателката на управниот одбор на „Империал тобако“ за Јадранскиот Регион, Пиа Барборич-Јурјашевич.

Денеска беше претставена инвестицијата од 1,8 милиони евра во нова, современа производствена линија во фабриката во Скопје, што е втора ваква во целата групација на „Империал тобако“, на глобално ниво.

„Империал тобако“ ТКС е најголемиот производител на цигари на пазарот, а досега извезува повеќе од 40 проценти од вкупното производство, и тоа во Русија и на пет пазари во регионот.

Во 2016 година компанијата откупила околу 2.000 тони квалитетен македонски тутун, додека за оваа година се планира зголемување на откупените количества за околу 9 проценти.


Трошоците за живот се зголемени минимално


Скопје, 7 јуни, 2017 - 14:02 (META) 

Трошоците за животот во мај во споредба со истиот месец лани се зголемиле за 1,2 отсто, објави Државниот завод за статистика.

Минимално зголемување на трошоците има и во однос на претходниот месец, од 0,7 отсто.

Зголемувањето на трошоците е забележано кај свежото и разладеното овошје за 13,2 проценти, свежиот и разладен зеленчук освен компирот за 12,6 проценти, сувото овошје и јаткастите производи за 2,5 проценти, рибата и морските плодови за 1,3 отсто, цигарите за 1,2 отсто и друго.

Во мај, исто така, зголемување на трошоците за животот е забележано и кај авионскиот превоз на патници за 8,7 проценти, болничките услуги за 1,2 отсто, патниот сообраќај за 0,9 отсто и друго.


Македонците пушат по 18-19 цигари дневно, четврти сме во светот


Скопје, 19 април, 2017 - 13:33 (META) 

Македонија е при врвот на листата од 184 земји според потрошувачката на цигари и се наоѓа на високото четврто место. Според табелата на „Википедија“, пред нас се само Црна Гора, Белорусија и Либан.

Според слободна проценка на директорот на пазар за Македонија, Косово и за Албанија на „Империал тобако“, Кирил Величковски, пак, Македонците пушат по 18-19 цигари дневно.

Но, иако нашата држава е високо на листата на држави каде што најмногу се пуши, потрошувачката на цигари во Македонија од 2013 година бележи пад од два до четири отсто годишно.

Според Величковски, тоа се должи на промената на законската регулатива, ценовните политики, здравствениот аспект и на економската моќ на луѓето.

Овој пад е во рамките на европскиот просек, бидејќи во Европа постои пад на консумацијата на тутун во последните 15 години и тоа помеѓу два и шест отсто.

Врз намалување на пушењето, според Величковски, влијание имала и кампањата со фотографии на пакувањата на цигари, кои укажуваат на штетноста од пушењето.

„Имеприал тобако“ во Македонија постои 15 години, има инвестирано околу 33 милиони евра во осовременување на технолошкиот процес и во иновации. Компанијата е најголем производител на пазарот, при што извезува 42,6 проценти од производството и тоа во Русија и на пет пазари во регионот. За оваа година планирано е само извозот на рускиот пазар да достигне 30 отсто од производството.

Во компанијата се произведуваат шест брендови цигари за домашниот пазар со 60-процентен пазарен удел.


„Империал тобако“: Поскапувањето на цигарите беше интерна одлука


Скопје, 19 април, 2017 - 13:14 (META) 

„Врз последното поскапување на цигарите влијаеше пристапот на нашата компанија кон пазарот, нејзино позиционирање и градењето на портфолиото. Во овој случај акцизата не беше фактор кој влијаеше на промената на цената“, одговори директорот за корпоративни и за правни работи на „Империал тобако“, Стеван Вранеш, на новинарско прашање во врска со последното поскапување на дел од цигарите за пет денари.

Тој не одговори дали ќе има ново поскапување на цигарите во јуни, кога според календарот на зголемување на акцизите, повторно треба да поскапат за четири денари.

Вранеш додаде дека кога ќе има зголемување на акцизата, тоа не значи дека цигарите нужно ќе поскапат веднаш, туку поскапувањето може да биде одложено и зависи од одлуките на секоја компанијата.

„Формирањето на малопродажната цена на цигарите е комплексен процес врз кој влијаат повеќе фактори. Освен акцизата, влијаат и цената на тутунот, на материјалите, запазувањето на регулаторна рамка која подразбира приближување кон законите на ЕУ“, изјави Вранеш.


Цигарите ќе поскапат за три денари од 1 јули


Скопје, 28 јуни, 2016 - 11:45 (META) 

Цигарите ќе поскапат за три денари од први јули, како резултат на зголемување на акцизата за три денари по кутија.

Зголемување на цената на цигарите последен пат беше направенo во февруари годинава, кога цигарите поскапеа за пет денари.

Ова поскапување од први јули е за последен пат годинава, а од следната година цигарите ќе поскапуваат за четири денари по кутија.


Полицијата спречила шверц на 1.500 штеки цигари без бандероли


Пехчево, 26 јуни, 2016 - 15:23 (META) 

Полициски екипи од Регионалниот центар за гранични работи Исток, во петокот оваа недела спречиле обид за шверц на поголемо количество цигари без бандероли на границата меѓу Македонија и Бугарија.

Како што соопшти денеска МВР, во петокот, околу 5 часот, во близина на местото Чемериков преслап, во близина на Пехчево, полициски екипи забележале џип без регистарски таблички, кој се движел по земјен пат кон местото Бреза, близу државната граница.

При обидот да го запрат џипот, двете лица што биле во него успеале да побегнат, а возилото го оставиле во близина на границата.

Во џипот, според МВР, биле пронајдени 1.505 штеки цигари од марките „грација делукс“ и „сани слимс“.

По спроведената истрага, полицијата го уапсила О.К. од Берово за кого постојат сомневања дека бил во возилото во кое е пронајдена акцизната стока. По другото лице полицијата сè уште трага.


Сопственичка на фирма од Виница осомничена за фалсификување пари


Виница, 4 декември, 2015 - 14:34 (META) 

Надворешната канцеларија за криминалистички работи Кочани поднела кривична пријава против З.А. (36), која се товари за фалсификување пари, соопшти полицијата.

Осомничената, според полицијата, откако набавила една фалсификувана банкнота од 100 евра, на 30 октомври оваа година ја пуштила во оптек, односно при набавка на цигари за нејзината фирма во Виница на дистрибутерот му платила со лажната банкнота.


Спречен шверц на цигари и на мобилни телефони


Струга, 5 октомври, 2015 - 15:58 (META) 

Девет штеки цигари со албански акцизни маркички се откриени при контрола на автомобил, управуван од албански државјанин, на граничниот премин Ќафасан.

Цигарите се пронајдени во страничните празнини на багажниот простор и под резервната гума на возилото. Тие се привремено задржани, а против лицето е поведена прекршочна постапка.

Истовремено, три нови мобилни телефони „ајфон 6С“ се откриени од мобилните царински тимови при контрола на автомобил, управуван од македонски државјанин, пријавен за влез во државата на истиот граничниот премин.

Мобилните телефони се пронајдени во патна торба, помеѓу личните работи на патник во возилото, исто така македонски државјанин.


Царината заплени 117 литри алкохолни пијалаци без бандероли


Скопје, 31 јули, 2015 - 13:55 (META) 

Околу 117 литри жестоки алкохолни пијалаци без или со странски бандероли, за кои не била платена акциза, заплениле тимовите на Царинската управа и на Упрвата за јавни приходи (УЈП) во заедничка акција што била спроведена во периодот од 27 до 30 јули.

Како што соопштуваат од Царинската управа, контроли биле извршени во педесетина кафе-барови, ресторани, супермаркети и продавници во Велес, Куманово, Охрид, Ресен, Струга, Битола и во Прилеп.

Во 13 од нив, инспекторите на Царината и на УЈП откриле незаконска продажба на алкохолни пијалаци.

„Привремено се задржани околу 117 литри жестоки алкохолни пијалоци без или со странски бандероли за кои не е платена акциза и за кои не постојат документи за потекло и за здравствена исправност. Од нив 69 литри се домашна ракија, а остатокот се различни видoви жестоки алкохолни пијалоци (виски, узо, ракија, ликери)“, стои во соопштението на Царинската управа.

Оттаму додаваат и дека во продавница во Струга, во бункер во подот под пултот за продажба, биле откриени и 23 кутии цигари од марките „марлборо“ и „престиж“, со странски или без бандероли.

„Овие контроли се спроведуваат за да се обезбедат основните принципи за фер конкурентност, правилна наплата на буџетски приходи, но, пред сè, да се заштити здравјето на луѓето. Како резултат на сите мерки поврзани со акцизите што ги презема Царинската управа во континуитет, но и зајакнатите контроли на употребата на акцизните маркички, во периодот од јануари до јули годинава, наплатени се приближно 15 отсто повеќе акциза за тутун и за тутунски производи отколку во истиот период во 2014 година“, велат од Царината, додавајќи дека „акциите за откривање нелегална продажба на акцизна стока ќе продолжат и понатаму“.


500 граѓани се пријавиле во советувалиштата за откажување од пушење


Скопје, 25 јули, 2015 - 10:41 (META) 

Од јуни 2014 до јуни 2015 година, во Центрите за јавно здравје, 500 лица се пријавиле во советувалиштата за откажување од пушење. Половина од пријавените, кои ги посетувале едукативните предавања, биле здравствени работници.

Советувалиштата се достапни  за сите заинтересирани граѓани кои ќе се обратат во Центрите за јавно здравје и во нив работи стручен и обучен кадар од доктор – специјалист и медицинска сестра, а по потреба и други соработници (социјален работник, психолог и др.), кои одржуваат едукативни предавања со фокус на презентирање на штетните ефекти од пушењето врз здравјето на пушачите, како и на штетните влијанија од тутунскиот чад за околината.