!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Тројца падобранци загинаа откако се судриле во воздух


Квинс, 13 октомври, 2017 - 13:34 (META) 

Тројца падобранци загинаа во Квинсленд откако се судрија во воздух, соопшти австралиската полиција.

Итната полош и полиција веднаш биле повикани во местото Бич, јужно од Квинс, каде се случила несреќата.

Како што пренесува „Би-би-си“, загинале двајца мажи на возраст од околу 30 години, како и една 50-годишна жена. Падобранците починале веднаш, соопшти полицијата во Квинсленд.

Според прелиминарнарната истрага, несреќата се случила кога еден падобранец се удрил во другите два, тандем падобранци, поради што падобраните не им се отвориле правилно.


EДС на Анѓушев бара спогодбено раскинување на договорот со МЕПСО


Скопје, 5 октомври, 2017 - 12:52 (META) 

Компанијата „Енерџи деливери солушн“ (ЕДС) побара спогодбено раскинување на договорот со МЕПСО за испорака на електрична енергија за покривање на загубите во електропреносниот систем на Македонија потпишан во декември 2016 година.

Во барањето доставено од компанијата до МЕПСО, стои дека причина за барањето е избегнување на секаков можен сомнеж за судир на интерес по назначувањето на сопственикот на компанијата, Кочо Анѓушев, за вицепремиер задолжен за економски прашања.

„Поради перцепцијата во јавноста дека функцијата заменик-претседател на Владата и позицијата доминантен сопственик во компанијата која испорачува, односно продава електрична енергија на акционерско друштво во државна сопственост, како што е МЕПСО, претставува судир на интерес, бараме договорот да биде спогодбено раскинат и ЕДС ДОО Скопје да биде ослободен за испорака на електрична енергија за ноември 2017 година“, стои во барањето на компанијата доставено до МЕПСО.


Во судир на возови во Полска 28 лица се повредени


Сметово Граничне, 31 август, 2017 - 11:54 (META) 

Во судир на патнички и на товарен воз на северот на Полска, повредени се 28 лица, соопшти денеска Железницата во Полска.

Патничкиот воз налетал на товарна композиција во градот Сметово Граничне.

Од 11 вагони на патничкиот воз, седум излетале од колосекот. Никој од повредените не е во животна опасност.


Полицијата во Рим се судри со мигрантите


Рим, 24 август, 2017 - 12:25 (META) 

Италијанската полиција се судри со мигрантите кои „окупираа“ помал плоштад во Рим, протестирајќи против наредбата да ја напуштат зградата во која се населиле.

Полицијата, со опрема за разбивање демонстранти, употребила водени топови против мигрантите.

Две лица се уапсени, соопшти полицијата, истакнувајќи дека бегалците имале плински боци и дека некои од нив и ги отвориле.

Се наведува дека мигрантите фрлале камења и шишиња на полицијата, а користеле и пепер-спреј.

На телевизиските снимки се гледа како одредени бегалци викаат на полицајците и се обидуваат да ги удрат.


Десет морнари исчезнати по судир на американски воен брод и танкер кај Сингапур


Вашингтон, 21 август, 2017 - 10:50 (META) 

Десет морнари се водат за исчезнати, а пет се повредени откако американски воен брод се судри со танкер за нафта источно од Сингапур, соопшти американската морнарица, потсетувајќи дека ова е втор инцидент на американската морнарица во азиските води за помалку од два месеца.

Американскиот разорувач „Џон С. Мекејн“ се судрил со трговскиот брод „Алник МЦ“ во раните утрински часови, додека се движел кон пристаниште во Сингапур.

„Првите извештаи покажуваат дека оштетена е крмата на бродот Џон С. Мекејн. Во моментов 10 морнари се водат за исчезнати, а пет се повредени“, стои во соопштението.

Четворица од повредените морнари со хеликоптер се пренесени во Сингапур и не се во животна опасност, додека петтиот морнар се здобил со полесни повреди.

Во потрагата по десеттемина морнари учествуваат сингапурски бродови и хеликоптери.

Властите во Малезија соопштија дека несреќата се случила во нивните води во Јужното Кинеско Море и дека нивните екипи исто така учествуваат во потрагата по исчезнатите.

Засега нема знаци дека нафтата се излеала во морето од бродот „Алник МЦ“, кој превезувал 12.000 тони нафта. Бродот има мали оштетувања на предната страна, но над нивото на водата.


Мотоциклист загинал во сообраќајка во Битола


Битола, 25 јули, 2017 - 13:23 (META) 

Во сообраќајна несреќа што се случила вчеравечер во Битола, загинал 40-годишен маж од битолското село Горно Оризари, соопшти СВР Битола.

Несреќата се случила во 20.35 часот, на крстосницата на улиците 8 Септември и  Арон Ароести. Дошло до судир на автомобил „голф 3“ со битолски регистарски таблички, управуван од А.К. (29) од Битола, и мотоцикл „хонда“ со битолски таблички, управуван од И.Г. (40) од селото Горно Оризари. Мотоциклистот од добиените повреди починал веднаш.

Увид извршиле јавен обвинител и екипа од СВР Битола, а телото на загинатиот по наредба на јавен обвинител е предадено за обдукција.


Српска државјанка загина во сообраќајна несреќа кај Удово


Гевгелија, 22 јули, 2017 - 11:52 (META) 

Д.П. (56), државјанка на Србија, утринава загина во сообраќајна несреќа што се случи на автопатот А-1, на делница Удово – Марвинци, наспроти селото Јосифово, соопшти Министерството за внатрешни работи.

Д.П била сопатничка во возилото и починала на местото на несреќата.

Сообраќајката се случила утринава во 9.20 часот, помеѓу автомобил „тојота авенис“ управуван од В.С. од Србија и „пежо 308“ управуван од С.П., исто така од Србија.

Во тек е увид на местото на несреќата, а сообраќајот се пренасочува по локален пат низ село Удово.


Судир меѓу полицијата и демонстрантите пред почетокот на самитот на Г20 во Хамбург


Хамбург, 6 јули, 2017 - 21:40 (META) 

Германската полиција и група демонстранти денеска се судрија на улиците на Хамбург во пресрет на самитот на Г20, кој почнува утре, јавуваат агенциите.

Најмалку едно лице било сериозно повредено во насилствата, а на неколку им била укажана помош на самото место, пренесува „Би-би-си“.

Полицијата интервенирала со водени топови кон групата демонстранти, кои фрлале шишиња и камења кон полициските екипи.

Мерките за безбедност во Хамбург се на високо ниво. Се очекува на антикапиталистичките протести за време на самитот на Г20 да присуствуваат околу 100.000 демонстранти.

Денеска во Хамбург пристигна американскиот претседател Доналд Трамп, кој имал средба со германската канцеларка Ангела Меркел.

На маргините на самитот утре се очекува и средба меѓу Трамп и рускиот претседател Владимир Путин.


Две жртви во сообраќајки во Арачиново и на автопатот Градско – Велес


Скопје, 21 јуни, 2017 - 14:55 (META) 

Две лица ги загубиле животите во сообраќајни незгоди што се случиле вчера, соопшти МВР. Првата сообраќајка се случила околу 17.30 часот, на улицата 1 во селото Арачиново. А.С. (29) од Арачиново, кој управувал со џип „мерцедес“, удрил во С.Ш. (60), кој починал веднаш, и во едно шестгодишно дете, кое било пренесено во Ургентен центар Скопје.

Откако  удрил во пешаците, А.С. избегал, а три часа подоцна се појавил во полициска станица и кажал дека бил нападнат од непознато лице и затоа избегал.

Полицијата извршила увид и работи на расчистување на случајот.

Втората сообраќајка се случила на автопатот Градско – Велес, околу 23 часот. Се судриле автомобил „мазда 626“ со велешки таблички, управуван од Н.З. (19) од Велес, и автомобил „цитроен АХ“ со кумановски таблички, сопственост на кумановец, а управуван од непознато лице, кое го загубило животот. Сепак, полицијата според пронајдената лична карта во возилото, претпоставува дека се работи за Б.С. (42) од кривопаланечкото село Псача.

Телесни повреди добиле сопатниците од возилото „мазда 626“ С.З. (46) и еден 16-годишник, кои со возило на итна медицинска помош биле пренесени во Општа болница Велес, а по укажаната лекарска помош се пуштени на домашно лекување.

Увид извршиле јавен обвинител и екипа од СВР Велес, а по наредба на јавен обвинител над телото на починатиот ќе се врши обдукција во Институтот за судска медицина во Скопје.


Протести во Келн против конвенцијата на ултрадесничарската АФД


Келн, 22 април, 2017 - 18:11 (META) 

Левичарските демонстранти се судрија со германската полиција во Келн, пред почетокот на партиската конвенција на ултрадесничарската Алтернатива за Германија (АФД), пренесува ХРТ. Во судирите, според телевизијата, повредени се двајца полицајци.

Во текот на денот во Келн се очекува да се соберат околу 50.000 демонстранти, кои ќе протестираат против јанкењето на влијанието на АФД.

Членовите на партијата, на конвенцијата треба да ја донесат програмата за следните парламентарни избори и да изберат ново раководство на партијата.

„Како една од водачите на партијата, уверена сум дека мораме да им покажеме на своите гласачи пред регионалните избори, а особено пред парламентарните, дека нашата партија се држи до реалните политички насоки. Не смееме да оставиме празен политички простор за ‘старите’ партии и за нивните прегласни поддржувачи кои само протестираат по улиците“, порачала Фрауке Петри од АФД.

Претставниците на АФД постојано го привлекуваат вниманието во јавноста со контроверзни изјави поврзни со германското минато, особено со периодот на нацизмот, како и со радикалните ставови поврзани со односот кон исламот и кон мигрантите.

Во Келн се распоредени околу 4.000 полицајци, што е најголема полициска акција во овој град од одржувањето на самитот на Г8 во 1999 година.