!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

„Самит 100“: Да испратиме порака за регионално единство


Скопје, 17 октомври, 2017 - 15:25 (META) 

„Самит 100“ е одлична можност за премиерите да дадат конкретна поддршка на бизнис-заедницата, порача премиерот Зоран Заев, на обраќањето на „Самит 100“ за бизнис-лидери на Југоисточна Европа.

Тој додаде дека политичарите треба да ја донесат Европа во регионот бидејќи ако приватниот сектор и бизнис-заедницата одат напред, тогаш и државите ќе постигнат добри економски резултати.

– Работиме на унапредување на регионалната соработка бидејќи Западна Европа ќе нè почитува повеќе ако соработуваме и ако сме сплотени. Потребно е да испратиме порака на единство на регионот – рече Заев и апелираше да се намалат часовите на чекање на граничните премини заради динамичен пораст и развој.

Премиерот на Албанија, Еди Рама, рече дека земјите во регионот треба да соработуваат, а не да си попречуваат. Тој нагласи дека е добро што оваа средба на премиерите не е под ничие посредништво, туку се случила нормално и природно, што не било случај во минатото.

– Овој регион има голем потенцијал, кој не е доволно искористен поради пречките и минатото. Само Балканот може да си го дозволи луксузот на чекање на границите, кое, според некои податоци, изнесува 3.800 години – рече Рама.

Црногорскиот премиер Душко Марковиќ рече дека земјите од Западен Балкан живеат едни до други, но не можат да стигнат едни кај други. Како пример го наведе неговото долго патување до Скопје преку Сараево и Истанбул.

– Макроекономската соработка, структурните реформи и економската соработка се клучни за развој на регионот – рече Марковиќ.

Претседателот на советот на министри на Босна и Херцеговина, Денис Звиздиќ, рече дека стопанствата на земјите од регионот се комплементарни и затоа треба да се намалат царинските пречки за побрз проток на стоки и на луѓе. Порача дека земјите од регионот треба да настапат со заеднички проекти пред европските фондови.


„Самит 100“ и Коморски инвестициски форум потпишаа меморандум за соработка


Скопје, 17 октомври, 2017 - 12:09 (META) 

Во рамките на „Самит 100“, вчера беше потпишан меморандум за соработка помеѓу регионалната платформа „Самит 100“ и Коморскиот инвестициски форум на шест земји од Западен Балкан (WB6 CIF).Форумот е тело за регионална соработка на коморите од Македонија, Србија, Албанија, Косово, Босна и Херцеговина и од Црна Гора и e формиран на маргините на Самитот во Трст за Западен Балкан.

Според потписниците на меморандумот, претседателот на управниот одбор на „Самит 100“, Живко Мукаетов, и претседателот на Стопанската комора на Србија, Марко Чадеж, целта е да се обединат силите од приватниот сектор и силните регионални компании да работат заедно на спроведувањето на договорените проекти од Берлинската иницијатива.

„Годинава во Скопје, регионалната соработка на „Самит 100“ е официјализирана преку потпишување меморандум за меѓусебно разбирање и за соработка на нашата платформа со Коморскиот инвестициски форум на Западен Балкан 6. Меморандумот се однесува на поттикнување на деловната соработка и на унапредување на конкурентноста на регионалната и на националните економии“, рече Мукаетов.

Темите за кои се дискутира на овој самит се продлабочување на поврзаноста во регионот преку соработка, побрза трговија со стоки и со услуги, транспорт, енергија и брендирање на потеклото.

„Сакаме да помогнеме во остварување на тие задачи, придонесувајќи во отстранувањето на царинските бариери, синхронизирање на документацијата, но и синхронизирање на другите процедури. Наша задача е да ја задржиме оваа тема високо на агендата и мислам дека таквата подготвеност сега постои, но не смееме да се опуштиме. Ова е прашање на опстанокот на нашиот регион“, заклучи Чадеж.

Денеска на „Самит 100“ ќе дискутираат премиерот Зоран Заев и премиерите на Албанија, Еди Рама, на Црна Гора, Душко Марковиќ, и претседавачот со советот на министри на Босна и Херцеговина, Денис Звиздиќ.


Пет премиери од регионот и 100 бизнисмени на „Самитот 100“ во Скопје


Скопје, 9 октомври, 2017 - 14:17 (META) 

Шестиот годишен „Самит 100“ за бизнис-лидери од Југоисточна Европа ќе се одржи во Скопје на 16 и 17 октомври. На овој настан ќе учествуваат 100 реномирани бизнис-лидери, пет премиери на држави во регионот – Албанија, Црна Гора, Косово и Хрватска, Македонија – како и претставници од Европската комисија.

Претседателот на управниот одбор на „Самит 100“ и генерален директор на „Алкалоид“, Живко Мукаетов, на прес-конференција рече дека овој настан е уникатен затоа што отвора можности за поврзаност и за искористување на заедничкиот потенцијал на земјите од регионот.

– Гледано во светски рамки, нашите пазари се мали, но обединувајќи ги интересите и капцитетите во заеднички настап, можеме да бидеме сериозно меѓународно конкурентни и истовремено да го свртиме вниманието на глобалниот бизнис кон инвестицискиот потенцијал на земјите од Западен Балкан, Хрватска и од Словенија – изјави Мукаетов.

Проектот „Едисон“ е една од главните теми за која ќе се разговара на овој настан, а истиот предвидува електрификација на регионот, односно поставување на полначи за електрични автомобили во сите земји во регионот.

Мукатов додаде дека од досегашната организација на овој „Самит 100“, произлегол проектот „Феникс“, со кој градежните компании од регионот се здружиле за учество на трети пазари и на просторот на поранешниот СССР.

Програмскиот директор на „Самит 100“, Јелена Радуловиќ, информираше за содржината на панел-дискусиите што ќе се одржат, но како што кажа, целта е да се искористат предностите на заедничкиот настап на регионот во светски рамки за да се забрзаат порастот и развојот на економијата.

Една од целите е намалување и унифицирање на царинските процедури на земјите од регионот кои можат да бидат препознатливи по добрата храна и по туризмот.

– Учесниците ќе имаат можност да дискутираат за важноста на поврзувањето на регионот, слободното движење на стоките и на услугите и за тоа како локалните идеи можат да достигнат глобален успех. Работилниците ќе бидат посветени на енергетиката, економијата базирана на знаење, брендирање на производите од секторот храна, како и на дигитална економија и туризам – изјави Радуловиќ.

На премиерите од регионот ќе им бидат претставени заклучоците, а тие ќе го дадат својот осврт на „Новиот договор за новата доба“, кој воедно е и слоган на овој самит.

Еден од главните говорници е еврокомесарката за транспорт, Виолета Бул, претставници на водечките компании како „Горење“, „Бе-Ем-Ве“, „Подравка“, „Филип Морис“, „Убер“, „Бамби“, но и претставници на Европската банка за обнова и развој, Светска банка и др.


МЗШВ плати 207.000 евра долг за системот за наводнување на Јужно-вардарска Долина


Скопје, 1 септември, 2017 - 15:39 (META) 

Министерството за земјоделство, шумарство и водостопанство денеска плати 207.000 евра заостанат долг, за консултантски услуги за втората фаза од проектот „Програма за наводнување Јужно-вардарска Долина“.

На овој начин, како што информираат од министерството, се откочува реализацијата на проектот, која беше блокирана поради тоа што претходната влада не плаќала редовно за консултантски услуги во изминатите две години.

„Со подмирувањето на долгот овозможивме меѓународниот консултант на проектот да продолжи со работа, а со тоа и да се продолжат активностите за изградба на системите за наводнување во Валандовскиот Регион. Ова е една од повеќето активности преземени за подобрување и за унапредување на соработката со германската кредитна банка за обнова КФВ“, информираат од МЗШВ.

Со овој проект се предвидени реконструкција, рехабилитација и изградба на систем за наводнување од околу 2.000 хектари во регионот на Удово, Јосифово и на Пирава. За реализација на втората фаза од овој проект, предвидени и обезбедени се околу 16 милиони евра, преку кредит од германската банка и од буџетот на МЗШВ.

Проектот Јужно-вардарска Долина е од витално значење за земјоделството во Јужниот Регион и со неговата реализација долгорочно ќе се реши проблемот со обезбедување вода за наводнување во овој регион.


Заев – Шутановац: Соработката на државите во регионот ќе обезбеди економски просперитет


Скопје, 30 август, 2017 - 19:26 (META) 

Премиерот Зоран Заев денеска примил делегација на Демократската странка (ДС) од Србија, предводена од претседателот на партијата, Драган Шутановац.

На средбата, Заев изразил задоволство од брзото надминување на ситуацијата создадена со повлекувањето на дипломатскиот персонал во Амбасадата на Република Србија во Скопје и истакнал дека е договорено двете земји да ги решаваат сите евентуални недоразбирања во меѓусебните односи исклучиво по пат на дијалог.

Претседателот на Демократската странка во Србија, Драган Шутановац, истакнал дека на членовите на ДС ќе им бидат пренесени најдобрите искуства од нивните колеги во Македонија.

Премиерот Заев порачал дека политичките партнери треба секогаш да го имаат предвид интересот на народот во нивната земја, да ги негуваат и да ги афирмираат демократските вредностите што ги застапуваат, како и да имаат меѓусебна соработка што на сите во регионот ќе им обезбеди стабилна и економски просперитетна иднина.


Регионот побара од Хрватска да укине одредби од правилникот за увоз на овошје и зеленчук


Сараево, 7 август, 2017 - 15:06 (META) 

Министерот за земјоделство, шумарство и водостопанство, Љупчо Николовски, надлежните министри од Босна и Херцеговина – Мирко Шаровиќ, од Република Србија – Расим Љајиќ и од Црна Гора – Драгица Секулиќ, на денешниот итен состанок во Сареаво донесоа неколку заклучоци во врска со новиот хрватски правилник за увоз на свежо овошје и зеленчук.

Министрите ја повикуваат Хрватска итно да ги укине дискриминаторските одредби од правилникот, а трошоците за инспекцискиот надзор да се сведат на нивната реална висина.

Воедно министрите потписници бараат оваа недела да се одржи итен состанок со надлежните министри од Хрватска, а при тоа да се има предвид дека секое одложување за наоѓање решение ќе предизвика значителни последици врз производителите од земјите од регионот, со оглед на тоа дека сето ова се случува во период кога има зголемен извоз на сезонско овошје и на зеленчук.

Заклучоците со потпис од сите министри кои присуствуваа на состанокот ќе бидат испратени во Брисел.

Министерите од регионот во решвање на проблемот со Хрватска ја повикаа да се вклучи и Европската Унија.

Меѓу другото, во заклучоците се наведува дека секоја земја сè до решавање на проблемот, за да ги заштити сопствените економски интереси, ќе преземе конкретни мерки и механизми кои смета дека се адекватни.

Македонското Министерството за земјоделство, шумарство и водостопанство веќе достави нота до хрватското Министерство за земјоделство за стопирање на правилникот за контрола при увозот на овошје и зеленчук.


Марковиќ – Заев: Се надеваме дека и Македонија ќе стане членка во НАТО


Подгорица, 2 август, 2017 - 16:22 (META) 

Премиерот Зоран Заев одржа средба со премиерот на Црна Гора, Душко Марковиќ, пред почетокот на Самитот на земјите членки на Јадранската повелба, на кој Македонија претседава и е кодомаќин со Црна Гора.

– Успехот на новата влада за напредок на Македонија е мотивација за регионот. Капацитетите на владата да ги сработи потребните реформи се видливи. Се надеваме дека и Македонија ќе стане членка во НАТО – изјавил Марковиќ.

Црногорскиот премиер истакнал дека имало голема промена во интересот на странските инвеститори за вложувања во Црна Гора откако државата стана членка на НАТО.

– Имаме стабилна влада, која ги обединува сите граѓани и етнички заедници во државата. Енергично работиме на потребните промени, вклучувајки ги сите во општеството. Ги развиваме искрено и динамично добрососедските односи. Со ова, веруваме дека ги отвораме европските перспективи и се надеваме дека ќе бидеме следната членка на НАТО – изјавил Заев.

На Самитот предвидена е и работна сесија на која свои излагања, освен Заев, ќе имаат и премиерите на земјите членки на Јадранската повелба: на Албанија, Еди Рама, на Хрватска, Андреј Пленковиќ, на Црна Гора, Душко Марковиќ, на Босна и Херцеговина, Денис Звиздиќ, како и на земјите набљудувачи, на Србија, Ана Брнабиќ, на Словенија, Миро Церар, и на Косово, Хашим Тачи.

На Самитот во македонската делегација се и министерката за одбрана, Радмила Шекеринска-Јанковска, заменик-претседателот задолжен за спроведување на Рамковниот договор и политички систем, Хазби Лика, министерот за надворешни работи, Никола Димитров, и пратеникот Стево Пендаровски.


Стејт департмент: Договорот за добрососедство ќе придонесе за стабилност на регионот


Вашингтон, 2 август, 2017 - 9:52 (META) 

Соединетите Американски Држави им честитаат на Македонија и на Бугарија за потпишување на Договорот за добрососедство и за пријателство, се вели во соопштението на Стејт департментот.

„Овој важен, прогресивен договор ги препознава веќе силните врски помеѓу двете земји и отвора врата за уште поблиска соработка, која се проширува и во други области како инфраструктурата и културата. Потпишувањето на овој Договор ќе придонесе за политичка стабилност и за економски развој пошироко во регионот и е охрабрувачки пример за тоа, како разликите помеѓу соседите може да се решат мирно“, се вели во соопштението на Стејт департментот.

Потпишувањето на Договорот вчера го поздравија Европска Унија и Велика Британија.


Земјотреси со јачина од 3,7 и 3,6 степени синоќа почувствувани во Охридско


Охрид, 9 јули, 2017 - 10:38 (META) 

Во текот на изминатата вечер во охридското епицентрално подрачје биле почувствувани два земјотреси со јачина од 3,7 и 3,6 степени според Рихтеровата скала.

Земјотресот со јачина од 3,6 степени е регистриран во 22.52 часот, а тој со јачина од 3,7 степени бил во 21.31 часот.

Во текот на ноќта во Охридскиот Регион не биле почувствувани посилни земјотреси. Сеизмолошката опсерваторија соопшти дека биле регистрирани неколку послаби со магнитуда од 2 и 3 степени.

Во последните 20 дена, Охрид и околината ги погодија повеќе од 1.000 земјотреси. Немирното тло внесе страв и паника како кај охриѓани, така и кај туристите.


Бејли: Посетата на потпретседателот Пенс е потврда за посветеноста на САД на регионот


Скопје, 6 јули, 2017 - 14:03 (META) 

Учеството на потпретседателот на САД, Мајк Пенс, на состанок на Јадранската повелба на 2 август во Подгорица, со кој ќе претседава Република Македонија, е потврда за посветеноста на Вашингтон на регионот, изјави американскиот амбасадор во земјава, Џес Бејли.

– Посетата на потпретседателот Пенс е, пред сè, за да зборува со партнерите и со сојузниците од регионот за посветеноста на САД на овој регион. Мислам дека ќе слушнеме пораки на таа тема. Тоа е суштинската цел на посетата. Јадранската повелба, од која САД се дел преку Република Македонија и другите регионални членки, е прекрасен форум на кој тој ќе може да зборува и да се запознае со лидери од регионот – изјави Бејли по испраќањето контингент на АРМ на меѓународната вежба „Сајбер гардиан 2017“.

Според Бејли, Јадранската повелба е важен форум кој работи на членството во НАТО на нејзините членки, но и како форум за регионална безбедност.

– Три од членките на Јадранската повелба сега се членки на НАТО и се надевам дека и другите ќе одат во истата насока. Тоа не се случуваше секогаш со брзината што сите би сакале да ја видиме, но повелбата останува не само како форум на кој се работи на членството во НАТО, туку и форум за регионална безбедност. Има земји набљудувачки, земји членки и повелбата е важен форум за регионална безбедност и соработка – додаде Бејли.

Потпретседателот на Соединетите Американски Држави, Мајк Пенс, на 2 август во Подгорица ќе учествува на средбата на високи претставници на земјите членки и на земјите набљудувачи на Јадранската повелба.