Бектеши од косовскиот колега ќе бара укинување на царината за сите производи


Скопје, 25 јули, 2018 - 16:21 (META) 

Mинистерот за економија Крешник Бектеши најави состанок со неговиот косовски колега Бајрам Хасани, в петок на 27 јули. Производи кои останаа неопфатени со одлуката на косовската Влада за повлекување на мерките се доматите, пиперките, јаболката, крушите, сливите, малините и грозјето.

„Во име на досегашната успешна трговска и, воопшто, економска соработка со Република Косово се надевам дека ќе најдеме заеднички јазик со мојот косовски колега, а дека средбата ќе резултира со решение кое ќе биде од взаемен интерес. Уверен сум дека имаме заедничка цел, а тоа е олеснување на трговијата на Западен Балкан, согласно правилата на договорот ЦЕФТА и принципите на слободна трговија“, вели Бектеши.

Министрите од регионот денеска во Белград на заеднички состанок ја повикаа косовската Влада целосно да ги укине зголемените царини за извоз на земјоделски производи во Косово.


Заев: Регионот има лидери кои внесоа нова енергија, а со тоа и економски придобивки


Мостар, 24 јули, 2018 - 10:05 (META) 

Премиерот Зоран Заев синоќа учествуваше на традиционалната манифестација „Mostar Peace Connection“ и заедно со неговите колеги, претседавачот со Советот на министри на БИХ, Денис Звиздиќ, грчкиот премиер Алексис Ципрас, црногорскиот премиер Душко Марковиќ положи цвеќе во реката Неретва, во знак на мир и со пиетет кон жртвите од сите војни.

„Промовираме како еден лидер може, треба и мора да се издигне над предрасудите, и самиот да стане мост, поврзувајки се со други лидери кои им мислат добро на своите граѓани. Никој сам не успеал. Ние, лидерите од регионот се поврзавме меѓусебно, покажавме достоинствена почит едни за други, завртевме грб на она што не дели и го дофативме она што не поврзува. Тоа што не поврзува е потребата за стабилност, сигурност и безбедност, а со тоа и економски придобивки, за нашите граѓани и нашите држави“, изјави Заев и додаде дека регионот има лидери кои внесоа нова енергија и подготвени се да сплотуваат луѓе и држави.

На манифестацијата „Mostar Peace Connection“, присуствуваа бројни гости, политичари и истакнати личности, заслужни за промоција на мирот, од БИХ, регионот и пошироко.

Заев кој е минатогодишен добитник на наградата Мостарска повелба на мирот, за придонес во соработката и поврзувањето на луѓето во својата земја, регионот и светот, синоќа имаше обраќање.


Народна банка организира конференција за плаќања и пазарна инфраструктура


Скопје, 5 јуни, 2018 - 11:35 (META) 

Народната банка во соработка со Централната банка на Холандија ја организира 11. конференција за плаќања и пазарна инфраструктура, насловена „Време е за дигитализација“, од 6 до 8 јуни во Охрид.

„Конференцијата ќе опфати теми кои што, меѓу другото, ќе се однесуваат на новите дигитални технологии за плаќање развиени од секторот „финтек“, безбедноста во дигиталната трансформација, глобалните трендови во финансирањето на трговијата, како и новата регулатива во платежната област во Европската унија. За време на Конференцијата ќе биде одржана панел-дискусија на која истакнати експерти од платните системи, секторот „финтек“ и претставници од платежните институции ќе дискутираат за трансформативната моќ на дигиталните плаќања и предизвиците во плаќањата во интегрираниот свет“, се вели во соопштението.

Од НБРМ додаваат дека одржувањето на оваа конференција носи големи придобивки за платежната индустрија во домашната економија.

На Конференцијата, која што традиционално има меѓународен карактер, предавачи се високи претставници од Европската комисија, Европската централна банка, централните банки коишто му припаѓаат на Европскиот систем на централни банки, Банката за меѓународни порамнувања и Светската банка.

Воедно, оваа година потврдено е учеството на претставници од 21 централна банка од регионот на Западна, Централна и Источна Европа, Заедницата на независни држави, Блискиот Исток и Северна Африка, што, како што велат од НБРМ, недвосмислено го потврдува високиот квалитет и препознатливоста на оваа конференција во меѓународни рамки.


Арсовска: Искористувањето на фондовите од ЕУ ќе ја зајакнат економијата на регионот


Софија, 18 мај, 2018 - 10:19 (META) 

Претседателката на Сојуз на стопански комори на Македонија (ССК),  Данела Арсовска во обраќањето нa отворањето на Виенскиот економски форум во Софија, ја истакна важноста од спроведувањето на економските реформи во Македонија во процесот на приближување до Европската Унија.

Таа додаде дека потребно е искористување на достапните фондови за да се изгради силна економска мрежа со земјите од Западен Блакан, како обединет пазар кој ќе го зајакне регионот и ќе го приближи до ЕУ.

„Спроведувањето на економските реформи во земјата со приоритет на регулаторната реформа, реформи на енергетскиот и транспортниот пазар, намалување на неформалната економија и функционирањето на пазарот како и доследност на политиките, владеење на правото за привлекување и задржување на инвеститорите, се клучни за постигнување економски раст, конкурентност и подобар животен стандард“, додаде Арсовска.

Европската Унија во консултација со земјите од Западен Балкан ја усвои декларацијата од 17 точки на самитот на ЕУ-Западен Балкан. Меѓу другото, во декларацијата се вели дека ЕУ се обврзува значително да ја поттикне поврзаноста во транспортната, енергетската, дигиталната и економската сфера.

ЕУ исто така се согласува да промовира поволна пазарна и инвестициска средина во Западен Балкан, за регионот побргу да се придвижи кон дигиталната економија и кон одржливите општества што ги почитуваат одредбите за климата во согласност со Парискиот договор.


Дигиталното поврзување на Западен Балкан ќе биде финансирано со 200 милиони евра од ЕУ


Софија, 17 мај, 2018 - 11:44 (META) 

Заклучоците од првиот Дигитален Самит, што пред еден месец се одржа во Скопје, веќе се дел од агендата на Европската Унија, информираат од министерството за информатичко општество и администрација.

„Еврокомесарот за проширување Јоханес Хан, од самитот на ЕУ и Западен Балкан, информираше дека иницијативите за дигитална агенда и поголема поврзаност во регионот ќе бидат финансирани со повеќе од 200 милиони евра. Во фокусот на овие мерки е намалување на трошоците за роаминг, подобрување на широкопојасниот интернет, развој на е-Влада како и дигитализација на индустријата“, се вели во соопштението на МИОА.

Од таму додаваат дека МИОА по повод 17 мај, Меѓународниот ден на телекомуникации и информатичко општество, уште еднаш се обврзува на реализација на сите најавени активности во областа на информатичкото општество.

„Во наредниот период ќе ги објавиме националните стратегии за широкопојасен интернет и за сајбер безбедност, а до крајот на годината ќе ја објавиме и долгорочната стратегија за ИКТ“, се додава во соопштението.

Во август, МИОА ќе ги пушти во употреба националниот портал за е-услуги, и новиот портал за отворени податоци.

„Тоа што е од особена важност за сите граѓани е дека конечно услугите ги носиме до нивните домови. Најчесто бараните докуметни, граѓаните ќе можат да ги добија по електронски пат, брзо, едноставно и ефтино. Преку дигитализација и професионализација на администрацијата, конечно граѓаните ќе добијат институции кои се нивен сервис и одговараат на нивните потреби и барања“, велат од МИОА.


Мигрантските рути се затворени, владите во регионот ќе разменуваат информации


Скопје, 4 април, 2018 - 13:55 (META) 

Регионалната иницијатива за миграција, азил и бегалци (МАРРИ) ги поддржува шесте влади од Западен Балкан, Албанија, Босна и Херцеговина, Косово, Македонија, Црна Гора и Србија во усогласување на правната рамка со законодавството на Европска Унија, во изградбата на институции и персонал, како и размена на информации за мигрантите кои поминуваат низ овие држави.

На денешната презентација на МАРРИ, беше истакнато дека како делуваат на повеќе подрачја како азил, интегрирано гранично управување, визен режим, интеграција на бегалците, борбата против трговијата со луѓе.

– Ги поддржувме шесте влади за подобро да управуваат со миграцијата. Тоа е условено со евроатлантската перспектива на државите од регионот, а како членки на Обединетите Нации, одредени документи се обврзувачки. Државите исто така треба да имаат побрза соработка во размената на комунакции – изјави директорката на МАРРИ, Тамара Ругоша.

Иако рутата за мигрантите е затворена, сепак тие користат илегални премини преку државите од регионот за влез во државите од Европската Унија. Притоа, додаде Ругоша, постои опасност од нелегална трговија со луѓе, криумчарење на деца, трговија со органи.

Во следните две години, како предизвик за МАРРИ меѓудругото ќе биде и подигање на свеста во регионот од опасноста за криумчарење. Па оттука, граничните служби, посебно на аеродромите, ќе бидат обучувани од страна на Европската гранична служба, Фронтекс за препознавање на деца кои се жртви на криумчарење.

– Во моментов рутите се затворени, но опасноста од Блискиот Исток се уште ја има. Затоа овој период е потребно да превенираме. Кога беше кризата, на македонската и на српската граница имаше по 20.000 мигранти, а тоа навистина е тешко да се изменаџира. Властите овде и во Србија покажаа дека имаат капацитет за справување, но тој треба да се подобри и да биде поефикасен. Ние сме овде и да ги поврземе владите со донаторите, за тие да не трошат пари од буџетот. Имав информација дека вашата држава, ја чинело 50.000 евра дневно за регистрација, сместување, организација на мигрантите. Тоа е голем притисок – додаде Ругоша.

Во 2015 и 2016 година, низ територијата на Западен Балкан поминале еден милион бегалци.


Инфраструктурата и енергетиката, теми на Инвестицискиот самит во Лондон


Лондон, 27 февруари, 2018 - 10:43 (META) 

Инфраструктурното и енергетското поврзување на земјите од Западен Балкан биле едни од главните теми за кои, премиерите на земјите од Западен Балкан, разговарале на „Регионалната инвестициска платформа“ на Инвестицискиот самит за Западен Балкан во организација на Европската банка за обнова и развој (ЕБОР), што се одржа во Лондон.

„Зборувавме за Коридорот 8 и Коридорот 10, но и другите коридори кои поминуваат низ другите земји. Се работи за сериозни финансиски средства. Само проценката на Коридорот 8, во деловите во Македонија, Бугарија и Албанија, е две милијарди евра. Се зборува за железничкото и патното поврзување, но и со можност да се пуштат и оптички кабли заради дигиталната агенда и поврзаноста на регионот. Зборувавме за проекти кои значат поддршка на енергетиката, производството, енергетското поврзување, но и секако поддршката на компаниите кои треба да инвестираат во овој регион“, изјави премиерот Зоран Заев.

Тој додаде дека преку овие крупни инфраструктурни проекти финансирани од ЕБОР, ќе им се даде многу работа на домашните компании, а ќе се привлечат и голем број на инвестиции.

На панелот „Одржлив регионален енергетски модел“, вицепремиерот за економски прашања Кочо Анѓушев изјави дека енергетската иднина на земјите од регионот на Западен Балкан ја гледа во создавање на еден заеднички енергетски пазар, без административни граници.

„Доколку сакаме одржлив енергетски систем во регионот, верувам дека формирање на еден заеднички енергетски пазар, единствена регионална берза и воведување на универзален снабдувач за електрична енергија и гас е вистинско решение. Додека не стигнеме до тоа решение Владите треба да работат на унапредување на меѓусебната соработка и отстранување на административните бариери за слободен проток на енергија“, рече Анѓушев.


Напролет Македонија ќе биде домаќин на првиот регионален дигитален самит


Скопје, 8 ноември, 2017 - 14:37 (META) 

Македонија ќе биде прва земја домаќин на регионален дигитален самит, кој во рамки на Берлинскиот процес ќе се одржи следната пролет, во април или во мај, најави денеска министерот за информатичко општество и администрација, Дамјан Манчевски.

Манчевски рече дека при подготовката на концептот за самитот, биле вклучени бизнис-секторот, универзитетите и граѓанските организации.

– Дигиталниот самит ќе трае два дена и ќе бидат опфатени теми како дигитални мрежи и услуги, поврзување и пристап, доверба и безбедност, како и дигитални вештини и дигитална економија и општество. Овие теми ги обединува дигитализацијата, од која неизбежен дел станаа и лажните вести. За предизвикот со феноменот на лажните вести ќе имаме посебна работилница. Особено внимание ќе посветиме и на дигиталното поврзување на земјите од регионот – рече Манчевски.

Дигиталниот самит предвидува и ЕКСПО-дел, каде дигиталните ИКТ-компании ќе имаат можност да ги престават своите остварувања.

Одлуката да се организира дигитален самит во Македонија е поддржана од Регионалниот совет за соработка и од германското министерство за економија и енергетика.

Самитот ќе овозможи видливост и регионален дијалог во текот на европската интеграција, истакна министерот за надворешни работи, Никола Димитров.

– Покрај патишта, коридори и пруги, треба да иницираме и мостови на електронско поврзување. Дигитализацијата ќе овозможи низа нови можности, ќе минимизира бројни бариери и ќе ја олесни комуникацијата меѓу граѓаните, индустријата и бизнис-заедницата – рече Димитров.


„Самит 100“: Да испратиме порака за регионално единство


Скопје, 17 октомври, 2017 - 15:25 (META) 

„Самит 100“ е одлична можност за премиерите да дадат конкретна поддршка на бизнис-заедницата, порача премиерот Зоран Заев, на обраќањето на „Самит 100“ за бизнис-лидери на Југоисточна Европа.

Тој додаде дека политичарите треба да ја донесат Европа во регионот бидејќи ако приватниот сектор и бизнис-заедницата одат напред, тогаш и државите ќе постигнат добри економски резултати.

– Работиме на унапредување на регионалната соработка бидејќи Западна Европа ќе нè почитува повеќе ако соработуваме и ако сме сплотени. Потребно е да испратиме порака на единство на регионот – рече Заев и апелираше да се намалат часовите на чекање на граничните премини заради динамичен пораст и развој.

Премиерот на Албанија, Еди Рама, рече дека земјите во регионот треба да соработуваат, а не да си попречуваат. Тој нагласи дека е добро што оваа средба на премиерите не е под ничие посредништво, туку се случила нормално и природно, што не било случај во минатото.

– Овој регион има голем потенцијал, кој не е доволно искористен поради пречките и минатото. Само Балканот може да си го дозволи луксузот на чекање на границите, кое, според некои податоци, изнесува 3.800 години – рече Рама.

Црногорскиот премиер Душко Марковиќ рече дека земјите од Западен Балкан живеат едни до други, но не можат да стигнат едни кај други. Како пример го наведе неговото долго патување до Скопје преку Сараево и Истанбул.

– Макроекономската соработка, структурните реформи и економската соработка се клучни за развој на регионот – рече Марковиќ.

Претседателот на советот на министри на Босна и Херцеговина, Денис Звиздиќ, рече дека стопанствата на земјите од регионот се комплементарни и затоа треба да се намалат царинските пречки за побрз проток на стоки и на луѓе. Порача дека земјите од регионот треба да настапат со заеднички проекти пред европските фондови.


„Самит 100“ и Коморски инвестициски форум потпишаа меморандум за соработка


Скопје, 17 октомври, 2017 - 12:09 (META) 

Во рамките на „Самит 100“, вчера беше потпишан меморандум за соработка помеѓу регионалната платформа „Самит 100“ и Коморскиот инвестициски форум на шест земји од Западен Балкан (WB6 CIF).Форумот е тело за регионална соработка на коморите од Македонија, Србија, Албанија, Косово, Босна и Херцеговина и од Црна Гора и e формиран на маргините на Самитот во Трст за Западен Балкан.

Според потписниците на меморандумот, претседателот на управниот одбор на „Самит 100“, Живко Мукаетов, и претседателот на Стопанската комора на Србија, Марко Чадеж, целта е да се обединат силите од приватниот сектор и силните регионални компании да работат заедно на спроведувањето на договорените проекти од Берлинската иницијатива.

„Годинава во Скопје, регионалната соработка на „Самит 100“ е официјализирана преку потпишување меморандум за меѓусебно разбирање и за соработка на нашата платформа со Коморскиот инвестициски форум на Западен Балкан 6. Меморандумот се однесува на поттикнување на деловната соработка и на унапредување на конкурентноста на регионалната и на националните економии“, рече Мукаетов.

Темите за кои се дискутира на овој самит се продлабочување на поврзаноста во регионот преку соработка, побрза трговија со стоки и со услуги, транспорт, енергија и брендирање на потеклото.

„Сакаме да помогнеме во остварување на тие задачи, придонесувајќи во отстранувањето на царинските бариери, синхронизирање на документацијата, но и синхронизирање на другите процедури. Наша задача е да ја задржиме оваа тема високо на агендата и мислам дека таквата подготвеност сега постои, но не смееме да се опуштиме. Ова е прашање на опстанокот на нашиот регион“, заклучи Чадеж.

Денеска на „Самит 100“ ќе дискутираат премиерот Зоран Заев и премиерите на Албанија, Еди Рама, на Црна Гора, Душко Марковиќ, и претседавачот со советот на министри на Босна и Херцеговина, Денис Звиздиќ.