МОН ги повика наставниците да дадат предлози за новите наставни програми


Скопје, 27 јануари, 2018 - 10:23 (META) 

Министерството за образование и наука ги повика наставниците од одделенска настава да достават предлози и коментари за новите наставни програми што се подготвуваат во основото образование.

„За да создадеме што е можно подобар и поквалитетен образовен модел, сакаме да го слушнеме гласот и мислењето на лицата кои се секојдневно вклучени во образовниот процес, наставниците. За таа цел, Министерството за образование и наука бара и очекува од наставниците од одделенската настава, како и сите компетентни и заинтересирани лица, активно да се вклучат во процесот на градењето на новиот модел за основно образование и да достават свои критики, коментари и предлози за подобрување на новите наставни програми за прво одделение“, стои во соопштението на МОН.

Предлозите и коментарите наставниците, како што информираат од МОН, можат да ги достават на мејл-адресата npp@mon.gov.mk , а, исто така, можат да ги достават и до архивата на Министерството за образование и наука (улица Св. Кирил и Методиј бр. 54).

Од Министерството велат дека наскоро очекуваат да ги добијат и новите наставни програми за второ и трето одделение.

Новиот образовен модел го подготвува Работна група која се состои од експерти во областа, професори од Филозофскиот и од Педагошкиот факултет, но и практичари во областа, односно наставници кои работат со деца од прво до трето одделение.


Дескоска најави ревидирање на наставните програми и намалување на бројот на часови


Скопје, 1 септември, 2017 - 17:47 (META) 

Треба да се намали бројот на часови и да се реорганизира начинот на одржување на наставата, така што главните промени ќе бидат во основното образование и тоа во одделeнската настава, изјави денеска министерката за образование и наука, Рената Треневска-Дескоска.

Таа додаде дека учениците се преоптоварени со голем број часови и на тој начин нема ефикасност во учењето.

– Сметаме дека треба да има намалување и на бројот на часови и да воведеме нов наставен план соодветен на учениците од таа возраст. Понатаму, да се воведат методи кои ќе значат креативно изучување на начин кој ќе ги заинтересира децата да ја следат наставата и да учествуваат во неа, а потоа и соодветни материјали кои ќе бидат користени – додаде Треневска-Дескоска.

Министерката за образование и наука посочи дека за сите промени во наставните програми ќе има јавна дебата помеѓу наставниците и експертската јавност.

Треневска-Дескоска информираше дека наставниците, преку апликација која веќе е подготвена, до 15 септември треба да дадат мислење за одредени учебници и да укажат на проблемите.

– До директорите е испратена и лозинка преку кој може да се пристапи до апликацијата. Наставниците ќе можат лично да ги внесат бараните податоци, анонимно и без притисок ќе можат да одговорат на прашања кои нас, како Министерство, нè интересираат – рече Треневска-Дескоска.


Учебната година ќе почне на 4 септември, информираат од МОН


Скопје, 18 август, 2017 - 14:52 (META) 

Учебната 2017/2018 година за јавните основни и средни училишта ќе почне на 4 септември (понеделник), информираше денеска Министерството за образование и наука.

Календарите за организација на учебната 2017/2018 година во јавните основни и средни училишта ќе бидат објавени во Службен весник на Република Македонија.

Министерката за образование и наука, Рената Треневска-Десковска, на 5 јуни најави дека е почнат обид да се спречи воведувањето на Кембриџ-програмата во средното образование и дека е можно да се намали бројот на предметите во основното образование.

Министерката тогаш најави и преиспитување на наставните програми и намалување на бројот на предметите во основното, како и нов закон за високо образование. Реформскиот процес во образованието, според неа, почнал со укинувањето на екстерното тестирање.


Битолски средношколци со неписмени соопштенија се повикуваат на протести


Битола, 20 март, 2017 - 13:56 (META) 

„Бојкотираме за да учиме на македонски јазик, не бојкотираме за партија!“ Вака гласи повикот на социјалните мрежи со кои средношколци од повеќе училишта во Битола ги организираат своите соученици да ја прекинат наставата и да излезат на протести.

Притоа, се повикуваат претседателите на класовите да прават списоци и да бележат кој сè излегол на протестите. Протестот кој беше најавен за денеска во 11.30 часот, ги вознемири дел од родителите на ученици во гимназијата „Јосип Броз Тито“, особено зашто ученици од други училишта дошле да ги повикаат на протест гимназијалците, со зурли и со тапани, скандирајќи „Македонија“ и читајќи соопштение „како треба да се сака татковината“.

– Децата ни јавуваат дека други ученици со зурли и со тапани се во училишниот двор и ги повикуваат на протести. Само оваа гимназија досега не ја има прекинато наставата и не го има поддржано бојкот, освен поединци – вели еден од родителите.

Во техничкото училиште, пак, ученик од втора година читал соопштение по училниците зошто треба да се излезе на протестите. Ученикот пред професорите што не го дозволувале ваквиот чин, се правдал дека за сè знае директорот. Директорот, меѓутоа, не одговара на нашите телефонски повици и пораки.

Ученици од повеќе средни училишта денеска, сепак, излегоа на протест.


СДСМ: ВМРО-ДПМНЕ да престане со притисоците и со злоупотребите на ученици


Скопје, 17 март, 2017 - 10:27 (META) 

ВМРО-ДПМНЕ да престане со притисоците и со злоупотребите на ученици за учество на протести со националистичка реторика и на кои се шири говор на омраза, порачуваат од СДСМ.

Од партијата ја повикуваат ВМРО-ДПМНЕ да престане да прави притисоци врз наставниците и директорите на училиштата и потсетуваат дека злоупотребата на ученици за политички цели е кривично дело и дека за тие што го прават тоа, ќе има одговорност.

„Наставниците и директорите на училишта да соберат храброст и да се спротивстават на нарачките од раководството на ВМРО-ДПМНЕ, кое единствено се грижи за сопствен спас од одговорност за сторените милионски криминал и злоупотреби“, стои во соопштението на СДСМ.

Оттаму додаваат дека доаѓа време на суштински промени во образование и дека „новата реформска влада ќе го врати достоинството на образовните институции, кои ќе бидат првото место каде што треба да се градат вредностите на едно заедничко општество“.

„Затоа, неопходно е Ѓорге Иванов веднаш да го даде мандатот на претседателот на СДСМ, Зоран Заев, зад кого стои мнозинство од 700.000 граѓани преточени преку 67 пратенички потписи“, нагласуваат од СДСМ.


Омбудсманот бара веднаш да престане злоупотребата на деца во протестите


Скопје, 3 март, 2017 - 14:00 (META) 

Народниот правобранител денеска повика веднаш да престане злоупотребата на деца во протестите кои се организираат деновиве. За овие случувања, како што соопштуваат од канцеларијата на Омбудсманот, тие добиле и претставки од родители.

„Народниот правобранител ги предупредува сите инволвирани страни дека секоја злоупотреба на децата подлежи на санкции и укажува дека ќе ги истражи поплаките. Доколку навистина се докаже дека одредени лица, вработени во образовни институции, биле поттикнувачи, за истите ќе бара најстроги казни, затоа што станува збор за деца кои според сите меѓународни и домашни регулативи уживаат посебна заштита“, стои во соопштението на Народниот правобранител.

Од институцијата апелираат до наставниците и до родителите по никоја цена да не дозволуваат инволвирање на учениците во какви било собири и протести и ги повикуваат надлежните институции веднаш да реагираат и да ги спречат ваквите појави.


Грција планира да организира часови и училишта за децата бегалци


Атина, 28 јули, 2016 - 12:46 (META) 

Грчкото министерство за образование ја разгледува идејата од септември илјадници деца бегалци да се вклучат во редовната настава во грчките училишта. Министерот за образование, Никос Филис, за ова разговараше со атинскиот градоначалник Јоргос Каминис за да се воспостави соработка меѓу министерството и локалната самоуправа за вклучување на децата бегалци во грчките училишта.

„Министерството е подготвено од почетокот на новата учебна година да се интегрираат во училиштата илјадници деца бегалци“, истакна Филис.

Планот е децата од бегалските кампови низ Грција без никаква училишна настава на почетокот да бидат распоредени низ голем број училишта низ Атина и низ земјата, а потоа да се префрлат во специјализирани училишта.

Грчкиот премиер Алексис Ципрас вчера најави дека од септември ќе се почне со обид за вклучување на децата во јавниот образовен систем. Ципрас истакна дека за оваа цел ќе се вработат околу 800 наставници-заменици. Идејата е овие наставници да говорат арапски и фарси за да може да им предаваат на децата на мајчин јазик. За помалите деца се предвидува отворање на градинки во бегалските центри.

Образованието на децата бегалци е еден од главните проблеми со кои се соочува Грција, бидејќи илјадници деца со месеци се заглавени во камповите без никакво образование. Проблематично е наоѓањето професори кои ги знаат мајчините јазици на децата, но и фактот дека голем број од родителите може да стравуваат да ги пуштат децата сами да одат на часови во училишта подалеку од бегалскиот центар.

Привремените решенија во некои од камповите се повремени часови од самите бегалци кои пред да заминат од родните држави работеле во образовни институции. Сепак, ако се земе предвид дека бегалската криза ќе трае и дека бегалците ќе останат во Грција уште неколку години, државата мора да најде начин да организира часови за нив. Властите размислуваа и за организирање мобилни училишта со професори кои би доаѓале и би држеле часови секој ден во камповите во посебно организиран простор.


Турција вработува 3.000 нови судии и обвинители и 20.000 професори


Истанбул, 25 јули, 2016 - 10:20 (META) 

Турскиот министер за правда, Бекир Боздаг, соопшти дека 3.000 нови судии и обвинители ќе бидат именувани во Турција на местата на илјадниците државни службеници што беа отпуштени по обидот за воен пуч, извршен на 15 јули.

Боздаг потврди дека владата организирала 1.500 тестирања во ноември за идни судии и обвинители и додаде дека бројот двојно ќе се зголеми поради „неодамнешните случувања“.

Претходно, турскиот министер за образование, Исмет Јилмаз, соопшти дека се планира вработување на повеќе од 20.000 професори, кои ќе дојдат на местата на оние кои добија отказ поради поврзаност со исламскиот проповедник Фетулах Ѓулен.


Турција: 21.000 наставници прогласени за работонеспособни


Анкара, 19 јули, 2016 - 18:23 (META) 

Министерство за образование на Турција денеска прогласи за работонеспособни 21.000 наставници, вработени во приватни институции.

Одлуката на министерството е дел од акциите што турската влада ги презема по неуспешниот обид за државен удар на 15 јули.

Претходно, Советот за високо образование побарал оставки на 1.577 декани и професори од сите универзитети во земјата, a министерството за образование соопшти дека отпушти од работа 15.200 вработени.

Весникот „Хуриет“ јавува дека повеќе од 49.000 луѓе во Турција добија отказ од работа во различни министерства и државни институции, поради сомневања дека се вмешани во обидот за воен удар.


Директор на основно училиште во Боговиње обвинува дека е бесправно разрешен


Тетово, 14 јуни, 2016 - 15:57 (META) 

Емран Имери, кој неодамна беше сменет од функцијата директор на Основното училиште „Абдил Фрашери“ од Боговиње, денеска на прес-конференција обвини дека градоначалникот на Општинаta, Хазби Идризи, го разрешил бесправно.

– За моето разрешување нема никаква основа. Јас подолго време со градоначалникот на Боговиње комуницирав само службено. Се скаравме поради вработувања на мои и на негови блиски роднини. Потоа ни се расипаа нашите односи. Сметам дека градоначалникот затоа ме разреши – вели Имери.

Градоначалникот Идризи ги отфрли обвинувањата.

– Не е точно тоа што зборува поранешниот директор на основното училиште. Тој е разрешен од функцијата затоа што за него имаше многу поплаки од наставниците. Им се мешаше многу во работата. Затоа против  него се поведе дисциплинска постапка и следуваше негово разрешување – вели Идризи.

Поранешниот директор на училиштето рече дека за неговото разрешување ќе поднесе жалба до повеќе институции.