Тачи: ДПА ќе продолжи таксативно да ги поддржува уставните измени


Скопје, 22 октомври, 2018 - 13:11 (META) 

Претседателот на Демократската партија на Албанците, Мендух Тачи се сретна со заменик-помошникот државен секретар, Метју Палмер, во резиденцијата на американскиот амбасадор Џес Бејли

„На средбата се разговараше за актуелната политичка ситуација, за имплементацијата на Договорот од Преспа, како и за реформскиот процес. Тачи на средбата истакна дека ДПА ќе продолжи таксативно да ги поддржува уставните измени кои произлегуваат од Договорот од Преспа, како и процесот на реформи за целосна интеграција на земјата во НАТО и во ЕУ“, се вели во соопштението на ДПА.

Палмер утрово се сретна и со лидерот на ДУИ, Али Ахмети.

Како што соопштија од ДУИ, на средбата се разговарало околу последните политички случувања во земјата, спроведувањето на Договорот од Преспа, реформите како и Евроатланската интеграција. Ахмети на средбата истакнал дека „петокот бил само почеток на повеќе месечниот процес за спроведување на Договорот од Преспа“.

Палмер, како што е најавено ќе се сретне со премиерот Зоран Заев и со министерот за надворешни работи, Никола Димитров, како и со претставници на политичките партии.


Мијалков и Тачи во судот ги слушаа „бомбите“ за изборните нерегуларности


Скопје, 6 јули, 2018 - 12:11 (META) 

Две „бомби“ беа пуштени на судењето за случајот „Титаник 2“ на СЈО, во кој меѓу обвинетите за изборните нерегуларности на локалните избори во 2013 година се и Сашо Мијалков и Мендух Тачи.

Првата бомба, која веќе беше објавена во јавноста, открива разговор меѓу Мијалков и Тачи.
Сашо Мијалков, како тогашен директор на УБК му се јавува на лидерот на ДПА, Тачи и бара од него услуга за гласање на седница на ДИК.

– Ало, хитна ургенција. Можете ли да гласате за нас за да се усвои приговорот за Струмица – му вели Мијалков, на што Тачи му одговара „нема проблем, секогаш сум тука за тебе, за вас, до крај до смрт“.

Потоа лидерот на ДПА веднаш му се јавува на Бедредин Ибраими, член на ДИК од ДПА.

– Ало, сега ја имате Струмица. Ќе гласаш да се поништи, пошто сме договорени за Чаир – му вели Тачи на Ибраими за изборот за градоначалник на Струмица, каде во прв круг Зоран Заев од СДСМ го победи Васил Пишев, но ДИК го поништи гласањето.

Ибраими пред судот рече дека тој имал факултет, две деца и поради тоа нелогично е да се мисли дека на 63 години прима наредби.

Следното рочиште е закажано на 23 август каде на предлог на СЈО треба да сведочат Виолета Дума, Борис Кондарко, Субхи Јакупи и Васил Крстев.

Во овој случај покрај Мијалков, Тачи и Ибраими обвинети се и поранешните членови на ДИК, Анета Стефановска, Влатко Сајковски и Сашо Срцев. Сите обвинети, освен Мијалков, се товарат за злоупотреба на службената положба и овластување, а ексдиректорот на УБК ќе одговара за кривичното дело примање награда за протизаконито влијание.


Тачи: Договорот со Грција е историски и многу значаен


Скопје, 2 јули, 2018 - 12:06 (META) 

Договорот меѓу Македонија и Грција за спорот со името е историски и многу значаен за иднината на земјата, оцени лидерот на Демократската партија на Албанците (ДПА), Мендух Тачи во интервју за Новинската агенција „Журнал“ и „ЖурналТв“.

– Договорот е историски и многу важен за иднината на земјата. Без овој договор иднината на Македонија ќе продолжеше да биде под знак прашалник. Многу пати кога сум изјавил дека се ризикува иднината на Македонија ако не се постигне овој договор, овие мои изјави биле оценети како радикални и екстремни, но ова е вистината. Покрај економскиот развој и интеграциите, кои се дел од другите земји од регионот, договорот содржи и еден многу важен процес, а тоа е процесот на хармонизација на меѓуетничките односи – вели Тачи.

Зборувајќи за одлуката на шефот на државата, Ѓорге Иванов да не го потпише законот за ратификација на Договорот меѓу Македонија и Грција, Тачи вели дека нема никакво разбирање за оваа одлука која го попречува иднината на земјата.

– Немам никакво разбирање. Луѓе и групи кои се борат против овој договор, како прво се против самиот народ – смета Тачи.

Додека за непотпишувањето на указот за Законот за јазици од страна на претседателот Иванов, Тачи смета дека е иронична одлука.


Судењето за „Титаник 2“ продолжува на 6 јули


Скопје, 22 мај, 2018 - 14:22 (META) 

Со доказна постапка во која ќе бидат преслушани два телефонски разговори, на 6 јули ќе продолжи судењето по предметот „Титаник 2“, во кој денеска одбраната даде воведни зборови.

Во овој предмет на СЈО обвинети се лидерот на ДПА Мендух Тачи, поранешниот директор на УБК Сашо Мијалков, како и поранешните членови на ДИК Бедредин Ибраими, Анета Стефановска, Влатко Сајковски и Сашо Срцев.

Бранителот на обвинетите Тачи и Ибраими рече дека ќе докажат оти Тачи не му сугерирал на членот на ДИК од ДПА да гласа по приговори на ВМРО-ДПМНЕ, како и дека не се повторени изборите наведени во обвинението, со што не е направена материјална штета. Ибраими рече дека ДИК не повлекла никаква одлука на листа на кандидати на локалните избори и дека какви било разговори се небитни, оти тој одлуките ги носел согласно сите законски процедури.

Одбраната на Сашо Срцев, Димитар Дангов рече дека обвинетиот и да сакал, не можел да го стори кривичното дело за кое се товари. Кревањето рака за давање глас, според Дангов, не е одлука, туку само глас.

Бранителот на Анета Стефановска рече дека овој суд нема право да ја оценува одлуката на ДИК и според Законот не може да цени дали таа одлука е добра или лоша, а тоа може да го прави само Управниот суд.

Воведни зборови не дадоа обвинетиот Сашо Мијалков и неговата одбрана, по своја волја.


Денеска пресуда во „Триста“ за Ѓоко Поповски


Скопје, 22 мај, 2018 - 10:08 (META) 

Во Основен суд Скопје 1 денеска треба да биде прочитана пресудата за предметот „Триста“ на Специјалното јавно обвинителство (СЈО), во кој обвинет е поранешниот помошник-министер за внатрешни работи Ѓоко Поповски. Тој се товари за злоупотреба на службена должност во врска со јавната набавка на 300 возила за МВР.

Поповски пред Судот на минатото рочиште кажа дека не е виновен и оти постапката што се води против него сериозно влијаела на неговото здравје. Рече и дека во изминатиот период се соочил со многу закани, уцени и притисоци, а се пожали и дека добил отказ од МВР во сомнителна дисциплинска постапка.

Тој е е обвинет дека со јавната набавка на 300 возила за МВР го оштетил буџетот за 453.570 евра. Според СЈО, Поповски незаконски доделил договори за купопродажба и одржување возила на Порше Македонија ДООЕЛ Скопје, Ка-Дис ДОО Скопје, Бохемија Автомобили Роус ДООЕЛ Скопје, Колевски ДОО Скопје и Авто Куќа ДОО Скопје избрани како економски најповолни понуди.

Нови судски рочишта во Кривичниот суд денеска треба да се одржат за уште три други предмети на „Тарифа“, „Титаник 2“ и „Труст“.

Во „Титаник 2“, им се суди на на претседателот на ДПА, Мендух Тачи и на поранешниот директор на Управата за безбедност и контраразузнавање (УБК), Сашо Мијалков. Се товарат за договарање на одлуки по приговорите до  во Државната изборна комисија (ДИК), во 2013 година, за заедно со нив се обвинети поранешните членови на ДИК Бедредин Ибраими, Анета Стефановска, Влатко Сајковски и Сашо Срцев.

Во „Тарифа“, за злоупотреба на службената положба и овластувањето во постапка за јавна набавка на софтвер – „ЕРП систем“ за ЕЛЕМ и нанесување штета на компанијата од четири милиони евра, обвинети се Дејан Бошковски, поранешен генерален директор на АД ЕЛЕМ, Методи Стојменовски и Ненад Ѓорѓевски.

Во предметот на СЈО наречен „Труст”, обвинети се бизнисменот Сеад Кочан и уште две физички и три правни лица за договарање учество на тендер на ЕЛЕМ. Според обвинителите на СЈО, обвинетите Сеад Кочан, Василије Авировиќ и Сафет Ватиќ, како и фирмите „Трансмет”, „Силекс неметали” и „Вато” злоупотребиле приближно 1,06 милијарди енари, односно 17 милиони евра, пари на граѓаните.


Тачи: ДПА влегува во Владата со министер без ресор


Тетово, 15 мај, 2018 - 14:01 (META) 

Пред почетокот на Централното собрание на ДПА денеска во Тетово, претседателот на партијата Мендух Тачи, рече дека имаа конкретна и коректна понуда од премиерот Зоран Заев за ДПА како дел од владината коалиција, јави МИА.

Станува збор за позицијата министер без ресор задолжен за економија и странски инвестиции и заменик министер за транспорт и врски, додека за другите позиции формирани се работни групи за да се договорат и овие кадровски решенија.

– Мислам дека нема да му биде тешко на Централното собрание да одлучи, поаѓајќи од конструктивното однесување на ДПА за време на политичката криза и конструктивниот пристап на новата Влада за реформи и особено за интеграциските процеси за кои имаме точни информации дека ќе имаат позитивен напредок и затоа се надевам дека Централното собрание ќе донесе позитивна одлука – рече Тачи.


Судењето за „Титаник 2“ одложено – Тачи и Ибраими го побараа обвинението на албански


Скопје, 10 мај, 2018 - 14:33 (META) 

Во Основен суд Скопје 1, денеска почна, па набргу беше прекинато, рочиштето од случајот на Специјалното јавно обвинителство (СЈО), наречен „Титаник 2“, во кој за бројни нерегуларности на локалните избори во 2013 година се обвинети претседателот на Демократската партија на Албанците (ДПА), Мендух Тачи, поранешниот директор на Управата за безбедност и контраразузнавање (УБК) и поранешен висок функционер на ВМРО-ДПМНЕ, Сашо Мијалков, како и против поранешните членови на Државната изборна комисија (ДИК), Бедредин Ибраими од ДПА и Анета Стефановска, Влатко Сајковски и Сашо Срцев од ВМРО-ДПМНЕ.

Според „бомбите“ што ги објави СДСМ, а кои се прифатени како докази во судската постапка, Мијалков и Тачи се договарале за гласање на членови на ДИК во однос на поднесени приговори.

На денешното рочиште, на кои се присутни сите обвинети, Бедредин Ибраими побара адвокатот на Мендух Тачи да биде и негов адвокат. Потоа бранителот побара да се одложи рочиштето за подобро да се запознае со случајот, што судијата Огнен Ставрев го одби и побра СЈО да почне со воведните зборови.

Ибраими потоа побара од судот обвинението да го види на албански јазик, по што и Мендух Тачи го побара истото, иако во предистражната постапка дал исказ дека го разбира македонскиот јазик.

Судијата Ставрев даде двочасовна пауза за да може обвинението да се преведе на албански.


Мијалков ја кажа и втората адреса, судењето за „Титаник 2“ продолжува на 10 мај


Скопје, 24 април, 2018 - 11:38 (META) 

Претседателот на ДПА, Мендух Тачи, поранешните членови на Државната изборна комисија, Сашо Срцев, Анета Стефановска и Влатко Сајковски, како и поранешниот шеф на Управата за безбедност и контраразузнавање (УБК), Сашо Мијалков, денеска беа на првото рочиште за случајот „Титаник 2“ во Основен суд Скопје 1. Следното рочиште е закажано за 10 мај.

Во врска со адресата на живеење која стои во обвинението, а на која, како што рече судијата Огнен Ставрев, не можеле да му достават покана, Мијалков на судот му даде уште една адреса на која судот може да го најде.

Сите обвинети во „Титаник 2″, освен Мијалков, одговараат за злоупотреба на службената положба и овластување, а ексдиректорот на УБК ќе одговара за кривичното дело „примање награда за противзаконито влијание”.

Инаку, поранешниот член на ДИК, Бедредин Ибраими од ДПА, обвинет во „Титаник 2“ за изборни нерегуларности, дојде без адвокат во судница. Него по службена должност судот му одредил бранител, кој Ибраими сакаше да го отповика, но судијата му посочи дека адвокат мора да има.


Прифатено обвинението за „Титаник 2“, на обвинителна клупа Мијалков и Тачи


Скопје, 7 декември, 2017 - 10:04 (META) 

Советот за оценка за обвинителен акт при Основниот суд Скопје 1 го прифатил обвинението на СЈО за предметот „Титаник 2“, во врска со изборни нерегуларности.

Во случајот обвинети се поранешниот шеф на УБК, Сашо Мијалков, лидерот на ДПА, Мендух Тачи, членот на ДИК од ВМРО-ДПМНЕ, Сашо Срцев, како и поранешните членови на ДИК, Бедредин Ибраими и Анета Стефановска и Влатко Сајковски.

Советот не го прифатил предлогот за злоупотреба на службената положба да одговараат и петте судии од Управниот суд. Претходно судскиот совет им го одзеде имунитетот на управните судии Билјана Никодиновска-Петровска, Лидија Ивановска, Благородна Рангелова, Анета Џигерова и Газмент Фејзула, кој ги штитеше од кривична одговорност.

Предметот „Титаник 2“ се однесува на местење резултати на локалните избори во 2013 година. Според „бомбите“ што ги објави опозицијата, Мијалков и Тачи се договарале за гласање во однос на поднесени приговори до ДИК.

Апелацискиот суд одлучи прислушуваните разговори да бидат употребени како докази во постапката.


Апелација одлучи две „бомби“ да бидат доказ за случајот „Титаник 2“


Скопје, 22 ноември, 2017 - 11:50 (META) 

Апелацискиот суд денеска соопшти дека две снимки од преслушуваните разговори кои беа јавно објавени ќе бидат доказ за предметот „Титаник 2“, во кој обвинети се лидерот на ДПА, Мендух Тачи, и поранешниот директор на УБК, Сашо Мијалков, поранечните членови на ДИК, Бедредин Ибраими, Анета Стефановска и Влатко Сајковски, актуелниот член на ДИК, Сашо Срцев, како и петте судии на Управниот суд: Билјана Никодиновска-Петровска, Лидија Ивановска, Благородна Аранѓелова, Газмент Фејзули и Анета Џигерова.

Судиите од Апелацискиот суд по вчерашната седница одлучија да бидат прифатени како доказ двете снимки, од кои на едната се слуша како Мијалков и Тачи се договараат за гласање по однос на приговори на изборите во ДИК.

На вчерашната седница на Апелацискиот суд присуствуваа специјалните обвинители Фатиме Фетаи и Гаврил Бубевски, но не и одбраната на обвинетите, која не се појави на јавната седница.

Следната недела Апелацискиот суд ќе одлучува дали бомбите ќе бидат доказен материјал за случаите „Титаник“ и „Тортура“.