Буџетот за 2019 денеска на пленарна седница во Собранието


Скопје, 19 декември, 2018 - 12:33 (META) 

Повисоки стапки на економски раст, подобар животен стандард на населението, владеење на правото, повисоко ниво на социјална правда и зачленување во ЕУ и НАТО.  Ова се клучните цели и приоритети на Владата, што е рефлектирано и во предлог-буџетот за 2019 година, истакна министерот за финансии Драган Тевдовски во експозе на предлог-буџетот на пленарната седница во Собранието.

Вкупните приходи на буџетот за 2019 година се планирани на ниво од 210,8 милијарди денари, а расходите се планирани на 228,5 милијарди денари. Буџетскиот дефицит е 17,7 милијарди денари, односно 2,5 проценти од БДП, што е намалување во однос на годинава за половина милијарда денари, или за 0,2 процентни поени како процент од БДП.

Како што истакна Тевдовски намалувањето на дефицитот најдобро ја одразува определбата на Владата за постепена фискална консолидација, која ќе се постигне преку строга контрола и силна буџетска дисциплина при намалување на помалку продуктивните расходи.

За капитални инвестиции се издвојуваат 26 милијарди денари. Во 2019 година планирано е инвестирање во повеќе области. За капитални расходи за патната и железничка инфраструктура планирани се 5,2 милијарди денари. За капитални инвестиции во енергетска и комунална инфраструктура проектирани се 5,5 милијарди денари. За уредување на технолошко индустриските развојни зони планирани се 631 милиони денари. За здравствениот сектор планирани се капитални инвестиции во износ од 1,3 милијарди денари. За образованието, детската заштита и спортот проектирани се капитални инвестиции во износ од 2,8 милијарди денари. Во насока на поддршка на земјоделскиот сектор предвиден е зголемен обем на капитални инвестиции во износ од 3,3 милијарди денари, кои се наменети за рурален развој, изградба на хидросистеми и инвестиции за подобрување на конкурентноста и модернизација на земјоделските стопанства.

Во областа на правосудството планирани се средства во износ од 529 милиони денари.

„Предлог-буџетот за 2019 се базира на очекувањата дека во домашната економија ќе продолжи силниот позитивен ефект на приватниот сектор. Политичката стабилност, отворањето на евро-атлантските перспективи и враќањето на довербата кај инвеститорите се очекува да придонесат кон раст на приватните инвестиции. Бруто-инвестициите во 2019 година ќе бидат повисоки за 4,2 проценти на реална основа. Растот на платите и вработеноста во приватниот сектор, поддржан од владините мерки и проекти, ќе придонесат кон зголемување на приватната потрошувачка. Ќе продолжат позитивните движења кај надворешната трговија, со очекуван реален раст на извозот на стоки и услуги од 8,5 проценти, при реален раст на увозот од 6,8 проценти“, рече Тевдовски.

Согласно ваквите очекувања реалниот економскиот раст во 2019 година ќе забрза на 3,2 проценти.


Заев апелира до општините да ги искористат парите наменети за капитални инвестиции


Скопје, 14 декември, 2018 - 16:40 (META) 

Во 2019 година за рамномерен регионален развој издвоивме за 100 отсто повеќе пари во однос на 2017, или за над 50 насто повеќе во однос на 2018 година, рече денеска премиерот Зоран Заев на конференцијата „Децентрализација: Патот што претстои“, во организација на ЗЕЛС и ОБСЕ.

„Од 3,5 милиони евра во 2017 та година, за наредната година за проекти за рамномерен регионален развој во планските региони и во општините, се обезбедени седум милиони евра. Наша цел е овие средства континуирано да се зголемуваат се до целосната трансформација и целосното насочување за реализација на Законот за рамномерен регионален развој по кој треба да се обезбедат законските еден процент од БДП  со зафаќање од капиталните инвестиции кои што би се распределувале според степенот на развиеност во сите плански региони“, изјави Заев.

Тој додаде дека се работи и на тоа да се обезбедат 70 милиони евра од Светска банка за изградба и реконструкција на локални патишта и 50 милиони евра од Европската инвестициона банка за изградба и реконструкција на водоводи и канализации.

„Станува збор за кредитни линии кои ќе станат оперативни уште почетокот на 2019. Во овој процес е важно општините да имаат изработено квалитетни и ревидирани проекти кои ќе ги доставуваат до Министерството за транспорт и врски за да можат да повлекуваат повеќе пари од кредитните линии и да започнат со реализација на проектите. Токму преку овие најсериозни капитални инвестиции во локални патишта, водоводи и канализации, градинките и училиштата имаме намера паралелно со еднократната финансиската помош да ги стабилизираме општините, за да може државата да смета на овој сериозен капацитет кој што за жал во Македонија се уште не е соодветно, ниту пак доволно искористен“, додаде Заев.

Во тек е проект на изградба на канализациони и водоводни мрежи од ЕИБ во висина од 50 милиони евра, од кои остануваат уште помеѓу 10 и 12 милиони евра за реализација.

„Апелирам до општините да ги искористите овие пари. Кредитите не ги враќате вие, Владата, односно државата ќе ги враќа овие кредити и треба да се искористат овие квалитетни средства. Во 2019 година ќе станат оперативни и средствата од „ТАВ Македонија“, тоа се повеќе од 35 милиони евра. Завршуваме со анексот на договорот со „ТАВ Макеодонија“, ќе ги помине сите правни процедури, очекувањата се дека до 15-ти јануари за да може алокацијата на тие 35 милиони евра на транспарентен начин да бидат распределени за тригодишни проекти на сите општини пак за вододовди, канализации, детски градинки, за училишта и за некој од сортските сали во училиштата“, додаде Заев.


Николовски: Предлог-буџетот за 2019 за земјоделие изнесува 10,5 милијарди денари


Скопје, 21 ноември, 2018 - 15:04 (META) 

Новиот предлог-буџет за 2019 за секторот земјоделство, предвидува мерки и политики кои се во насока на унапредување на земјоделството, преку зголемување на обработливите површини, создавање услови за модерно и конкурентно земјоделско производство, порача на денешната прес конференција, министерот за земјоделство, шумарство и водостопанство, Љупчо Николовски.

Вкупниот буџет за секторот земјоделство, кој што подразбира неколку институции, е во износ од околу 10,5 милијарди денари. Во оваа сума спаѓаат основните буџети на Министерството за земјоделство, шумарство и водостопанство, Платежната агенција, Агенцијата за поттикнување на развојот на земјоделството, Агенцијата за храна и ветеринарство, Државниот инспекторат за земјоделство, Државниот инспекторат за шумарство и ловство и Управата за хидрометеоролошки работи.

Најголем дел од средствата односно над 8,5 милиони денари се алоцирани во Агенцијата за финансиска поддршка во земјоделството и руралниот развој, како институција преку која што се исплаќа финансиската поддршка за земјоделството, но и ќе се реализираат одредени капитални проекти во водостопанството.

Вкупната финансиска поддршка за земјоделството за 2019 година, планираната вкупна финансиска поддршка за секторот земјоделство за следната година е над 8,5 милијарди денари. Во оваа сума спаѓа директната поддршка, мерките за рурален развој и националното кофинансирање за европската ИПАРД.

„Конкретно, над 6,6 милијарди денари ќе бидат наменети за комплетна, навремена и неселективна исплата на финансиската поддршка од Програмата за директни плаќања. Следејќи ги политиките на ЕУ, создаваме услови за модерно и конкурентно земјоделско производство преку мерки што значат инвестиции во земјоделството. Тоа ќе го постигнеме преку Програмата за рурален развој и европската ИПАРД-програмата. На мое големо задоволство за следната година за околу 148 милиони денари ја зголемивме сумата за мерките од Програмата за рурален развој (односно за оваа намена се планирани над 1,7 милијарди денари, за разлика од годинешните 1,6 милијарди денари). Следната година обезбедуваме 90 милиони денари повеќе за националното кофинасирање за ИПАРД, или 150 милиони денари, за разлика од годинешните 60 милиони денари“, рече Николовски.

За следната 2019 година во Програмата за водостопанство која што е во склоп на буџетот на МЗШВ, се предвидени 290 милиони денари повеќе за разлика од годинава. Односно наместо годинешните 138 милиони денари, за следната година за оваа програма се планирани близу 428 милиони денари.

Следната година шумарскиот сектор ќе се поддржи со близу 194 милиони денари од кои 17,2 милиони за проширена репродукција на шумите, а останатата сума е за зачувување и обновување на шумскиот фонд во Македонија. Со цел обезбедување на квалитетна и безбедна храна за граѓаните за фитосанитарната програма се алоцирани вкупно 7 милиони денари, односно еден милион денари повеќе од годинава.

Николовски порача дека крајната цел на сите мерки планирани со буџетот за 2019 година за земјоделството е да се создадат услови за поголемо и поконкурентно производство и повисоки приходи за земјоделците.


Новиот буџет е планиран на 3,7 милијарди евра, дефицитот на 2,5 проценти од БДП


Скопје, 12 ноември, 2018 - 14:44 (META) 

Предлог-буџетот за 2019 година тежи 3,7 милијарди евра, а главните контури на овој значаен документ денеска беа презентирани на јавна дискусија со синдикатите, коморите и невладиниот сектор во Министерство за финансии, пред тој да влезе во владина процедура неделава.

Буџетот за 2018 година изнесуваше 3,4 милијарди евра.

Вкупните приходи во 2019 година се проектирани на 210,8 милијарди денари, (3,4 милијарди евра), а порастот 3,2 проценти на домашниот бруто-производ (БДП).

Министерот за финансии Драган Тевдовски рече дека економскиот пораст ќе го придвижат солидната лична потрошувачка, континуирано високиот извоз и порастот на инвестициите.

Со буџетот за 2019 година се предвидува намалување на буџетскиот дефицит, кој за следната година е проектиран на 2,5 проценти од домашниот бруто-производ (БДП).

„Со постепено намалување на буџетскиот дефицит, се води дисциплинирана буџетска политика, што пак ќе придонесе за стабилизација на државниот и јавниот долг на среден рок“, рече министерот за финансии Драган Тевдовски.

Во предлoг-буџетот за 2019 година предвидена е реформа во Фондот за пензиско осигурување, односно намалување на вкупниот трансфер. Па така, ако тој трансфер годинава изнесувал 29,3 милијарди денари, за следната година се предвидува 28,1 милијарди денари од буџетот за ПИОМ.

Нови 10 проценти повисоки плати се предвидени за лекарите специјалисти од јануари 2019 година, а нови пет проценти повисоки плати од септември 2019 година за сите вработени во јавното здравство. Пораст на платите од пет проценти се предвдидени и за просветните работници,  вработените во градинките и за јавната администрација, која како што рече Тевдовски, треба да се реформира до септември 2019 година и ќе биде клучен носител на преговорите за пристапување кон ЕУ и НАТО.

Поради интензивирање на процесот за зачленување во НАТО, зголемен е буџетот и за Министерство за одбрана на 7,8 милијарди денари, со што ќе има и нови пет проценти пораст на платите за сите вработени во одбраната од септември 2019 година.

За земјоделски субвенции и рурален развој се предвидени 8,5 милијарди денари, што е пораст за 11 проценти во споредба со 2017 година.

За капиталните инвестици, кои секоја година се кратат со ребаланс, предвидени се 25,7 милијарди денари. За поголема искористеност на овие средства, Тевдовски рече дека се прави поголем притисок кон ресорните министерства.

„Проектната документација која беше кочничар на големиот број проекти и беше проблем е готова, и затоа очекуваме интензивирање на капиталните инвестиции“, потенцираше Тевдовски.

Согласно фискалната стратегија, јавниот долг за 2019 година ќе изнесува 54,2 проценти и ќе се финансира од домашниот и странскиот пазар на хартии од вредност, но не е планирано издавање на нова еврообврзница.

Се очекува, стапката на инфлација да е ниска и стабилна, а стапката на невработеност да се намали на околу 20 проценти.


Заев: Гасоводот се гради на три делници, проектите и документациите се готови


Скопје, 31 октомври, 2018 - 15:55 (META) 

Премиерот Зоран Заев денеска на пратенички прашања во Собранието рече дека најголем дел од нереализираните проекти се во делот на железницата и на гасификацијата. Но, како што објасни, за голем дел од овие планирани инвестиции проектите се готови, подготвена е тендерска документација и очекува раздвижување на работите кон крајот на годината.

– Стопирањето на гасификацијата на Водно е најголемиот проблем за реализација на капиталните инвестиции во гасификацијата, што по пат на дијалог за важноста за животната средина го разговаравме со месеци, за да имаме инклузивен процес. И се гради. Се гради на три делници од оваа голема делница што води кон Скопје, Гостивар и Тетово, а паралелено и на втората што води кон Прилеп и Битола. На крајот на годината стигнуваат завршните изведби и очекуваме врз основа на тоа, тој процент на капиталните инвестиции да порасне – додаде Заев.


Министерство за финансии: Јавниот долг се намалува, враќаме стари кредити


Скопје, 8 август, 2018 - 12:55 (META) 

Заклучно со 2016 година, јавниот долг учествуваше со 48,5 поценти од домашниот-бруто-производ (БДП) или 4,7 милијади евра, а на крајот на 2017 година вкупниот јавен долг е намален на 47,2 проценти од БДП.

Ова денеска го одговори заменик-министерката за финансии, Ширет Елези на новинарско прашање за задолжувањето.

– Само во јануари 2018 година, Министерството за финансии исплати над 200 милиони евра долг преземен од претходните години, односно исплати кредит земен во 2013 година од 95 милиони евра, а исто така предвреме е исплатена обврзница која доспева во 2020 година – изјави Елези.

Таа потенцираше дека од 2008 до 2016 година долгот се зголемил двојно или од 23 проценти од БДП на 48,5 проценти од БДП.

Во однос на слабата реализација на капиталните инвестиции, Елизе додаде дека прават напори и ги притискаат институциите за реализација на капиталните инвестиции во наредниот период.

– Затоа правевме и одредени анализи, ако има потреба ќе се прави ребаланс на буџетот за да ги прераспределиме таму каде има потреба од буџетските корисници за да се реализираат – истакна Елези и информираше дека во буџетот има одлична наплата на приходите со реализација од 47 проценти од планираното, а буџетскиот дефицит е 0,7 проценти или една четвртина од проектираниот.


Анѓушев: Референдумот нема позначајно да влијае на економскиот раст на државата


Скопје, 31 јули, 2018 - 12:19 (META) 

Вицепремиерот за економски прашања Кочо Анѓушев денеска на прес-конференција рече дека растот на индустриското производство од 12,1 отсто во јуни во однос на истиот месец лани и растот на просечната плата забележан во мај покажуваат дека економските политики на Владата се добри и оти даваат резултати на долг рок.

Тој додаде дека економијата се мери со бројки, а не со политизирање и потребно е, како што рече мало трпение на граѓаните и бројките ќе си дојдат сами по себе.

Во однос на малиот процент на реализација на капиталните инвестиции од околу 16 проценти, Анѓушев рече дека во првите шест месеци има мал застој во реализацијата, но додаде дека е оптимист и смета дека до крајот на годинава ќе се реализираат 90 отсто од планираните инвестиции.

– Малиот застој се должи на тоа што е потребно проектите да се доведат до нормално техничко ниво за да не ни се случуваат непотребни анекси – рече Анѓушев и додаде дека реализацијата на капиталните инвестиции кај државните компании е многу повисока.

Анѓушев не очекува референдумот значајно да влијае на реализацијата на капиталните инвестиции, бидејќи како што рече, предвидено е да ја чини државата околу 3,5 милиони евра, а тоа е помалку од еден отсто од планираните 400 милиони евра за капитални инвестиции.

– Сите политички случувања, па и референдумот негативно влијаат на економијата, но ценам дека нема позначајно да влијае на економскиот раст на државата – рече Анѓушев.

Нагласи дека референдумот се организира со цел Македонија да се придвижи кон евроатланските интеграции, а токму тоа, како што кажа, значи и поголеми инвестиции во земјата и економски раст на државата и се темели на искуството на сите држави кои се приклучиле кон ЕУ и НАТО.

На новинарско прашање во однос на конфликтот на интереси поврзан со компаниите во кои тој е дел од сопственичката структура, Анѓушев рече дека не се битни тие компании.

 -Нема никаков конфликт на интереси и заобиколување на законите. Престана делењето пари зад затворени врати и класифицирани договори. Компаниите кои ги задоволуваат законските критериуми имаат право да аплицираат. Сепак овие компании се повлекоа не поради конфликт на интереси, туку затоа што сензитивноста кај јавноста е голема после подолг период. Не се битни тие две компании, ако се проблем нема да аплицираат. Треаба да гледаме што е добро за целата економија. Бројките покажуваат дека целата економија се раздвижува – рече Анѓушев.

Анѓушев: Предложениот буџет за 2018 година е најекономскиот и најреформскиот досега


Скопје, 26 ноември, 2017 - 16:31 (META) 

Вицепремиерот за економски прашања денеска, еден ден пред почетокот на комисиската расправа за буџетот за 2018 година во Собранието, на прес-конференција истакна дека од сите буџети досега, предложениот за 2018 година има најреформски и најекономски карактер.

Буџетот за 2018 година е 211,7 милијарди денари или 3,4 милијарди евра и треба да обезбеди најмалку 3,2 отсто пораст на домашниот бруто-производ (БДП), а буџетскиот дефицит е проектиран на 2,7 отсто со тенденција на опаѓање.

– Наменивме повеќе од една милијарда денари за програмата за поттикнување на вработувањето, што претставува 5 отсто повеќе во однос на 2017 година, со кои ќе стимулираме нови подобро платени работни места. Ќе ги поддржиме компаниите да исплаќаат повисоки плати, со што ќе ја отвориме спиралата за зголемување на просечната плата – посочи Анѓушев.

За програмата за економски развој, според предлог-буџетот за 2018 година се наменети 46 отсто повеќе средства, а се кратат од непродуктивни трошоци, како што е промоцијата на Македонија како бизнис-дестинација.

– За поддршка на домашни гринфилд-инвестиции се наменети повеќе од 900 милиони денари или 592 отсто повеќе во однос на ребалансот во 2017 година, 585 милиони денари или 23 отсто повеќе средства за привлекување странски инвестиции, како и 385 милиони денари за поддршка на инвестициони вложувања. Домашните и странските инвеститори имаат исти услови за инвестирање, независно дали ќе се одлучат да инвестираат во технолошко-индустриските развојни зони (ТИРЗ) или надвор од нив – додаде Анѓушев.

Инаку, расправата за буџетот за 2018 година во Комисијата за финансирање и буџет на Собранието почнува утре и според деловникот може да трае 10 дена.


Трет ден ќе се расправа за ребалансот на буџетот, седницата закажана во 11 часот


Скопје, 4 август, 2017 - 9:46 (META) 

Денеска пратениците во Собранието трет ден ќе расправаат за ребалансот на буџетот, а пленарната седница ќе почне во 11 часот.

Опозицијата ја обвинува власта дека со ребалансот на буџетот прави најголеми кратења во образованието и во здравството, дека се кратат капитални инвестиции и дека до крајот на годината не е предвидена реализација на ниту еден проект.

Министерот за финансии, Драган Тевдовски, пак, вели дека ребалансот на буџетот е реален бидејќи секој буџет досега бил лажно проектиран за да се „продава приказната дека има развој“.

Пленарната расправа за буџетот треба да трае пет дена. „Мета“ од извори од партиите дознава дека гласањето за ребалансот на буџетот ќе биде в понеделник. Во текот на викендот, само в сабота се очекува да има собраниска расправа.


Врхушката на ВМРО-ДПМНЕ барала амнестија, Заев тврди дека не прифатил


Скопје, 6 јуни, 2017 - 23:09 (META) 

Имаше барања од врхушката на поранешната владејачка партија, но тие барања беа отфрлени, изјави вечерва премиерот Зоран Заев во интервју за националниот сервис МРТВ, одговарајќи на прашањето дали во изминатиот период имало разговори за амнестија на функционери од ВМРО-ДПМНЕ. Тој истакна дека правдата мора да важи за сите, односно дека дури и неговите најблиски соработници и членови на семејството ќе треба да одговараат доколку го прекршат законот.

Новата Влада нема да урива и да разместува споменици, затоа што тоа значи дополнителни трошоци, рече Заев. Сепак, тој истакна дека „сака барем една фасада да соголи за да покаже колку е тоа грдо“, но дека тоа е само лична желба, а како премиер не може да дозволи такво трошење пари на граѓаните, како и дека е ставен мораториум за изградба на споменици.