!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Судот подготвен да одлучува за притворот на шестемина пратеници за 27 април


Скопје, 4 декември, 2017 - 15:36 (META) 

Кривичниот суд во Скопје го добил известувањето од Собранието за одзeмениот имунитет на шестемина пратеници, за кои Обвинителството за гонење организиран криминал и корупција бара притвор, и го доставил до надлежните судии на претходна постапка, соопштија за „Мета“ од судот.

„Известувањето од Собранието на Република Македонија поврзано со барањето на судот околу имунитетот на пратениците за кои е поднесен предлог од ОЈО за гонење организиран криминал и корупција е пристигнат во Основниот суд Скопје 1 – Скопје и тој е доставен на надлежните судии на претходна постапака, со што се создадени услови да се постапува по предлогот на обвинителството. Судиите на претходна постапка кои постапуваат по предлогот ги известуваат странките во конкретната постапка кога тие ќе бидат повикани да се произнесат во однос на предлогот, а по донесено решение од страна на судиите, јавноста ќе биде навремено известена“, стои во дописот од Кривичниот суд.

Оттаму не откриваат кога шестемина пратеници ќе се појават на распит во судот и кога ќе се одучува по барањето за притвор.

Собранието во петокот минатата недела, на пленарна седница одлучи да го одобри барањето на Основен суд Скопје за одземање на имунитетот и за притворање на пратениците Крсто Муковски, Љубен Арнаудов, Јохан Тарчуловски, Сашо Василевски, Љупчо Димовски и Жаклина Пешевска, поради нивното учество во насилствата што се случија на 27 април годинава во Собранието.

Тие, како и другите 30 осомничени, се товарат за терористичко загрозување на уставниот поредок и на безбедноста на државата.


ААВМУ: Медиумите имале генерално еднаков третман на партиите во првиот изборен круг


Скопје, 19 октомври, 2017 - 17:35 (META) 

Програмските сервиси на државно ниво, опфатени со надзорот на Агенцијата за аудио и аудиовизуелни медиумски услуги (ААВМУ), во првиот круг од локалните избори „генерално обезбедиле еднакви услови за пристап до сите облици на изборно медиумско претставување“, соопшти денеска Агенцијата.

Голем дел од нив, се вели во соопштението, вложиле напори да организираат и дебатни соочувања на учесниците на изборите. Во овој контекст, од Агенцијата забележуваат дека дел од кандидатите учествувале во посебни информативни емисии кај едни медиуми, а не одговориле на поканите на други медиуми.

„Јавниот радиодифузен сервис и Собранискиот канал ги исполнија обврските да обезбедат бесплатно политичко претставување, кое учесниците во изборната кампања го искористија со различен интензитет. Карактеристично е што партиите на Албанците во Македонија не ја искористија можноста за бесплатно претставување“, стои во соопштението.

Во последните девет дена од изборната кампања (од 5 до 13 октомври), радиофузерите што емитуваат програма на македонски јазик, според ААВМУ, во вестите биле фокусирани на известување за кампањите на двете коалиции кои имаа најголем број потврдени листи со кандидати за градоначалници и за советници – едната предводена од СДСМ, а другата од ВМРО ДПМНЕ.

„Радиодифузерите што емитуваат програма и на албански и на македонски јазик имаа квантитативно подобро воедначен пристап во известувањето. И едните и другите, квалитативно настојуваа да обезбедат еднаков третман. Во овој извештаен период не беше констатирано прекршување на барањето за правично, избалансирано и непристрасно покривање на изборите“, стои во соопштението на ААВМУ.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Трајчевски: За овие избори медиумите известуваат порамномерно и попрофесионално


Скопје, 12 октомври, 2017 - 19:51 (META) 

За овие локални избори медиумите известуваат далеку порамномерно и попрофесионално во споредба со претходните два изборни циклуси, каде беше забележано нерамномерно известување и воочлива координација, рече директорот на Агенцијата за аудио и аудиовизуелни медиумски услуги (ААВМУ), Зоран Трајчевски, на денешната дебата на тема „Известување на медиумите во изборна кампања, искуства и предизвици“, што се одржа во Клубот на новинари.

Трајчевски истакна дека годинава првпат судот во Скопје постапил во законски рок по пријава на ААВМУ и донел пресуда за само 48 часа по поднесувањето. Според него, судот сè уште не ги решил предметите на AАВМУ поднесени пред две години.

Насер Селмани, претседател на Здружението на новинарите на Македонија (ЗНМ), рече дека постои тренд на намалување на нападите врз новинарите. За разлика од предвремените парламентарни избори во декември минатата година, кога беа регистрирани два физички напади на новинари, во оваа изборна кампања нема ниту еден физички напад, а регистрирани се само вербални закани.

– Полицијата почна сериозно да ги истражува нападите, но загрижува фактот дека од 54 напади ниту еден напаѓач не е казнет од судовите. Тоа покажува јасна политика на неказнивост. Само 10 случаи се целосно истражени и поднесени се пет кривични и уште толку прекршочни пријави. Со политиката на неказнивост не можеме да очекуваме подобрување на слобода на говорот – рече Селмани, кој се заложи за изградба на ефикасен институционален механизам за превенција на насилство против новинари, во кој ќе учествуваат полицијата, обвинителството и судот.

Дебата во Клубот на новинари беше организирана од „Онлимит медиа“ и од ЗНМ, а финансиски поддржана од „Цивика мобилитас“.


МТВ ѝ порача на ААВМУ: Известуваме повеќе за ВМРО-ДПМНЕ оти имаа реакции за отчетите


Скопје, 3 октомври, 2017 - 16:33 (META) 

Првиот канал на МТВ денеска реагираше на забелешките на Агенцијата за аудио и аудио-визуелни медиумски услуги (ААВМУ) во извештајот од надзорот на медиумското известување во периодот од 16 до 24 септември 2017 година, дека МТВ1 не ја следела одредбата за избалансираност во известувањето за активностите на политичките партии од опозицијата што се претставени во Собранието.

Од првиот канал на МТВ реагираат велејќи дека од почетокот на кампањата известуваат според правилата за медиумско покривање на изборите и според законите, а дисбалансот за кој се зборува во извештајот на ААВМУ е поради времето што го отстапила на ставовите на најголемата опозициска партија за работата на Владата.

„Во извештајот на ААВМУ, и во делот на застапеноста на субјектите во претежно информативните жанрови и во директните обраќања на субјектите, Владата е најзастапена и следствено на тоа отстапено е соодветно време за опозицијата. Во овој контекст, треба да се има и предвид дека во надгледуваниот период имаше отчети на министрите за сработеното во првите сто дена на кои реагираа претставници на опозицијата. Поради тоа што, освен избалансираност, се бара и објективност во информирањето, МТВ1 ги почитува и повисоките законски акти, како што е Законот за аудио и аудио-визуелни медиумски услуги, кој бара објективност, навременост и точност, а го почитува и највискиот правен акт, Уставот, кој забранува цензура“, се вели во реакцијата од МТВ 1.

 

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ – Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка од „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


АВМУ: ТВ „Нова“ и „Алфа“ се пристрасни, а другите медиуми пласираат псевдовести


Скопје, 12 септември, 2017 - 11:04 (META) 

Радиодифузерите продолжуваат да ја следат веќе востановената уредувачка политика при известувањетo, при што особено се истакнува непочитувањето на професионалното начело за еднаков третман на различните гледишта, се вели во извештајот од надзорот на изборното медиумско известување за периодот од 27 август до 5 септември 2017 година, што го спроведува Агенцијата за аудио и аудиовизуелни медиумски услуги (АВМУ).

Агенцијата ги издвојува ТВ „Алфа“ и ТВ „Нова“ поради начинот на известување, односно непочитување на професионалното начело за еднаков третман на различните гледишта. Притоа се одбележани и уште три други прекршувања сторени од телевизијата „Нова“.

„Во емисијата „Отворено студио“, со наслов „За или против геј бракови“, емитувана на 10 август 2017 година, телевизијата постапи спротивно на начелата за еднаквост на правата и слободите на луѓето по сите основи и за објективно и непристрасно прикажување на настаните“, се вели во извештајот.

За оваа емисија вчера реагираше и Советот за етика на медиумите, велејќи дека мислења биле камфулирани како факти и било предизвикано засилување на стереотипите.

Втората работа што е одбележана од АВМУ во врска со ТВ „Нова“ е  прилогот „Обвинителен акт против гинекологот кој презентирал лажна бременост на пациентка“, емитуван на 31 август 2017 година, кој според оценката на регулаторот не го почитувал и начелото на презумција на невиност.

За телевизијата „Алфа“ се вели дека има голем обем на информации во вестите за едно политичка опција, што укажува на непочитување на професионалното начесно за еднаков третман на различните гледишта во дневно-информативните емисии. Кај ТВ „Нова“, пак, регулаторот таков пристап забележал во целокупната програма.

„Телевизијата донесе уредничка одлука директно да ги пренесува прес-конференците на претседателот на ВМРО-ДПМНЕ, Никола Груевски, на 3 и 5 септември. Ваков третман не добиваат прес-конференциите на ниту еден друг субјект“, се вели во извештајот на АВМУ.

Во однос на следењето на сите медиуми, АВМУ забележала создавање, како што се вели, „псевдовести“ и „псевдонастани“.

„Исто така, продолжува практиката при известувањето за комуникацијата на релација власт – опозиција, при која неретко се јавуваат „псевдонастани“, кои потоа се преточуваат во „псевдовести“, некои од телевизиите и радијата да држат дистанца од ваквата матрица, а некои од нив – да ја пресликуваат“, велат од АВМУ.

 

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Централен регистар известува за ново работно време од 1 септември


Скопје, 25 август, 2017 - 12:25 (META) 

Централен регистар известува дека работното време од 1 септември ќе биде од 8 до 16 часот. Претходното работно време на Централен регистар беше од 8.30 до 16.30 часот.

Во соопштението испратено до медиумите не се наведува причината за промената на работното време на оваа институција.


ЗНМ ги осуди заканите на симпатизери на ДУИ кон екипа на ТВ „Шења“


Скопје, 19 јули, 2017 - 15:13 (META) 

Здружението на новинарите на Македонија (ЗНМ) ги осуди заканите на симпатизерите на ДУИ кон екипа на телевизијата „Шења“, која вчера била попречена во известувањето за комуналните проблеми во општина Чаир.

„Ги повикуваме надлежните институции да ги идентификуваат насилниците и да ги изведат пред лицето на правдата. Насилството против новинарите и медиумските работници е неприфатливо и претставува напад врз демократијата“, стои во соопштението на ЗНМ.

Од здружението нагласуваат дека државата има обврска да обезбеди ефикасен систем на превенција и казнување на насилството врз новинарите, што е основен услов за подобрување на состојбата со слободата на говорот.


АВМУ ја прекори МРТ дека не известувала навремено за нередите во Собранието


Скопје, 3 мај, 2017 - 18:41 (META) 

Агенцијата за аудио и аудиовизуелни медиумски услуги (АВМУ) денеска со допис до програмскиот совет на „Македонската радиотелевизија“ ја прекори МРТ за ненавремено информирање за случувањата во Собранието на 27 април. Агенцијата побара овој орган, кој има законска обврска да ги штити интересите на јавноста во поглед на програмските содржини што ги емитува јавниот сервис, да го преразгледа известувањето на МРТ.

„Ваквиот повик се должи, пред сè, на тоа што јавниот сервис не обезбеди навремено информирање за настаните во Собранието, делови од репортерските јавувања не беа во согласност со улогата и со функциите на јавен радиодифузен сервис и не беа организирани актуелно-информативните програми во кои ќе се дебатира за овие општествено-политички случувања кои се од исклучителен јавен интерес“, наведува АВМУ.

Агенцијата во соопштението посочува дека известувањето мора да се разгледува во поглед на членовите 110 и 111 од Законот за аудио и аудиовизуелни медиумски услуги.

„Ова особено се однесува на обврските: да обезбеди постојано, вистинито, целосно, непристрасно, праведно и навремено информирање за сите важни политички и други настани и случувања во Република Македонија; да ја промовира и да ја унапредува културата на јавен дијалог и да овозможи арена за широка јавна дебата по прашања од јавен интерес, како и да обезбеди непристрасни, сеопфатни и важни информации и нив да ги презентира јасно, недвосмислено и на начин на кој граѓаните ќе имаат можност слободно да го формираат своето мислење“, се вели во дописот од Агенцијата за аудио и аудиовизуелни медиумски услуги.


Иванов го известил Жбогар дека ќе почне консултации со партиите за состав на влада


Скопје, 30 јануари, 2017 - 17:16 (META) 

Претседателот на државата, Ѓорге Иванов, денеска имал средба со амбасадорот на Европската Унија во Македонија, Семуел Жбогар, на која било разговарано за актуелната политичка состојба, по неуспешниот обид на лидерот на ВМРО-ДПМНЕ, Никола Груевски, да формира нова влада.

Амбасадорот Жбогар, како што информираат од кабинетот на Иванов, ги пренел ставовите на Европската Унија во врска со ова прашање.

Иванов на средбата го известил евроамбасадорот дека „откако ќе добие официјално известување од Собранието на Република Македонија дека не е поднесена програма и предлог за состав на нова влада, ќе почне консултации со надлежните институции и со политичките партии“.

Портпаролката на Евроската комисија, Маја Коцијанчич, денеска на прес-конференција истакна дека Европската Унија очекува од претседателот на државата, Ѓорге Иванов, „да изврши итна и отворена консултација“ со политичките партии во земјата и „бргу да определи лидер за формирање влада“.


Ад хок телото за медиуми поведе прекршочни постапки против две телевизии


Скопје, 29 ноември, 2016 - 13:39 (META) 

Ад хок телото за медиуми поведе прекршочни постапки против телевизиите „Нова“ и „Алфа“, за прекршоци од членот 75, став 1 на Изборниот законик.

Комисијата на денешната седница отфрли предлози за поведување прекршочни постапки против телевизиите „Телма“ и „24 Вести“, за истиот член од законот, со кој се бара правично, балансирано и коректно известување во текот на предизборниот период.

Вчера, Комисијата донесе одлука за поведување прекршочна постапка и против телевизија „Сител“, а беше отфрлено барањето за постапка против телевизија „Алсат“.