!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Касами: Хан даде поддршка за опцијата за формирање влада


Скопје, 21 март, 2017 - 16:22 (META) 

Еврокомесарот за проширување и за добрососедска политика, Јоханес Хан, и тројцата европратеници, Иво Вајгл, Едвард Кукан и Кнут Флекенштајн, даваат поддршка за излез од кризата и бараат да гледаме повеќе кон иднината на државата отколку за личниот интерес, изјави лидерот на Движењето Беса, Билал Касами, по средбата со бриселската четворка.

– Денеска имавме уште една посета на еврокомесарот Јоханес Хан која ѝ е неопходна на Македонија во ситуацијата во која се наоѓа. Членовите на делегацијата ја даваат поддршката за да излеземе од кризата. Во овој правец работи и Беса, не гледајќи на личниот интерес затоа што сè уште има сили во Македонија кои сакаат да нè турнат во меѓуетничка криза, што е многу лошо за земјата – рече Касами.

Тој истакна дека Хан дал поддршка на опцијата за формирање влада, за што има 67 пратеници и додаде дека не постои никаква „тиранска платформа“ туку декларација.


Доаѓаат Хан и бриселската тројка, никој не ја потврдува средбата со Иванов


Скопје, 21 март, 2017 - 10:05 (META) 

Еврокомесарот за проширување и за добрососедство, Јоханес Хан, заедно со тројцата европратеници Иво Вајгл, Едвард Кукан и Кнут Флекенштајн, попладнево пристигнува во неколкучасовна посета на Македонија во обид да помогне да се најде решение за политичката криза во земјава.

Хан и тројцата европратеници, како што вчера соопшти портпаролката Маја Коцијанчич, ќе се сретнат со политичките лидери. Засега, ниту од Европската комисија, ниту од кабинетот на претседателот на Република Македонија не потврдуваат дали бриселската четворка ќе се сретне со претседателот Ѓорге Иванов.

Коцијанчич соопшти дека за време на посетата ќе биде повторен ставот на ЕУ дека треба да се почитува исходот од изборите и да се дозволи продолжување на демократските процеси со брзо формирање реформски ориентирана влада, која ќе продолжи со имплементација на Договорот од Пржино.

Еврокомесарот Хан, во петокот, во интервју за „Дојче веле“, им порача на македонските политичари да се држат до Договорот од Пржино, но и ги предупреди дека „не треба да мислат дека со изборите и со формирањето на новата влада, сите проблеми би биле решени“. Мешањето на албанскиот премиер Еди Рама, кој се јави како посредник меѓу албанските политички партии при составувањето на платформата, Хан го оцени како контрапродуктивно.


Хан и тројцата европратеници во вторник доаѓаат во Македонија, потврди Коцијанчич


Брисел, 17 март, 2017 - 12:55 (META) 

Еврокомесарот за добрососедска политика и за проширување, Јоханес Хан, во вторник ќе допатува во Скопје, заедно со тројцата европратеници Едвард Кукан, Иво Вајгл и Кнут Флекенштајн, потврди денеска портпаролката на Евопската комисија, Маја Коцијанчич.

– Како што можете да видите на агендата, комесарот Хан во вторник, на 21 март, ќе патува во Скопје, заедно со тројцата европратеници кои добро ги познавате, Флекенштајн, Кукан и Вајгл. Тие заедно ќе се сретнат со претставници на сите парламентарни политички партии, како и со претседателот (Ѓорге) Иванов. Тие ќе ја повторат цврстата порака на ЕУ да се почитуваат изборните резултати и да се овозможи демократските процеси да продолжат и брзо да се формира влада што ќе продолжи да го имплементира Договорот од Пржино – рече Коцијанчич.

Таа потсети дека вчера, на Самитот на шесте западнобалкански лидери во Сараево, Хан ја истакнал неопходноста од регионална соработка и предупредил на ризикот од подгревање на тензиите, вклучувајќи ги и меѓуетничките, со изјави и со дејства што можат да ги поткопаат добрососедските односи.

На прашање дали се подготвува „Пржино 3“, Коцијанчич истакна дека ставот на Комисијата е дека Договорот од Пржино треба целосно да се имплементира.

– Сметаме дека покрај работите што треба да се случат е тоа што Договорот од Пржино, каков што го знаете, треба да се имплементира – рече Коцијанчич.


Кој побара Иванов да ја повлече одлуката, а кој го поддржа?


Скопје, 8 март, 2017 - 11:43 (META) 

Генералниот секретар на ОБСЕ, двајца еврокомесари, министри на земји членки на ЕУ, амбасадорот на САД во Македонија, министерката за надворешни работи на Канада и заменик-помошникот државен секретар на САД за европски и евроазиски прашања досега побараа македонскиот претседател, Ѓорге Иванов, да ја преиспита својата одлука да не го додели мандатот на СДСМ, кој обезбеди 67 пратенички потписи, односно мнозинство во Собранието.

Генералниот секретар на ОБСЕ, Ламберто Заниер, минатата недела на „Твитер“ изрази загриженост поради одлуката на претседателот Ѓорге Иванов да не го додели мандатот на лидерот на СДСМ, Зоран Заев:

„Загрижен сум поради развојот на настаните во Скопје. Владеењето на правото мора да надвладее. Резултатите од декемвриските избори се цврста основа за формирање влада што ќе ги застапува интересите на сите граѓани“.

Високата претставничка за надворешна политика на Европската Унија, Федерика Могерини, за време на посетата на Македонија, побарала од Иванов да ја ревидира својата одлука во интерес на волјата и на интересот на сите граѓани:

„Никаде во демократскиот свет не може на парламентарното мнозинство, кое го претставува мнозинството на граѓаните во унитарна држава, да не му се дозволи да формира влада. Побарав од Иванов да ја ревидира својата одлука во интерес на волјата и на интересот на сите граѓани, согласно Уставот на Македонија, кој вели дека мандатот се дава на лидерот кој има мнозинство во парламентот“.

Еврокомесарот за проширување и за соседска политика, Јоханес Хан, порача дека „во демократија мора да се признае парламентарното мнозинство, иако некому тоа можеби не му се допаѓа“:

„Сите лидери, вклучително и претседателот, мора да го почитуваат исходот од последните избори. Политичките лидери и институции да дозволат демократските процеси да течат, во интерес на граѓаните“.

Aмбасадорот на САД во Македонија, Џес Бејли, минатата недела  го повика претседателот на државата, Ѓорге Иванов, повторно да ја разгледа својата одлука:

„Сметаме дека ова не е конзистентно со основните демократски принципи и со владеењето на правото, кои се клучни вредности на НАТО. Како стратешки партнери на Македонија и како пријатели, со цела почит кон суверенитетот и кон унитарноста на Македонија, го повикуваме Иванов повторно да ја разгледа одлуката“.

Се огласи и британскиот министер за Европа, сер Алан Данкан, со порака објавена на веб-страницата на британската канцеларија за надворешни работи:

„67 новоизбрани пратеници кои претставуваат различни заедници во Македонија побараа да формираат влада. 67 од 120 е јасно мнозинство. Претседателот Иванов треба да си ја преиспита одлуката“.

Шефот на германската дипломатија, Зигмар Габриел, изјави дека е вознемирен од состојбата во земјава и побара Иванов да ја преиспита одлуката:

„Претседателот Иванов го лишува досегашниот лидер на опозицијата од мандатот за формирање влада, иако тој го обезбеди парламентарното мнозинство зад себе. Тоа е спротивно на демократските принципи и на европските вредности, на кои земјата се обврза. Претседателот Иванов би требало да ја преиспита оваа одлука и да ја коригира во интерес на граѓаните на својата земја“.

Повик да се почитува демократската одлука на граѓаните и да се прифати секое демократски договорено мнозинство упатија и тројцата европарламентарци Едвард Кукан, Кнут Флекенштајн и Иво Вајгл:

„Од суштинско значење е исходот од изборите и волјата на народот да се почитуваат и да се овозможи да се одвиваат демократските процеси, како што би се очекувало во едно демократско општество“.

На почетокот на оваа недела, и канадската министерка за надворешни работи, Кристија Фриленд, испрати соопштение во кое ги повика македонските политички лидери да дозволат формирање влада без одложување, а претседателот Иванов да ја изврши својата уставна обврска:

„Канада ги повикува македонските лидери да го дозволат формирањето на новата влада без одложување. Апелираме до сите страни да продолжат со поддршката и со зајакнувањето на нашите заеднички демократски принципи, вклучително и почитување на демократските институции и владеењето на правото. Апелираме и до претседателот на државата да ја изврши својата уставна обврска и да го прифати формирањето на новата влада што следува по парламентарните избори во Македонија одржани на 11 декември 2016 година“.

Загриженост за актуелната состојба изрази и холандскиот министер за надворешни работи, Берт Кундерс, кој повика на почитување на парламентарното мнозинство и на смирување на тензиите:

„Сметам дека постои парламентарно мнозинство и дека Македонците треба да одлучат за тоа. Ние сме загрижени поради вербалната агресија во земјата. Мислам дека нештата мора да се решат на мирен начин и ги повикувам сите партии да го сторат тоа на мирен и на демократски начин“.

Заменик-помошникот државен секретар на САД за европски и евроазиски прашања, Хојт Брајан Ји од Загреб ги повика сите страни во Македонија да бидат подготвени на компромис и да се формира нова постизборна влада:

„Искрено се надеваме дека македонскиот претседател ќе им овозможи на пратениците кои изразија желба за тоа и на партиите што тие ги претставуваат да формираат влада што е можно поскоро, бидејќи на Македонија ѝ треба влада која ќе ги продолжи и ќе ги доврши почнатите процеси во рамки на претпристапниот процес на Европската Унија“.

Државниот секретар на Франција за европски прашања, Арлем Дезир, во изјава за актуелните политички случувања во Македонија порача дека Уставот, резултатите од парламентарните избори од 11 декември 2016 година и демократските принципи треба да се почитуваат:

„Франција со големо внимание ги следи најновите политички случувања во Скопје. Ние ја поддржуваме заложбата на високата претставничка за надворешни работи и безбедносна политика на Европската Унија, Федерика Могерини, за излез од политичката криза, за време на нејзината неодамнешна посета на Република Македонија и апелираме за брзо формирање на влада која ќе ги спроведе реформите како предуслов за натамошно приближување на земјата кон Европа“.

Специјалниот ополномоштеник на Министерството за надворешни работи на Германија за Југоисточна Европа, Турција и за ЕФТА-државите, Кристијан Хелбах, по средбата со претседателот Ѓорге Иванов, шефот на македонската дипломатија, Никола Попоски, и со лидерите на политичките партии во Македонија, рече дека е потребно брзо формирање влада која ќе биде посветена на имплементирање на реформските приоритети.

„Ние сме уверени дека претседателот Иванов ќе покаже мудрост, ќе ги почитува резултатите од неодамнешните избори и ќе овозможи мнозинството во Собранието да формира влада што е можно поскоро“.

Соединетите Американски Држави се разочарани што претседателот Иванов одби да им понуди можност да ја формираат новата влада на претставниците кои имаат јасно парламентарно мнозинство и бара од него да ја преиспита својата одлука, стои во соопштението од обраќањето на шефицата на Мисијата на САД во ОБСЕ, Кејт Брнс во врска со политичката ситуација во Македонија.

„Заедно со нашите сојузници во НАТО и партнерите од ЕУ, САД внимателно го следат процесот на формирање на влада во Македонија, по парламентарните избори на 11 декември 2016 година. САД се разочарани што претседателот Иванов одби да им понуди можност да се формира новата влада на претставниците кои имаат јасно парламентарно мнозинство. Ние сметаме дека оваа одлука не е во согласност со заложбите на ОБСЕ, основните демократски принципи и владеењето на правото, што се основни вредности на оваа организација. Како стратешки партнер и пријател на Македонија, како и со целосно почитување на суверенитетот и единството, Мисијата на САД во ОБСЕ бара од претседателот Иванов да ја преиспита својата одлука“.

Руското МНР со соопштението од 2 март и со изјавата следниот ден го поддржа Иванов:

„Еврокомесарот Јоханес Хан, високиот претставник за надворешна и безбедносна политика на ЕУ, Федерика Могерини, генералниот секретар на НАТО, Јенс Столтенберг, и други претставници на т.н. „просветлена Европа“, продолжуваат бесрамно да вршат невиден притисок врз македонскиот претседател Ѓорге Иванов, барајќи од него премиерскиот мандат да го даде на опозицијата, која ја прифати ултимативната „албанска платформа“.

Европратеничката Маријана Петир, која претседава со групата на пријатели на Македонија во Европскиот парламент, изрази загриженост за политичката состојба во Македонија и за „прифаќањето на платформата на албанските партии од страна на СДСМ“ и побара да се разгледа можноста за одржување нови избори.

„Условите на трите партии кои ја застапуваат албанската заедница во Македонија, кои по изборите формираа т.н. ‘албанска платформа’, не се во согласност со Уставот на Република Македонија…Со неа се бара на албанската заедница, која веќе ги ужива сите малцински права, да и се даде статус на државотворен народ. Доколку не е возможно да се постигне коалиција меѓу двете најголеми партии во Македонија, не треба да се исклучува одржувањето на нови избори како решение за кризата“.


Кукан, Флекенштајн и Вајгл ќе препорачаат ЕП да го одложи донесувањето на извештајот


Брисел, 2 март, 2017 - 22:57 (META) 

Ги повикуваме претседателот и сите политички партии да ја почитуваат демократската одлука на граѓаните на земјата и без понатамошно одложување да го прифатат секое договорено парламентарно мнозинство, се вели во заедничката изјава на тројцата европарламентарци Едвард Кукан, Кнут Флекенштајн и Иво Вајгл во врска со актуелните политички случувања во Македонија.

– Како што неколкупати кажавме заедно со комесарот Хан, очекуваме новата влада да биде базирана на сеопфатен, реформски консензус и на меѓуетничка соработка. Апелираме на одговорност од претседателот и сите политички партии да се воздржат од какви било провокативни изјави или постапки. Од суштинско значење е исходот од изборите и волјата на народот да се почитуваат и да се овозможи да се одвиваат демократските процеси, како што би се очекувало во едно демократско општество – стои во изјавата на тројцата европарламентарци, кои беа посредници и во постигнувањето на Договорот од Пржино.

Кукан, Флекенштајн и Вајгл во изјавата нагласуваат дека неодамнешните настани може да имаат големо влијание врз европската перспектива на земјата.

– Како што стојат работите, ние сме должни да му препорачаме на Европскиот парламент одложување на планираното пленарно гласање за извештајот за земјата за 2016 година – велат тројцата европарламентарци.


Брисел порачува: Најдете заедничка основа за формирање стабилна, цврста и одговорна влада


Брисел, 25 јануари, 2017 - 16:18 (META) 

Тројцата европратеници и известувачи за Македонија, Едвард Кукан, Кнут Флекенштајн и Иво Вајгл, заедно со еврокомесарот за проширување и за добрососедска политика, Јоханес Хан, излегоа со заедничка изјава во која наведуваат дека изборите од 11 декември се важен чекор за надминување на политичката криза во Македонија.

„Овој процес мора да продолжи за државата да се врати на патот на ЕУ-интеграциите. Нема време за губење“, стои во заедничката изјава.

Дипломатите од Брисел ги повикаа политичките лидери да најдат, со целосно почитување на законските рокови, заедничка основа за формирање стабилна, цврста и одговорна влада. „Таква коалиција би требало да се потпира на силен, инклузивен, реформски консензус и на меѓуетничка соработка. Сето ова е клучно за да се врати земјата на евроинтегративниот пат, на кој сите партии се обврзаа, а кој граѓаните го посакуваат и го заслужуваат“, се вели во изјавата.

Во неа се наведува дека тоа е долгорочен процес, кој бара сите политички партии, кои ги делат тие стратегиски цели, да работат заедно за да ги направат можни неопходните промени.

„Апелираме до сите политичари да продолжат да работата на цврста и брза имплементација на Договорот од Пржино и реформски приоритети и да го поддржат Специјалното јавно обвинителство кое мора да има време и ресурси за да ја заврши својата работа на независен и неполитизиран начин“, се наведува во изјавата.


Европратениците порачаа да не се гледа СЈО како да зазема страна во изборите


Скопје, 25 ноември, 2016 - 14:22 (META) 

Европарламентарците Иво Вајгл, Кнут Флекенштајн и Едвард Кукан денеска во Скопје, по средбите со политичките партии, граѓанскиот сектор и со Специјалното јавно обвинителство, изразија задоволство од подготовките за спроведување на изборите закажани за 11 декември, како и од изборната атмосфера.

– Средбите со партиите покажаа дека тие се подготвени за фер и транспаретни избори, кои ќе се одржат во атмосфера на доверба и на транспаретност – рече Вајгл и додаде дека позитивно го оценуваат тоа што постои дух на соработка меѓу политичките партии.

Тој истакна дека од лидерите на двете најголеми македонски политички партии, ВМРО-ДПМНЕ и СДСМ, добил уверување дека изборната кампања ќе мине во најдобра атмосфера и без инциденти.

– Имаме причина да веруваме дека изборите на 11 декември ќе бидат фер и транспарентни и дека ќе бидат почеток на ново време за Македонија. Исто така, по изборите ќе биде време да се признаат резултатите од изборите и да почнат да се спроведуваат реформите кои се дефинирани со Договорот од Пржино, потпишан од сите политички партии – рече Вајгл.

Тој истакна дека имале средба и со специјалната јавна обвинителка, Катица Јанева, на која ѝ изразиле поддршка за нејзината работа.

– Истакнавме дека дека е важно СЈО да не се гледа како страна, односно заинтересирана страна во изборниот процес, за време на изборите и по нив – рече Вајгл.

Европратеникот Флекенштајн изрази задоволство од средбите со граѓанските организации, како и со организациите што ќе вршат надзор на изборите. Тој посочи дека изборите ќе бидат набљудувани од нив и од меѓународната заедница и изрази уверување дека ова навистина ќе бидат избори со тајно гласање и оти многу Македонци ќе излезат да гласаат. Флекенштајн најави дека една недела по изборите, заедно со колегите Вајгл и Кукан, повторно ќе дојде во Скопје.

Европратеникот Кукан истакна дека очекуваат фер избори кои ќе ѝ помогнат на земјата да излезе од политичката криза и оти новата влада веднаш ќе почне да ги спроведува реформските приоритети, кои се доказ за посветеноста на земјата кон евроинтеграциите.

Европратениците рекоа дека очекуваат резултатите од изборите да бидат прифатени од сите политички партии и посочија дека ќе продолжат да го надгледуваат подготвувањето на изборите, како и самиот изборен ден, заедно со набљудувачката делегација од Европскиот парламент.


Бриселската тројка на средби со Катица Јанева и со партиите


Скопје, 25 ноември, 2016 - 9:28 (META) 

Тројцата известувачи на Европарламентот за напредокот на Македонија, европратениците Кнут Флекенштајн, Едвард Кукан и Иво Вајгл, утринава пристигнаа во Скопје и ги почнаа средбите со македонските претставници, при што разговараа за подготовката за изборите и за текот на изборната кампања.

Европратениците во моментов имаат средба со специјалната јавна обвинителка Катица Јанева, а потоа е предвидено да имаат средба со лидерот на ДПА, Мендух Тачи.

Следна на агендата на европратениците е средба со лидерот на владејачката партија од албанскиот блок ДУИ, Али Ахемти, а потоа ќе се сретнат со претседателот на СДСМ, Зоран Заев.

Средбите ќе ги заокружат со заменик-претседателот на ВМРО-ДПМНЕ, Никола Попоски, по што е предвидено да дадат заедничка изјава во ЕУ Инфоцентар.

Европратениците претходно остварија средби со претставниците на граѓанскиот сектор.

Европратеникот Иво Вајгл рано утринава се сретна со претставниците на ЛДП и на на „Субверзивен фронт“, при што разговараа за човековите и за ЛГБТИ-правата во Македонија.


Вајгл, Кукан и Флекенштајн утре ќе ја скенираат ситуацијата во Македонија


Скопје, 24 ноември, 2016 - 15:37 (META) 

Известувачите на Европскиот парламент за напредокот на Македонија, европратениците Иво Вајгл, Едвард Кукан и Кнут Флекенштајн, утре ќе допатуваат во Скопје.

Бриселската тројка за време на посетата ќе направи скенирање на ситуацијата во земјата пред претстојните парламентарни избори, закажани за 11 декември. Тројцата европратеници ќе направат и анализа на подготовките, како и на досегашната изборна кампања.

Европратениците денот ќе го почнат со средба со претставниците на граѓанските организации, а потоа ќе се сретнат со лидерите на политичките партии, како и со специјалната јавна обвинителка Катица Јанева. По средбите, Вајгл, Кукан и Фленкенштајн ќе дадат изјава.

 


Јанева и СЈО се повлекоа од камерите, a не ги коментираат ни изјавите на ЕК, Хан и на Кукан


Скопје, 11 ноември, 2016 - 9:52 (META) 

Специјалното јавно обвинителство не ги коментира изјавите на еврокомесарот Јоханес Хан и наодите од извештајот на Европската комисија за напредокот на Македонија, во делот за работата на СЈО, како и изјавите на европратеникот Едвард Кукан.

Од СЈО во средата побаравме, но не добивме коментар на изјавите и на извештајот, а вчера откако се јавивме во службата за односи со јавноста, оттаму ни беше кажано дека реакција нема да има бидејќи „во практика СЈО не коментира политички изјави“.

На средата во Брисел, на прашање на „Мета“ дали Собранието треба да го продолжи мандатот на Специјалното јавно обвинителство и да има специјално одделение во судот, Хан одговори дека најважно е да има веродостојни избори, а потоа нова влада, и таа влада треба да се погрижи за овие прашања.

Претходно, пак, европратеникот Едвард Кукан, кој заедно со колегите Иво Вајгл и Ричард Ховит беа тројката од Европскиот парламент што посредуваше во преговорите меѓу партиите и постигнувањето на Договорот од Пржино, ни изјави дека Специјалното јавно обвинителство треба да биде независно во вршењето на својата работа и дека имало одредени критики за неговата работа.

– Специјалното јавно обвинителство треба да биде независно во вршењето на својата работа. Имаше одредени критики за неговата работа, поради што испративме порака да работи во согласност со Договорот од Пржино, односно делот за СЈО… Тоа што е договорено со Договорот од Пржино треба да се спроведе. СЈО доби одреден мандат и засега не гледам причина за продолжување – рече Кукан, одговарајќи на прашањето на „Мета“, како ја коментира блокадата на работата на СЈО.

На 25 октомври европските дипломати во земјава на брифинг со новинарите, меѓу другото, истакнаа дека се загрижени што СЈО се нашло во центарот на предизборните кампањи на партиите и на власта и на опозацијата, секоја за свои цели, и рекоа оти сметаат дека е подобро во овој период СЈО да биде помалку видливо во јавноста, а да ја интензивира својата работа на случаите поврзани со незаконското прислушување.

Последен пат Специјалното јавно обвинителство излезе во јавноста на 20 октомври, кога обвинителките Фатиме Фетаи и Ленче Ристоска ги презентираа истражните постапки за случаите „Топлик“ и „Тендери“.

Еден ден претходно специјалната јавна обвинителка Катица Јанева со тим од обвинители и истражители и два судски налози влезе во Управата за безбедност и контраразузнавање (УБК) заради прибирање документација од посебните истражни марки и податоци од системите за следење на комуникациите. По неколку часа, Јанева во изјава за медиумите, кои чекаа пред зградата на МВР, го обвини раководството на УБК дека ја опструира нејзината работа и не ги дава податоците. Тензиите на линија СЈО-УБК кулминираа на 21 октомври вечерта, кога од УБК беше избркан истражител на СЈО кој беше оставен да дежура, а во меѓувреме во полициска станица беше приведен негов колега бидејќи, како што соопштија од МВР, фотографирал објект на Водно, сопстевнот на ексдиректорот на УБК, Сашо Мијалков.

Јанева последен пат се појави на судењето за случајот „Пуч“, кога се скараа со судијката Љубинка Башеска поради одложувањето на судскиот процес на неопределено време.

Последната објава на интернет-страницата е од 28 октомври, кога СЈО информираше дека со помош на надворешниот експерт од шведската компанија „Ериксон“ од УБК биле извадени сите податоци што Јанева ги бараше со судски налог.