!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

ДОМ: Градовите се задушуваат, а институциите се во изборна кампања


Скопје, 25 ноември, 2016 - 17:34 (META) 

ДОМ протестира што градовите се задушуваат од загадување на воздухот, а надлежните лица од институциите се растрчани во изборна кампања!

„Нема кој да донесе одлука и да даде налог за итни мерки, ниту доволно службеници кои тоа ќе го спроведат. Партизираните институции се неспособни да си ги извршуваат своите обврски и не е доволен напорот на професионални службеници кои се вложуваат целосно за да го надоместат отсуството на претпоставените и на своите отсутни колеги“, стои во соопштението на ДОМ.

Од партијата наведуваат дека се огорчени зашто безброј пати алармирале за итни мерки против загадување, посочувајќи конкретни решенија.

„Најголем дел од предлозите досега влегоа во стратешките државни и локални планови, но никако да се реализираат целосно и ефикасно. Зошто? Затоа што за претворање од хартија во акција се потребни конкретни финансиски средства, а нив никако да ги наменат за еколошки потреби и за здравјето на граѓаните! Нема критична бројка политичари со доволно висока еколошка свест за да ги сменат приоритетите, па средствата од некои непродуктивни проекти да ги пренаменат за спречување на загадувањето и во борбата со него“, велат од ДОМ.


Македонка пронајдена мртва во својот дом во Лондон


Лондон, 18 ноември, 2016 - 19:59 (META) 

Македонска државјка (36) со потекло од Велес била пронајдена мртва изминатиов вторник во нејзиниот стан во Лондон. Нејзината цимерка, исто така Македонка, им ја соопштила веста на нејзините родители во Велес. Таа не ја знаела причината за смртта. Кусо им кажала дека нивната ќерка е однесена на обдукција, од чии резултати ќе се утврди причината за смртта, објави „Дума“.

Станува збор за девојка која петнаесет години работела и живеела во Лондон. Таа често доаѓала во Велес. Последен пат неа ја видел нејзиниот татко, кој бил да ја посети во Лондон пред еден месец.

Денеска, пренесе порталот, Министерството за надворешни работи на Република Македонија немало информација за овој трагичен настан.

Оттаму соопштија дека оствариле контакт со Амбасадата на Република Македонија во Велика Британија и се очекуваат информации за трагедијата.


Поповска се откажа од добитното место на листите, ќе го добие друг член на ДОМ


Скопје, 7 ноември, 2016 - 14:20 (META) 

Претседателката на ДОМ, Лилјана Поповска, денеска на прес-конференција информираше дека се откажува од добитното пратеничко место на листата на СДСМ.

– Се откажувам од пратеничкото место, а за ова ќе го известиме и СДСМ. Ќе се борам со еднаква страст од друга позиција, која сега се смета за недобитна. Се имам откажано од повеќе функции досега. Никогаш не сум жалела за моите постапки, нема ни сега – рече Поповска.

Поповска кажа дека по состанокот на централниот и на извршниот одбор на партијата, ќе каже на коалициониот партнер СДСМ кој ќе стои на таа позиција.

Кандидатурата на Поповска наиде на жестоки реакции во јавноста по вчерашната одлука на СДСМ таа да добие добитна позиција на кандидатската листа во втората изборна единица.


Зелените партии од Југоисточна Европа презентираа Декларација за зелена економија


Скопје, 17 октомври, 2016 - 14:26 (META) 

Зелените партии на Македонија, Србија и на Бугарија одржаа меѓународна конференција на тема „Новинарите и креаторите на политиките ја подобруваат зелената економија“.

Во фокусот на настанот беше зелената, односно циркуларната економија.

– Зелената економија е еден нов аспект на економија, кој е еден чекор понатаму во еволутивниот развој на економијата. Тоа значи дека со користење минимални природни ресурси, се изведуваат економските процеси и на крајот со минимален негативен ефект во природата се затвора процесот. Исто така, важен е и социјалниот аспект. Тоа е економија наменета од и за луѓето – рече Маја Морачанин, портпаролка на ДОМ.

На конференцијата беше презентирана Декларацијата за издржлива иднина со зелена економија во Југоисточна Европа.

Во декларацијата, зелените партии од Македонија, Србија и од Бугарија бараат да се развие старата и да се имплементира нова легислатива за да се зајакне зелената економија, да се направат национални и регионални стратегии за промовирање на оваа економија.


43-годишен тетовец живее во дом кој во секој момент може да се урне


Тетово, 19 септември, 2016 - 14:37 (META) 

Куќата на 43-годишниот Бране Глигориевски од тетовската населба Певчина, во секој миг може да се урне. Неговиот дом е стар еден век, а врнежите изминатиот период ја нарушија стабилноста на куќата. Дел од покривот и надворешните ѕидови на објекот се паднати, па тој стравува за својата безбедност.

– Страшно е да се живее тука, кога врне и дува ветер цела куќа се тресе, па од страв излегувам надвор и во дворот ја преспивам ноќта – вели Глигориевски.

Бране вели дека и локалните и централните власти неколкупати му ветиле дека ќе интервенираат во санацијата на неговиот дом или изградба на ново пристојно живеалиште, но од ветеното нема ништо реализирано.

– Сега доаѓа зима, па големите врнежи се постојано закана за мојот живот, покривот на куќата може да се урне. Апелирам институциите да ми помогнат – вели Глигориевски.

Бране живее сам. Тој е без работа, а социјална помош не може да прима бидејќи на негово име се води дотраената куќа.


Масакр во дом за лица со посебни потреби во Јапонија


Сагамихара, 26 јули, 2016 - 9:40 (META) 

Деветнаесет лица се убиени, а 45 се повредени откако 26-годишен маж утринава упаднал во дом за немоќни и за лица со посебни потреби во јапонскиот град Сагамихара и почнал да напаѓа со нож.

Осумнаесет од повредените лица се во критична состојба.

Напаѓачот подоцна сам ѝ се предал на полицијата. Засега не се открива неговиот идентитет, но се соопштува дека самиот се предал и го признал нападот. Тој, исто така, рекол дека е поранешен вработен во домот и оти нема објаснување за мотивот за масакр.


Битолчанец пронајден мртов во својот дом


Битола, 24 јули, 2016 - 12:52 (META) 

Б.Д. (53) од Битола е пронајден мртов вчера попладне, околу 17 часот, во неговиот дом, соопшти полицијата.

Доктор од итна медицинска помош констатирал смрт без видливи траги на насилство.

Увид извршила екипа од СВР-Битола, а јавен обвинител наредил обдукција врз телото на починатиот.


ДОМ: Менувањето на правилникот за квалитет на водите е скандалозно


Скопје, 14 јули, 2016 - 13:06 (META) 

Туризмот во Дојран е важен, но не повеќе од здравјето на жителите и на туристите, реагираат од ДОМ на менувањето на правилникот за мерење на квалитетот на водите.

Од партијата велат дека со менувањето на правилникот со кое се зголемува бројот на дозволени фекални бактерии во видите, Министерството за здравство само потврдува дека водата е загадена.

ДОМ бара од локалната власт во Дојран да ја почитува забраната за капење на неколку плажи.

„За брзо расчистување на дилемите во јавноста, препорачливо би било формирање на стручна комисија во мешан состав (претставници од Министерството за здравство, академската сфера, локалната власт и граѓанскиот сектор). Таа комисија може за кратко време да направи увид во состојбата на терен и да предложи ургентни мерки. Наместо чудење и негирање на резултатите од анализите, локалната власт треба итно да преземе конкретни и сериозни мерки за подобрување на квалитетот на водата во Дојранското Езеро“, велат од ДОМ.

Како мерки тие предлагаат да се санираат грешките направени при монтажата и при одржувањето на колекторскиот систем, да се отстранат дивите канализациски цевки кои се испуштаат директно во езерото и се извор на загадување, да се исчисти крајбрежниот појас од наталожена мил, изгниени трски и од друг биолошки материјал, кој го задушува еко-системот и да се постават аератори во езерото, кои ќе внесуваат кислород и ќе ги помогнат позитивните хемиски реакции, запирајќи ги негативните што се одвиваат во анаеробни услови.


ДОМ: Неселективни санкции ќе значат неправда за недолжните граѓани


Скопје, 23 април, 2016 - 14:16 (META) 

ДОМ изразува длабока загриженост поради најавите од претставници на ЕУ и на САД дека за Република Македонија ќе се воведат санкции со одземање на препораката за членство во ЕУ и безвизниот режим, стопирање на финансиската помош преку европски фондови и Светска банка и ред други казни.

„Тоа не само што не води кон решение на политичката криза, туку ќе значи неправда кон македонските граѓани. Зошто камшик по сите, поради грев на поединци? Граѓаните бараат правда, а ќе добијат неправда! Овие санкции би биле само шематско „решение“ по книга“, велат од ДОМ.

Партијата е уверена дека санкциите што би ги засегнале сите граѓани, ќе одат во прилог на власта, зашто опозицијата ќе биде „докажан“ виновник за несреќата што ја снашла земјата.

ДОМ апелира до претставниците од меѓународната заедница да не преземаат неселективни санкции кои ќе ги засегнат недолжните граѓани. Наместо тоа, да ја помогнат борбата на демократските сили за да се дојде до фер и демократски избори.


Заев и Поповска: Без фер и демократски избори, нема излез од политичката криза


Скопје, 14 април, 2016 - 14:44 (META) 

Зоран Заев и Лилјана Поповска, лидери на СДСМ и на ДОМ, денеска ја потпишаа платформата за демократска Македонија. Заев рече дека борејќи се за регуларни, фер и демократски избори, испраќаат заедничка порака дека ова е првиот чекор кон нормализација на државата.

„Начелата како враќање на правдата, правната држава, професионализација на полицијата, департизација и деполитизација на институциите, вредностите од аспект на еднаквоста и на рамноправноста на граѓаните, се сериозни пораки зад кои сите застануваме и се здружуваме. Во тоа име, поради овој документ кој е сè повеќе поддржан, испраќам порака кон сите наши граѓани за ненасилство, за мирен протест доколку одлучиле да протестираат“, рече Заев.

Лидерот на СДСМ рече дека денеска ќе се приклучи на протестите како граѓанин, но апелира на мирни протести и на јасни пораки.

Поповска рече дека нејзината партија е убедена дека без фер и демократски избори нема излез од политичката криза.

„За нас е особено важно во сите овие настапи на демократските сили да се настапува принципиелно, одмерено, умерено и да се учествува на мирен начин на протестите“, рече Поповска.