Плевнелиев: Бојкотот е голема грешка на ВМРО-ДПМНЕ


Софија, 18 октомври, 2018 - 15:01 (META) 

Бојкотот на референдумот беше повеќе од очигледен. Тој е голема историска грешка на политичката партија ВМРО-ДПМНЕ, која застана зад него. Зошто е грешка? Затоа што кога имаме момент од историска важност, не се криеш зад отсуството на опозиција. Ако се против, требаше да ја кажат позицијата. Но тоа што водечката опозициска партија се скри зад бојкот на инает, без никакви аргументи, тоа не помага на државата и на демократијата.

Со таква порака се огласи поранешниот претседател на Бугарија и член на Охридската група за поддршка на Македонија за членство во НАТО, Росен Плевнелиев во интервју за „Блумбергтв.бг“.

Тој вели дека одлуката на ВМРО-ДПМНЕ ги испровоцирала проевропските граѓани во државата да излезат на референдумот и дури 92 проценти од нив да гласаат „за“.

– Затоа, овој референдум за мене е успех. Многу жалам што народните претставници нема да бидат на висината на очекувањата – вели поранешниот бугарски претседател.

Тој во бојкотот од ВМРО-ДПМНЕ ја гледа продолжената рака на Кремљ и ја обвини Русија дека директно го финансира национализмот на Балканот за да предизвика поделби и остварување на руско влијание.

– Речиси сите националисти и популисти во регионот, вклучително и во Бугарија се директно финансирани од Русија и застапуваат геополитички интереси на Кремљ – оценува Плевнелиев.

Според Плевнелиев, сега Бугарија, како поразвиена земја подава рака на Македонија, иако претходно улогите биле обратни.

– Во многу аспекти, Западен Балкан заостана во многу работи. Се сеќавам на времето кога бев ученик, од Благоевград одевме во Штип на таканаречените „собори“. Тоа за мене беше вонземска држава. Убава, богата, имаше сè. А денеска гледате како благодарение на членството во НАТО и Европската унија, Бугарија доби шанса се разви многу подобро и ја престигна Македонија. И ако пред 30 години, Македонија била 10 години пред нас, сега е 10 години зад нас. Ние Бугарите ја осознавме својата важност и сме фактор на пријателство и стабилност во регионот. Бугарија, заедно со ЕУ и НАТО подава рака и предлага помош на Македонија, Босна и Херцеговина, Србија и Косово. Така и со Македонија – има подадена рака, судбината чука на врата и зависи од нашите браќа во Македонија да го донесат вистинското решение – вели Плевнелиев.


Шекеринска: Собранието има историска можност и одговорност да ја отвори вратата за НАТО


Скопје, 18 октомври, 2018 - 10:24 (META) 

Собранието ја има историската можност и историската одговорност да ја отвори вратата на Македонија за членство во НАТО, вели во интервју за МИА вицепремиерката и министерка за одбрана Радмила Шекеринска која го предводи македонскиот тим кој денеска и утре во Бисел официјално ги почнува пристапните преговори за членство на Македонија во Северноатлантската алијанса.

– Доколку се обезбеди двотретинското мнозинство Македонија ќе покаже и на Европа и на светот и на регионот дека знае што сака и знае како таа цел да се исполни. Доколку надвладеат партиските и личните интереси на неколкумина тоа ќе биде голем минус за Собранието и за нас ќе значи неопходно итно закажување на предвремени избори – истакнува Шекеринска.

За можното пробивање на роковите предвидени со Преспанскиот договорот доколку се оди на избори, вели дека за Македонија е подобро процесот да заврши со успешна собраниска процедура. Но, ако таа процедура е невозможна во овој парламент тогаш редно е мандатот да се врати кај граѓаните. Ако Собранието одлучи да им даде шанса на стратешките интереси на државата, одлично. Ако не, избори се единствена опција, друга не постои, наведува Шекеринска.

Таа посочува дека се во постојан контакт со земјите партнери и со Грција и смета дека и во случај на избори можно е да се стигне навреме за грчкиот Парламент да го ратификува и Договорот од Преспа и договорот за пристапување на Македонија во НАТО.


Српски медиуми: Заев нуди амнестија во замена за двотретинско мнозинство


Белград, 15 октомври, 2018 - 16:23 (META) 

„Денот Д за Македонија“, „Историска седница на Собранието“ и „Заев понуди амнестија за двотретинско мнозинство“, се дел од насловите на многубројните новинарски текстови во Србија за денешната седница за уставните измени на македонскиот парламент.

Речиси сите медиуми велат дека премиерот Зоран Заев повикал на национално помирување и дека „на највлијателната опозициска сила ВМРО-ДПМНЕ, како гест на добра волја и понудил амнестија за нејзините членови на кои им се суди за насилствата во Собранието на 27 април минатата година“, во замена за поддршка за уставните изменни и поддршка на Договорот со Грција.

Сепак, македонскиот премиер во своето обраќање пред пратениците, иако повика на национално помирување,ниту еднаш не го употреби зборот „амнестија“.

Под наслов „Сите погледи свртени кон Собранието“, јавниот радиодифузен сервис на Србија, РТС, извести дека пратениците почнаа расправа за уставните измени и дека „паралелно со расправата, во тек е убедување на пратениците од опозицијата да го сменат ставот и да ги поддржат уставните измени“.

Таблоидот „Ало“ пишува дека почнала „опасна расправа и дека владата се подготвува за чекор против граѓаните, а во интерес на НАТО“.

Весникот „Блиц“ пак на својот портал објави дека „Заев ги повикал пратениците на опозицијата да гласаат за менување на уставот со непристојна понуда“. Блиц пишува и дека „Собранието врие“ и дека „никој не знае дали Заев има мнозинство а демонстрантите најавуваат повеќедневна блокада“.


За белградска „Политика“ Мицкоски е пантомимичар, а Иванов херој


Белград, 10 октомври, 2018 - 10:26 (META) 

Под насловот „Референдумски ајвар“, провладиниот српски  весник „Политика“ во вторникот излезе со коментар во кој оценува дека „наместо витешки да признаат дека референдумот пропаднал, европските, американските и НАТО функционерите го прогласиле за победа, што дополнително ги распали политичките страсти“.

„Лицемерието на западните владејачки политички елити и обидот за прекројување на волјата на граѓаните на Македонија коишто не се согласија да станат северни јужњаци, релативизирањето на резултатите на референдумот којшто лаконски беше оценет за консултативен, со дипломатски притисоци промената на името да се протурка во парламентот, само ќе го засили отпорот на Македонците“, пишува Александар Апостоловски во коментарот на „Политика“.

Апостоловски е соработник на порталите „Србин.инфо“ и „Академик.мк“.

Во коментарот се оценува дека „македонското гласачко тело е поделено на две длабоко завојувани страни, коишто пролеаја крв во Собранието, додека во позадина Албанците спокојно порачуваат, седејќи во Тиранската платформа, дека тие се единствените искрени американски сојузници“.

Терминот „Тиранска платформа“ главно беше наратив на ВМРО-ДПМНЕ за законот за јазиците.

Овој референдум Македонците го одлучија со молчење, се наведува во коментарот и се додава дека дури и новиот претседател на ВМРО-ДПМНЕ, Христијан Мицкоски, во кампањата се однесувал како пантомимичар, за разлика од претседателот Ѓорге Иванов, којшто, „кога остана осамен, не се скри во својата резиденција, туку од говорницата на Генералното Собрание на ОН ги критикуваше САД, ЕУ и НАТО, повикувајќи ги граѓаните да го бојкотираат референдумот“.

„Многумина ќе речат дека Македонците не ја искористија историската шанса експресно да влеззат во НАТО и да почнат преговори со ЕУ по 27 години. Можеби балканската ирационалносто повторно го победи прагматизмот“, се заклучува во текстот.


Заев: Дали има мнозинство ќе се види на гласањето, но нема поткуп


Скопје, 9 октомври, 2018 - 12:34 (META) 

Не се нудат пари на пратениците за да гласаат за уставните измени, а најдобрата опција во моментот е Собранието, а не предвремени избори, порача премиерот Зоран Заев пред новинарите денеска.

Тој рече дека дали има двотретинско мнозинство за да се направат уставните измени ќе се види дури во процедурата во парламентот, но изрази оптимизам дека може да се постигне мнозинство. Сепак, Заев негираше дека има уцени и обиди за поткуп на пратениците.

– Може да верувам дека имаме двотретинско мнозинство, а може да верувам и да немаме, но тоа ќе да се види преку дебата во комисиите, на пленарната седница во Собранието и на крај на гласањето.Јас разговарав лично со пратениците и видовме дека има прогресивна маса која е доволно сериозен мотив. Овие денови парламентот се надевам ќе има дебата. Морам да ги отстранам шекулациите за пари и незгодни состојби, ова мора да е благопријатна состојба. Секој пратеник е еднакво важен – рече Заев.

Во одговор на новинарско прашање, тој повтори дека избори ќе има само ако не се постигне договор, бидејќи нема друг начин за обезбедување на двотретинско мнозинство за носење на уставните измени кои произлегуваат од Договор со Грција.


Владата ги подготви уставните измени и ги испрати во Собранието


Скопје, 9 октомври, 2018 - 9:34 (META) 

На вчерашната 92-седница, Владата ја донела одлуката за уставните измени, односно во Собранието да ги достави измените за кои ќе бара поддршка. Тоа се случува во период кога уште не е дефинирано дека е подготвен теренот за менување на Уставот, оти за тоа е потребно двотретинско мнозинство во парламентот, односно 80 пратеници.

„Владата на РМ го утврди текстот усогласен согласно укажувањата изнесени во расправата на седницата на Владата и врз основа на член 130 од Уставот на Република Македонија и членовите 193 и 194 од Деловникот на Собранието на Република Македонија заклучи да го достави до Собранието на Република Македонија, со предлог да го разгледа Собранието и да донесе одлука за пристапување кон измени на Уставот на Република Македонија“, порачаа од Владата.

Упатија апел до сите пратеници, без разлика на политичката и националната припадност да гласаат за измените, како пат на Македонија кон стабилност, безбедност и економски просперитет.

„Од пратениците во Собранието на Република Македонија се очекува одлука во таа насока и како израз на почитување на волјата на граѓаните коишто гласаа на референдумот, како и на волјата на околу 80% од граѓаните кои континуирано се изјаснуваат дека го одобруваат членството на нашата земја во ЕУ и НАТО.  Од денеска остварувањето на оваа визија е во рацете на секој пратеник одделно и таа зависи од нив. Тие треба да донесат одлука со која ќе ја направат Република Македонија подобра земја, убаво место за живеење на секој граѓанин“, порачаа од Владата.

Во предлогот, инаку, е дефинирана содржината на измените, од кои првата е додаваање на придавката „Северна“ на Македонија во целиот текст на Уставот.

Потоа се бара измена на преамбулата, според Договорот од Преспа, односно при наведувањето на традицијата, ќе се внесе повикување на Прогласот од Првото заседание на АСНОМ со неговите одлуки.

Следна од измените, според Владиниот предлог објавен на владината веб-страница, е неповредливоста на границите. Со нов амандман ќе се декларира почитување на суверенитетот, територијалниот интегритет и политичката независност на соседните држави.

Ќе се додаде и амандман, како дополнување на 2-от амандман на Уставот од 1992 година, а новината е што ќе „се декларира грижа за културните, економските и социјалните права на припадниците на македонскиот народ и сите наши граѓани во странство, без тоа да значи мешање во суверените права на други држави и во нивните внатрешни работи, во било каква форма и заради било каква причина“.


Самарас: Им дадоа сѐ, сите ќе ги викаат само Македонци


Солун, 8 октомври, 2018 - 9:54 (META) 

Нема да дозволиме да ја продадат нашата Македонија. Јас секогаш поддржував дека не можеме на Скопје да му го дадеме името Македонија, бидејќи едноставно, од тој момент сите, официјално ќе ги нарекуваат, не Северномакедонци, Горномакедонци, туку само Македонци, рече поранешниот грчки премиер Андонис Самарас, во неговиот говор пред членовите на Комората во Кавала, на свеченото отворање на трговскиот и бизнис саемот, јави дописничката на МИА.

Тој нагласи дека идните влади ќе го отфрлат Договорот од Преспа.

– Договорот од Преспа, на Скопјаните и официјално од грчката страна им го дава името на Македонија и признавање на националност – наводни Македонци и признавање на македонски јазик и признавање на македонски идентитет. Односно им дадоа сѐ. И покрај вистинските несогласувања што постоеја во минатото за управувањето со прашањето од различни влади, ниту еден грчки политичар никогаш не прифати да се признае нација, јазик и идентитет Македонец. Никој – рече Самарас.

Како што јави дописничката на МИА од Атина, поранешниот грчки премиер, а сега пратеник од Нова демократија истакна дека опозициската партија, „како што и има објавено нејзиниот лидер Кирјакос Мицотакис нема да гласа за ратификација, ниту како влада, ниту како опозиција“, а додаде и дека следните грчки влади ќе треба да се ослободат од обврските од Договорот од Преспа.


Хан: Не нови избори, туку градење двотретинско мнозинство во парламентот


Виена, 5 октомври, 2018 - 12:55 (META) 

Нови избори во Македонија ќе бидат одолговлекување на патот кон почетокот на преговорите со ЕУ, порачува комесарот за проширување на ЕУ, Јоханес Хан за австрискиот весник „Куриер“, велејќи дека го советувал македонскиот премери Зоран Заев да не свикува вонредни парламентарни избори, туку да изгради двотретинско мнозинство во Собранието кое би го поддржало Договорот со Грција.

-Новите избори ќе бидат одолговлекување на патот кон почетокот на преговорите со ЕУ. Опозицијата придонесе за нискиот одзив преку бојкот. Далеку од тоа дека може да се каже оти референдумот бил неуспешен. Невообичаено е еден референдум да добие поддршка од 94 проценти од гласачите, но да земат учество само 37 проценти – затоа што опозицијата очигледно беше успешна во бојкотот. Во парламентот ќе може да се обезбеди двотретинско мнозинство. На власта ѝ се потребни 8 или 9 гласа од опозицијата и тоа мора да биде остварливо. Сите велат дека сакаат во ЕУ и НАТО, и опозицијата исто така, и затоа мора да се плати цената со овој договор – вели Хан.

На новинарското прашање како да се дојде до потребното мнозинство во парламентот, Хан одговора „со комбинација на Балкан и рационалност“.


Николоски: Пратениците што се против уставни измени не се против ставот на Мицкоски


Скопје, 20 септември, 2018 - 16:42 (META) 

Пратениците од ВМРО-ДПМНЕ што на своите профили на социјалните мрежи напишаа дека нема да поддржат уставни измени не се противат на ставот на партискиот претседател Христијан Мицкоски, туку само го пренесуваат расположението на народот, одговори потпретседателот на ВМРО-ДПМНЕ, Александар Николоски на новинарско прашање дали ваквите искази на пратениците се одраз на нов партиски став кој е против она што го соопшти претседателот на партијата – дека ќе се поддржат уставни измени ако народот на референдумот се изјасни „за“.

– Не мислам дека ставот на пратениците се противи на ставот на претседателот на партијата. Пратениците се најсилниот дел од ВМРО-ДПМНЕ. Тие ја чувствуваат вибрацијата на граѓаните. Тие се во секојдневна комуникација со граѓаните  и штом решиле дел од нив вака јавно да го кажат својот став, значи дека тоа е она што го добиваат како вибрација од граѓаните и сакаат да го пренесат и тоа е апсолутно за почит – одговори Николоски.

Тој за изјавата на европратеникот Алојз Петерле дека пратеници на ВМРО-ДПМНЕ даваат поддршка на Договорот со Грција, рече дека се должи на лошо разбрана ситуација во разговорот со Мицкоски и оти е апсолутно неточно дека пратеници на најолемата опозициска партија се решени да го поддржат договорот.

– Јас бев на состанокот со Петерле и можам да кажам дека ова е неточно или лошо разбрал во преводот или нешто не разбрал. Но, ова е целосно неточно – нагласи Николоски по денешната прес-конференција.


Двајца пратеници на „Независни Грци“ се спротивставија на Каменос


Атина, 19 септември, 2018 - 13:30 (META) 

Со различни позиции од оние на Панос Каменос, излегоа двајца пратеници од Независни Грци во однос на договорот од Преспа. Танасис Папахристопулос и Костас Зурарис во одделни интервјуа за грчките медиуми открија дека не се на иста линија со нивниот претседател, кој не го прифаќа решението меѓу Македонија и Грција и најави дека „ќе направи сѐ, договорот да не дојде во грчкиот парламент“, јави дописничката на МИА од Атина.

Папахристопулос смета дека договорот задоцнил и требало да биде потпишан пред повеќе години, а Зурарис иако е против, смета дека Независни Грци нема да биде потребно да ја турнат владата, бидејќи за ратификација ќе има доволен број пратеници од другите партии.

Панос Каменос во периодот од потпишувањето на Договорот меѓу Македонија и Грција на 17 јуни, излезе со неколку различни предлози. Еден период бараше ратификација со зголемено парламентарно мнозинство, односно гласање со минимум 180, наместо 151 пратеник, потоа велеше дека за Договорот од Преспа треба да решат граѓаните, на избори или на референдум, а во понеделникот порача дека Независни Грци ќе се повлечат од владата пред договорот да дојде за ратификација во парламентот.