!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Средба на албанските партии во Собранието, Беса повторно бојкотира


Скопје, 19 јули, 2017 - 12:28 (META) 

Албанските парламентарни политички партии денеска во 14 часот, на покана на Весел Мемеди од НДП, ќе одржат средба во Собранието, на која ќе присуствуваат и претставници на ДПА иако таа партија не е потписничка на декларацијата на албанските политички партии. Наспроти тоа, средбата повторно ќе ја бојкотира Движењето Беса.

„Во согласност со Декларацијата на албанските политички партии донесена на 7 јануари оваа година и обврските што произлегуваат за одржување на редовни состаноци на тркалезна маса на албанските парламентарни партии за заеднички да го набљудуваат текот на имплементацијата на декларацијата, имам чест да ве повикам на следниот состанок на претседателите на парламентарните албански партии, која ќе се одржи во просториите на Собранието на Република Македонија во 14 часот“, се вели во поканата на Мемеди.

Од Движењето Беса велат дека се отворени за комуникација со албанските партии, но дека бараат од Али Ахмети да објасни кои точки од декларацијата се вметнати во владината програма.

„Наместо покана, Али Ахмети мора прво да одговори што се случи со декларацијата на албанските партии? Кои точки од тој документ беа вклучени во програмата на Владата? Значи, Али Ахмети, пред да нè кани преку своите „сателити“, мора прво да даде објаснување зошто дури и во пресрет на 100 дена од формирањето на оваа влада нема закон за албанскиот јазик“, велат од Беса.

На претходната средба, која се одржа на 28 јуни во хотелот „Александар палас“, лидерот на ДУИ, Али Ахмети, изјави дека повеќето барања на албанските политички партии се вклучени во владината програма.

– Ги споредивме програмите на албанските политички партии и констатиравме дека дел од тие програмски определби веќе се вклучени во програмата на новата влада. Останува вo иднина овие средби да продолжат да се одржуваат – изјави тогаш Ахмети.


Договорот со Бугарија стана нова тиранска платформа во наративот на ВМРО-ДПМНЕ


Скопје, 8 јули, 2017 - 13:34 (META) 

По шест месеци постојано споменување на декларацијата потпишана од албанските политички партии, ВМРО-ДПМНЕ веќе не кажува ниту збор за т.н. тиранска платформа ниту во Собранието, каде што им беше омилена тема, ниту преку редовните официјални партиски соопштенија, прес-конференции и изјави.

За време на филибастерот во законодавниот дом пред два месеци, пратениците на ВМРО-ДПМНЕ наместо да дебатираат за кандидати за претседател на Собранието, говореа за зачувување на унитарноста и на суверенитот на државата низ призмата на тиранската платформа. ВМРО-ДПМНЕ истовремено и засилено повикуваше на нови парламентарни избори за народот да се изјасни за платформата.

Последен кој при официјални говори го употреби терминот тиранска платформа е лидерот на ВМРО-ДПМНЕ, Никола Груевски, кој на 31 мај, неколку минути пред да се изгласа новата влада на чело со Зоран Заев, се обрати во Собранието. Тој во неговиот говор го поздрави потпишувањето на гаранциите дека нема да се реализира платформата, кои Заев како мандатар му ги достави на претседателот на државата Ѓорге Иванов при добивањето мандат за составување влада.

„Го поздравувам приземјувањето на мандатарот по однос на залетот во вознес за добивање на премиерската функција и тоа што потпиша дека нема да ја поддржи тиранската платформа. Честитки за народот кој протестираше против тоа цели 80 дена, за да ја зачува унитарноста на државата, честитки и до претседателот на државата, но и до пратеничката група на ВМРО-ДПМНЕ. Никој од нас не се бореше да им ускрати нешто на Албанците. Тие ќе добијат унапредување на користење на јазикот, како што добија и во минатото. Но во рамките на меѓународните стандарди, задржување на унитарниот карактер на државата и без загрозување на македонскиот јазик како единствен официјален јазик на целата територија на Македонија, а со тоа и кохезивен фактор на сите етнички заедници во Македонија“, рече Груевски во Собранието.

Тој не кажа ниту збор за тиранската платформа ниту во неговото обраќање долго седум страници за време на роденденот на ВМРО-ДПМНЕ на 17 јуни.

Но, пред 31 мај, во секое соопштение на ВМРО-ДПМНЕ и при сите нивни секојдневни прес-конфренциии и официјални изјави, тиранската платформа беше главната тема на дискусија која од политичките кругови се префрли во секојдневните општествени кругови, па се чинеше дека секој зборува само за платформата.

Сега нивните соопштенија и изјави се концентрирани на договорот со Бугарија и, како што велат, на „антиреформите кои ги прави СДСМ“.

Инаку, од потпишувањето на платформата од страна на албанските политички партии, ВМРО-ДПМНЕ неколкупати ја менуваше терминологијата, односно зборовите и изразите со кои во соопштенијата, изјавите и во интервјуа го нарекува овој „документ“. Терминологијата на ВМРО-ДПМНЕ се движеше од само „платформа“, па преку „нова платформа“, „национална платформа“, „платформа на Албанците“, сè до последните „сеалбанска платформа“, „платформа од Тирана“ и „тиранска платформа“.


ВМРО-ДПМНЕ: Нема нови проекти – првата мерка на СДСМ е уривање


Скопје, 6 јуни, 2017 - 9:56 (META) 

Нема нови проекти, нема подобрувања, нема нова додадена вредност за граѓаните. Првата мерка на Владата на ВМРО-ДПМНЕ во 2014 година беше законот за отпис на долгови, а првата мерка на СДСМ во 2017 година е уривање на нешто што е веќе изградено, порачува ВМРО-ДПМНЕ во своето редовно утринско соопштение денеска.

Партијата порачува дека граѓаните се против антиреформи.

„Владата на Заев не губи време да го оправда епитетот антиреформска. Уривање на оградата околу владината зграда и укинување на програмата „Кембриџ“ се приоритетите на Зоран Заев и на неговиот тим. Граѓаните не сакаат деструкција, блокади и поништување на проектите.Тие очекуваат СДС да го исполни ветеното. Да не се реализира тиранската платформа и да се изградат нови 500 километри автопат. Граѓаните очекуваат минимална плата од 16.000 денари, просечна од 30.000 денари, а лекарите со право се надеваат дека час поскоро ќе добијат плати од 100.000 денари, кои СДС им ги вети“, се вели во соопштението во кое се споменуваат и други изборни ветувања на СДСМ.


ВМРО-ДПМНЕ: Граѓаните не сакаат политичари кои лажат


Скопје, 25 мај, 2017 - 10:08 (META) 

ВМРО-ДПМНЕ прашува каква е состојбата со двојазичноста, поради контрадикторноста на тоа што го кажува Зоран Заев и портпаролот на Алијанса за Албанците.

„Кој лаже, Зоран Заев или Арбен Таравари? Кој ги манипулира гласачите и народот, Алијанса за Албанците или СДС?     Дали лаже Таравари кога вели дека побарале двојазичноста да се реализира експресно и Заев се согласил со тоа или лажеше Заев кога ја потпиша гаранцијата со која ја отфрли Тиранската Платформа?“, стои во утринското соопштение од партијата.
ВМРО-ДПМНЕ порачува дека „граѓаните не сакаат политичари кои лажат кај ќе стигнат“.

„Граѓаните оправдано се плашат дека криминалецот Заев е подготвен да ја реализира Тиранската Платформа, во надеж дека од позиција на власт ќе се спаси од кривичен прогон за кривични дела кои ги извршил“, вели ВМРО-ДПМНЕ.


Ахмети: Нема целата платформа да биде вклучена во владината програма


Тетово, 24 мај, 2017 - 11:21 (META) 

Декларацијата на албанските партии во Македонија нема да биде целосно имплементирана во новата програма на Владата од повеќе причини, кои се многу реални и искрени, рече лидерот на ДУИ, Али Ахмети во изјава дадена за неколку медиуми на албански јазик.

Според Ахмети, најважно за Македонија е да стане членка на ЕУ и НАТО и да остане стабилна.

– Што се однесува за декларацијата на Албанците, таа е една програмска декларација кој е опфатена во програмите на албанските политички партии и мислам дека истата не преставува ризик или па отстапување на нештата што имаат поврзаност со перспективата и стабилноста на РМ. Таа изјава е за доброто на Македонија и регионот и има многу круцијални нешта како што е влезот на Македонија во НАТО и ЕУ, економски развој, развој на регионите во исто ниво така што нема ништо лошо во неа, зошто главните нешта на таа декларација се опфатени и во владината програма – изјави Ахмети.

Лидерот на ДУИ дополни дека сите аспекти од декларацијата ќе бидат отворени за дебата и нема да се држат во тајност бидејќи не претставуваат никаква закана за Македонија.

Во однос на ресорите во новата влада, Ахмети рече дека генерално е договорено ДУИ да ги има тие ресори што досега ги имала, со промена во министерствата за здравство и образовние, па така сега албанска политичка партија ќе го има министерството за здравство.

-Уште сме во консултации за да направиме што поприфатлив избор, не можам да правам разлики кој е подобар, бидејќи сите кадри имаат свои предности. Уште немам конкретни имиња во моментов кога ќе имаме конкретни имиња ќе бидеме транспарентни и верувам дека изборот што ќе го направи ДУИ а и партиите од коалицијата ќе биде најприфатлив избор за нивниот електорат, бидејќи овие ќе бидат министри кои ќе работат за сите граѓани на Македонија и ќе реализираат една програма во ниво на републиката и нема да бидат локални претставници – додаде Ахмети.

Потпретседателката на ДУИ и градоначалничка на Тетово рече дека нема амбиции да биде дел од новата влада.

-Јас би сакала да се кандидирам повторно како градоначалник на Тетово, но сепак и партијата треба да го изнесе ставот дали јас ќе се борам за нов мандат во локалната власт или пак ќе биде дел од централната власт – рече Арифи


Тодоров: ВМРО-ДПМНЕ и протестите на народот ја заштитија унитарна Македонија


Скопје, 17 мај, 2017 - 15:31 (META) 

„Зоран Заев е првиот мандатар што потпишува гаранции дека нема да ги наруши највисоките државни и национални интереси. Тоа не било побарано ниту од Бранко Црвенковски, ниту од Хари Костов, ниту од Владо Бучковски. Тоа доволно говори за сериозноста на информациите што предупредуваа на ризикот со кој се соочува Македонија“, рече Никола Тодоров на прес-конференцијата на ВМРО-ДПМНЕ откако претседателот Ѓорге Иванов му го додели мандатот на претседателот на СДСМ.

Тодоров предавањето на гаранциите од Зоран Заев за заштита на територијалната целина, унитарноста и мултиетничноста на Македонија го оквалификува како „победа издејствувана од политичкиот отпор на ВМРО-ДПМНЕ и од 80-дневните најдолги и најмасовни протести на стотици илјади граѓани низ целата држава“.

– Реализацијата на елементите од тиранската платформа, за кои, како што изјавуваше Зоран Заев, имал позитивен став, значеше директно загрозување на мултиетничкото општество какво што го градевме и претворање на државата во бинационална. Таа опасност беше реална и затоа народот остро реагираше – рече Тодоров.

Членот на извршниот комитет на ВМРО-ДПМНЕ ги обвини СДСМ и Заев за политичката криза, затоа што, како што рече, ВМРО-ДПМНЕ понудила поддршка за влада што ќе ја отфрли платформата на албанските партии, а СДСМ тоа го отфрлила, па потоа дошло до „политичко насилство насилство при обидот да го изберат Талат Џафери за претседател на Собранието“.

– Доколку Зоран Заев собереше храброст и порано се оградеше од тиранската платформа, Република Македонија не мораше да ги минува и овие месеци во политичка криза. Доколку Зоран Заев порано ги дадеше гаранциите што ги побара претседателот Ѓорге Иванов, досега ќе беа деблокирани сите процеси и ќе имавме локални избори. Денешното добивање на мандатот е само затруен плод на затруеното дрво – рече Тодоров.

Нагласувајќи дека на гаранцијата од Заев не се потпишани лидерите на албанските партии од мнозинството, рече дека „ВМРО-ДПМНЕ знае колку тежи зборот на Зоран Заев“, па затоа будно ќе го следи.

Тој, на крајот, во име на партијата им честиташе на граѓаните „што беа истрајни во своите барања да се обезбедат гаранции за интегритетот и за суверенитетот на Република Македонија“.
Тодоров порача дека поддршката на коалицијата „За подобра Македонија“ се зголемува и повторно го кажа барањето на ВМРО-ДПМНЕ за предвремени парламентарни избори.


Затуроска: Одложувањето на СДСМ да се соочи со народот го зголемува револтот кај граѓаните


Скопје, 16 мај, 2017 - 16:25 (META) 

ВМРО-ДПМНЕ преку пратеничката Лилјана Затуроска денеска повторно го повика парламентарното мнозинство веднаш да обезбеди услови за продолжувањето на мандатот на локалната власт и да не ги одлагаат локалните избори. Тоа, според Затуроска, е неопходно за да се излезе во пресрет на интересите на граѓаните и потребите на општините, да продолжат нормално да функционираат како сервис на народот, кој може да ги решава секојдневните комунални и инфраструктурни барања.

Таа му порача на СДСМ дека „секое одложување да се соочи со народот само дополнително ја продлабочува политичката криза во државата и го зголемува револтот на граѓаните кон нивните незаконски, неуставни и, пред сè, антидржавни чекори кои ги преземаат во континуитет“ и го повтори повикот на нејзината партија заедно со локалните да се организираат и предвремени парламентарни избори.

– ВМРО-ДПМНЕ останува на ставот дека народот заслужува да биде прашан што мисли за постизборната измама преточена во тиранската платформа. Доколку парламентарното мнозинство се охрабри, во истиот термин со локалните избори би можеле да се одржат и нови парламентарни избори, на кои граѓаните не само што ќе ја изберат својата локална власт, туку ќе имаат можност да го кажат својот став и за последните политички случувања и за постизборните измами што СДС им ги приреди – рече Затуроска.


ВМРО-ДПМНЕ: Анкетата на ИРИ покажа дека народот му го врти грбот на Заев


Скопје, 16 мај, 2017 - 10:01 (META) 

„Народот се чувствува постизборно измамен со тиранската платформа и затоа на анкетата на ИРИ мнозинството смета дека треба да има нови избори. Анкетата на ИРИ покажа дека народот му го врти грбот на Заев и не сака криминалец да ја води државата. Речиси двојно поголема е поддршката што ВМРО-ДПМНЕ ја има во однос на поддршката на СДС“, порача ВМРО-ДПМНЕ денеска во своето редовно утринско соопштение.

Партијата на својот политички противник му порачува дека доколку во СДСМ постои „барем малку храброст, чесност и одговорност кон сопствениот народ“, ќе се согласи во октомври заедно со локалните да се одржат и предвремени парламентарни избори на ист трошок.

ВМРО-ДПМНЕ, исто така, го предупреди СДСМ „да не помисли да бега од локалните избори како што претходно двапати бегаше од одржувањето на минатогодишните парламентарни избори“.


Данев: Мнозинството поради партиски интереси ги одложува локалните избори


Скопје, 15 мај, 2017 - 16:46 (META) 

„ВМРО-ДПМНЕ кажа дека почетокот на јули е најповолниот датум за одржување на локалните избори, во интерес на граѓаните, но парламентарното мнозинство сметаше дека нивен партиски интерес е да го одложи терминот и практично да го избере последниот што сметавме дека е рационален. Но ВМРО-ДПМНЕ е подготвена да излезе на избори и во јули и во октомври бидејќи знаеме дека народот е на наша стран“а, порача пратеникот на ВМРО-ДПМНЕ, Драган Данев, на прес-конференција.

– Очекуваме дека новото парламентарно мнозинство овојпат ќе си остане на зборот, бидејќи во спротивно ризикува поради својата неподготвеност да ја доведе во прашање локалната самоуправа како една врвна демократска придобивка и право на граѓаните – рече Данев.

Тој повторно го изнесе барањето на ВМРО-ДПМНЕ, во исто време со локалните да се одржат и нови парламентарни избори, за „граѓаните да може да се произнесат и за тиранската платформа“.

– Секој нов обид за неуставни и незаконски потези, само дополнително ќе ја продлабочат кризата во Македонија – порача пратеникот на ВМРО-ДПМНЕ.

Данев рече дека ВМРО-ДПМНЕ не присуствуваше на денешната координација во Собранието зашто „останува на ставот дека Талат Џафери не е избран во легална процедура за претседател на Собранието и тој таа функција само бесправно ја узурпира“, а го признава само како легално избран пратеник.


ВМРО-ДПМНЕ: Џафери ја почна двојазичноста


Скопје, 13 мај, 2017 - 11:08 (META) 

Нелегално избраниот претседател на Собранието, Талат Џафери, поддржан од СДС, почна да го применува албанскиот јазик како јазик на кој Собранието се обраќа до јавноста, покрај македонскиот, давајќи ни само мал поглед како ќе се одвива и ќе се имплементира двојазичноста на дело, обвини ВМРО-ДПМНЕ.

Партијата вели дека Џафери кажал „дека нема намера да го почитува сегашниот закон за употреба на јазиците и дека собраниските седници ќе ги води на албански јазик, а доколку за тоа има потреба би го сменил и законот“, а СДСМ за тоа молчи.

„Граѓаните на Република Македонија можат да видат само мал сегмент како ќе функционираат институциите откако СДС би ја презел власта – целосно двојазични на сите нивоа на власта на локално и на централно ниво, двојазични банкноти и униформи, дебата за промена на државните симболи, промена на името на државата и како крајна фаза на планот од Тирана, федерализација на Република Македонија. Граѓаните не го дадоа својот глас за реализација на тиранската платформа, граѓаните се излажани и постизборно измамени“, порача ВМРО-ДПМНЕ, велејќи дека Заев е подготвен да ја реализира платформата на албанските партии „за да дојде на власт, во надеж дека од позиција на власт ќе се спаси од кривичен прогон за големиот број кривични дела што ги извршил“.