Министерството за надворешни работи на Турција ја нападна Европската Унија затоа што побара од Анкара да се воздржи од несоодветни изјави.
Од Анкара се наведува дека е многу лошо што европскиот блок ја поддржал Холандија, која, како што сметаат во Турција, ги прекршила човековите права и европските вредности.
Во соопштението на турското министерство за надворешни работи, се наведува дека Европската Унија се залага за демократските вредности и за основните човекови права и слободи селективно и дека нејзиниот повик за смирување нема важност за Анкара.
Турскиот вицепремиер Нуман Куртулмуш изјави дека Турција нема да дозволи холандскиот амбасадор да се врати во Анкара сè додека Холандија на своето тло не дозволи одржување на собири на турски политичари кои водат референдумска кампања.
Куртулмуш додаде дека Анкара исто така го затвори воздушниот простор за холандски дипломати сè додека Холандија не ги исполни турските барања.
Холандија, како и Германија и Австрија, зазеде став дека на својата територија не дозволува турски политичари да одржуваат собири за поддршка за претстојниот референдум за измена на уставот во април, со кој на турскиот претседател Реџеп Таип Ердоган ќе му се прошират овластувањата.
