Политичките партии што имаат свои претставници во парламентот, денеска напладне ќе одржат координативна средба за закажување на продолжението на конститутивната седница на Собранието, која почна на 30 декември минатата година.
Иницијативата за продолжување на конститутивната седница, во име на 67 пратеници, во петокот ја поднесе генералниот секретар на СДСМ и пратеник, Оливер Спасовски.
– Со оваа иницијатива повеќе нема дилеми околу обезбедувањето парламентарно мнозинство. Иницијативата е потпишана од 67 пратеници и очекуваме Трајко Вељаноски веднаш да закаже продолжување на конститутивната седница за Собранието да може повторно да функционира во интерес на граѓаните – рече Спасовски.
Тој соопшти дека прв чекор ќе биде избор на претседател на Собранието и дека потоа очекуваат претседателот Ѓорге Иванов да му го даде мандатот за формирање влада на лидерот на СДСМ, Зоран Заев.
Вељаноски ја закажа координативната средба за денеска, во 12 часот, а од неговиот кабинет соопштија дека на координативната средба треба да биде утврден предлогот за состав на Комисијата за прашања на изборите и на именувањата, кој ќе послужи како основа за закажување на продолжение на конститутивната седница на Собранието на Република Македонија.
До денеска постои несогласување околу тоа која партија колку членови треба да има во комисијата, па тоа може да биде пречка за нејзино формирање и воопшто за продолжување на седницата на Собранието.
Директорот на Бирото за јавна безбедност (БЈБ), Митко Чавков, на прашање дали полицијата гарантира дека пратениците нема да бидат оневозможени да влезат или да излезат од Собранието, со оглед на разни најави дека учесници во протестите „За заедничка Македонија“ ќе ги блокираат приодите во законодавниот дом, изјави: „Сигурно е дека пратениците ќе имаат безбеден и непречен пристап во парламентот!“
