ВМРО-ДПМНЕ е водечка и најодговорна партија во Македонија и како таква, ние, кога се случија поплавите, дадовме цврсти ветувања дека работите ќе се вратат во нормала, изјави лидерот на ВМРО-ДПМНЕ, Никола Груевски, при денешната посета во Стајковци.
Тој рече и дека ветувањето веќе почнало да се реализира и дека е почнато со асфалтирање на улиците.
Тој истакна дека вкупно ќе се асфалтираат 56 улици од кои три се веќе асфалтирани, а на 11 се врши подготовка и со работа ќе се почне во наредните денови.
– Ќе се работи во целиот регион што беше погоден и каде што беше оштетена инфраструктурата. Овие денови се почнува со крупна реконструкција и со обнова. Околу шест милиони евра ќе се инвестираат и во обнова на обиколницата околу Скопје во делот каде што беше оштетена. На обнова на обиколницата, треба да се почне со работа за еден-два месеца – рече Груевски.
Тој додаде дека од поплавените подрачја, досега авансот од 500 евра го имаат добиено 3.003 домаќинства, а другите не се исплатени бидејќи има проблем со документација, кој ќе се решава со изјава на нотар за да може во наредните пет дена да бидат исплатени.
Груевски во посетата беше придружуван од министерот за транспорт и врски, Владо Мисајловски, министерот за здравство, Никола Тодоров, и од градоначалниците на Град Скопје, Коце Трајановски, и на општина Гази Баба, Тони Трајковски.
