Револтирани поради неисплатата на субвенциите, земјоделците денеска од 12 до 13 часот блокираа повеќе патни правци низ државата. Тие бараат до петок да се сретнат со министерот за земјоделство, шумарство и за водостопанство, Михаил Цветков, министерот за финансии, Кирил Миноски, и со директорот на Платежната агенција, Игор Златков.

– Бараме средби во трите надлежни институции за да видиме кој лаже и кој си игра со маката на земјоделците. До петок нема да има протести и блокади –  изјави за „Мета“ претседателот на Сојузот на синдикатот на земјоделците во Струмичкиот Регион, Ристо Велков.

Ако барањата за исплата на парите не се исполнат, земјоделците од Пелагонискиот Регион ќе преземат порадикални чекори, односно се закануваат со блокади на граничните премини.

– До петок поставивме ултиматум да се состанат Министерството за финансии, Министерство за земјоделество, шумарство и водостопанство и Платежната агенција. Ако не се исплатат парите, ќе се обноват протестите, но не само тоа – ќе бидат порадикални. Главна цел ќе ни биде блокадата на граничните премини, а со тоа и граничниот премин Меџитлија – изјави Кире Неделковски, земјоделец од селото Вашареица, основач на синдикатот на земјоделци „Спас“.

Пратеникот на СДСМ, Љупчо Николовски, денеска на прес-конференција рече дека земјоделските субвенции не се партиска мерка, туку се државна мерка.

– Проблемот на земјоделците може да им се случи и на вработените во училиштата, градинките, општините, кои по 15 мај остануваат без градоначалници и без совети, а со тоа и без плати. Затоа веднаш мора да прекинат неразумните блокади на ВМРО-ДПМНЕ – истакна Николовски.

Денеска блокади на патиштата имаше кај Струмица, Прилеп, Кочани, како и пред Министерството за земјоделство и шумарство во Скопје.

Субвенции на земјоделците не им се исплатени за цела 2016 година и дел за 2014 и за 2015 година и станува збор за сума од 100 милиони евра.