Агенцијата за храна и ветеринарство, на почетокот на туристичката сезона, спроведува вонредни, засилени контроли на храната во сите поголеми туристички центри во земјава.
Од почетокот на јуни, вонредни засилени контроли во туристичките места, инспекторите за храна и официјалните ветеринари спроведоа во охридско-струшкиот регион и во Дојран. Целта е да се пресретнат и спречат евентуални труења и инфекции кои лесно можат да се случат како последица на високата температура.
Со вонредните контроли се опфатени хотели, ресторани, пицерии, слаткарници, бурекчилници, пекарници, сендвичарници, ќебапчилници, кафе-барови, прокавници, летни тераси и други објекти, каде се очекува зголемена фреквенција на туристи.
– Со вонредните контроли во охридско-струшкиот регион, беа опфатени 101 угостителски објект. За констатираните недоследности се издадени 34 решенија за нивно отстранување, две решенија за забрана на вршење дејност, наплатена е глоба во висина од 4.000 евра во денарска противвредност и издадени се oсум покани за едукација. Исто така, од инспекциските служби на Агенцијата се уништени и 229 килограми небезбедна храна од животинско потекло – информираат од Агенцијата.
При спроведените контроли на 12 оператори со храна во Дојран, од кои шест сè уште не почнале со работа, од инспекциските служби на Агенцијата за храна и ветеринарство не се евидентирани поголеми отстапувања кога е безбедноста на храната во прашање.
