Лидерот на СДСМ, Зоран Заев, денеска се сретна со амбасадорката на Кралството Белгија, Аник ван Калстер, со која разговарал за актуелната политичка криза во Македонија и за излезните решенија.
– Потребно е што поскоро да се организира влада според предвиденото во Договорот од Пржино, која преку прецизни рокови ќе може да ги обезбеди потребните услови за фер и регуларни избори во Македонија. Тоа се, пред сè, утврдување на избрачкиот список и објективно медиумско известување. Со политичка волја, ова е практично изводливо за кратко време, со што изборите би можеле да се одржат наесен. На граѓаните им е потребна стабилна и чесна влада, избрана на веродостојни избори – рекол Заев.
На средбата се разговарало и за Специјалното јавно обвинителство и за барањето на СДСМ Уставниот суд да се изјасни за неговата уставност.
Претседателот Заев и белгиската амбасадорка заеднички констатираа дека граѓаните на Македонија заслужуваат подобар живот, а Република Македонија место во ЕУ и во НАТО, поради што секој треба да го понесе својот дел од одговорноста на тој пат.
