Познатиот германски фестивал на пивото Октоберфест започна со бум во саботата во Минхен – односно со отварање на чепот на првото буре пиво и петарди, соопшти агенцијата ДПА.
Точно напладне градоначалникот на Минхен Дитер Рајтер официјално го отвори фестивалот со отворање на првото буре со два удари и традиционалниот повик: „O’zapft is“. Потоа му ја подаде првата кригла на премиерот на јужната покраина Баварија, Маркус Седер.
Посетителите со часови чекаа во редици за да уживаат во сончевиот прв ден – сосема спротивно од минатогодишниот дожд.
Оваа година се очекуваат најмалку 6 милиони посетители на меѓународно познатиот фестивал на пивото во Германија, кој се одржува секоја есен. Бидејќи грижите за пандемијата одамна ги нема и се предвидува добро време, надежите се големи.
Овогодинешниот фестивал треба да трае два дена подолго од вообичаеното – тој е продолжен по првиот викенд во октомври до вторник, 3 октомври, за да се земе предвид времето на националниот празник во чест на германското обединување.
Сепак, во позадината на фестивалот се наѕира висока инфлација, со тоа што еден литар пиво чини меѓу 12,60 евра (13,45 долари) и 14,90 евра оваа година, околу 6,1 отсто повеќе од претходната година.
За прв пат бесплатна вода за пиење ќе има на четири пункта за точење вода на терените на фестивалот годинава.
Како и секоја друга година, фестивалот во паркот Терезиенвизе во главниот град привлекува посетители со историски рингишпил и традиционална музика на дувачки оркестар.
Се очекува да дежураат околу 600 полицајци, како и околу 450 болничари, 55 лекари и 2.000 стјуарди.
