Уставниот суд оформи предмет по иницијативата на адвокатката Сузана Јошевска и граѓанската иницијатива „Шанса за Центар“, со која се оспорува Деталниот урбанистички план (ДУП) за локалитетот Буњаковец во кој спаѓа и подрачјето на поранешната фабрика „Треска“.
„Овие предмети се предадени на работа кај тимови од советници и судии и се во почетна фаза од работењето, односно во претходна постапка. Уставниот суд допрва ќе ги испитува наводите во иницијативите и барањата и ќе оформи реферати кои ќе содржат предлози за гласање на седница“, соопштија од Уставниот суд.
Во иницијативата што е испратена до Уставниот суд се тврди дека оспорената одлука за конкретни измени на ДУП Буњаковец 2 е во спротивност со Генералниот урбанистички план, односно дека границата на ДУП-от не е усогласена со опфатот на градската четврт планирана со ГУП, како и дека нумеричките податоци на ДУП-от се неусогласени со оние од ГУП-от. Подносителите наведуваат дека поради овие околности се прави груба повреда на член 11 став 7 и член 15-б од Законот за просторно и урбанистичко планирање.
Подносителите во иницијативата наведуваат дека донесената одлука за ДУП е во спротивност со владеењето на правото содржано во членот 8 од Уставот, како и дека е во спротивност со членови од Законот за просторно и урбанистичко планирање.
Од граѓанската иницијатива „Шанса за Центар“ се надеваат дека Уставниот суд ќе постапува брзо и ефикасно, имајќи предвид дека инвеститорите забрзано се подготвуваат да почнат со градба на локацијата на фабриката „Треска“.
Од „Шанса за Центар“ додаваат дека градоначалникот на Центар Горан Герасимовски веќе потпишал една дозвола за градење, а од медиумските објави се гледа дека и други инвеститори забрзано собираат милионски суми за да почнат со градба на „наполитанките“ кај фабриката „Треска“.
„Во недостиг на политичка волја да се сопре со спроведувањето на незаконските ДУП-ови кои се косат со Генералниот урбанистички план на Скопје, само судот може да ја врати законитоста во планирањето во Центар“, стои во соопштението од „Шанса за Центар“.
Тие потсетуваат дека за просторот кај фабриката „Треска“ се бореле граѓани, активисти, архитекти и урбанисти, а политичка волја за промена имало до 2020 година кога се прифатило напуштање на решението од ДУП-от и се направил конкурс за овој локалитет.
„Општинската власт под раководство на Герасимовски, неколкумина моќници и спрегата со институциите кои го изгубија своето значење, интегритет и кредибилитет може да му пресудат на последниот поголем простор, и да си ја потврдат својата улога на непријател на граѓаните“, велат од „Шанса за Центар“.
Инаку, на локацијата кај фабриката „Треска“ летово забрзано се одвива рушење на постојните индустриски објекти. Дел од градбите што се протегаат кон булеварот Митрополит Теодосиј Гологанов веќе целосно се срушени, а на тој дел е поставена и градежна ограда. На преостанатиот дел од просторот во моментов се врши рушење на преостанатите градби и градежниот шут се дислоцира со камиони од локацијата.
