Управниот суд донесе одлука со која привремено ги поништи решенијата за разрешување на директорите на центрите за социјална работа и на јавните установи од страна на техничката министерка Фросина Ременски. Во решението за привремена мерка се забранува на министерот за труд и социјална политика, Ременски, да презема дејства во врска и по повод донесените решенија за разрешувања на директор и решенијата со кои назначува в.д. директори до донесување правосилна одлука по тужбата.
По овие разрешувања, дополнителниот заменик-министер, Диме Спасов, поднесе тужби до Управен суд по сомневање за незаконско постапување каде се спори административна процедура „во согласност со Закон за влада, каде во член 48, став 3 е предвидено дека во случај на сомневање произлезено од можно незаконско постапување од страна на министерот и/или дополнителниот заменик, може да се поднесе тужба до надлежниот суд. Во случај да се спорат административни процедури и одлуки може да се поднесе тужба до надлежниот Управен суд“.