Најмалку 30 лица загинаа во три експлозии што утринава го потресоа сирискиот град Хомс, јавува сириската новинска агенција „Сана“.
Бомбите експлодирале во близина на главниот плоштад во Хомс, во подрачјето Ал Захра.
Според првичните информации, бомбаш-самоубиец се разнел, а веднаш потоа експлодирал и автомобил-бомба. Набргу потоа уште една експлозивна направа била детонирана на подрачјето каде што бил изведен првиот напад.
Според наводите на неименуван полициски извор, во експлозиите загинале повеќе од 30 лица.
Сириската државна телевизија јави дека во експлозиите загинале 14, а повредени се 132 лица.
Нападите се изведени десетина дена откако припадниците на ИД детонираа експлозии во истото подрачје, при што загинаа 16 лица.
ИД под своја контрола држи големи делови од провинцијата Хомс, вклучувајќи го и древниот град Палмира.
