Владимир Талески, градоначалникот на Битола, денеска изјави дека и пред да почне да се протестира против загадениот воздух, Oпштина Битола преземала мерки за намалување на загадувањето на воздухот, објави „Радио Слободна Европа“.
– И кога е модерно да се протестира дека воздухот е загаден или колку е загаден, сакам да потсетам дека Општина Битола правеше проекти и пред оваа мода да стапи на сила. Бевме меѓу првите општини што направија кружни текови, ги тргнаа семафорите од улиците, меѓу првите општини донесовме план за екологија, а топловодот што се планира е вистинско решение за справување со аерозагадувањето – рече Талески.
Од здружението „За нас се работи“ формираа платформа „Петка за Битола“ со која бараат итно да се преземат мерки за намалување на загадувањето, да се воведе посебен режим на сообраќај во центарот на градот, да се прскаат улиците, да се набави јавен еколошки превоз, субвенции за електрична енергија, топлификација за институциите и слично.
